ސަރުކާރުން އަލަމުންދާ ފިޔަވަޅުތަކުގެ ހެޔޮ ނަތީޖާ ވަރަށް އަވަހަށް ސިއްހީ ދައިރާއިން ފެންނަން ފަށާނޭކަމަށް ސިއްހަތާ ބެހޭ ވަޒީރު ޢަބްދުﷲ ނާޒިމް އިބްރާހީމް ވިދާޅުވެއްޖެއެވެ.
ސިއްހަތާބެހޭ ވުޒާރާއިން އިސްނަގައިގެން ހުޅުމާލޭ ސެންޓްރަލްޕާކްގައި މިއަދު ފެށި "ހެލެތު އެކްސްޕޯ 2025" ފެށުމުގެ ރަސްމިއްޔާތުގައި ވާހަކަދައްކަވަމުން މިނިސްޓަރު ވިދާޅުވީ ރާއްޖޭގެ ސިއްހީ ދާއިރާއަށް ދިމާވެފައިވާ މައްސަލަތައް ހައްލުކުރުމަށް ސަރުކާރުން ގިނަ މަސައްކަތްތަކެއް ކުރައްވަމުން ގެންދަވާ ކަމަށާއި، އެގޮތުން މުޖުތަމައު ހޭލުންތެރިކޮށްގެންނާއި، ޤާނޫނުތަކަށް ބަދަލު ގެނެސްގެންވެސް ސިއްހީ ދާއިރާ ކުރިއެރުވުމަށް މަސައްކަތް ކުރަމުންދާކަމަށެވެ.
ހެލްތު އެކްސްޕޯ ހުޅުވުމުގެ ތެރެއިން..
ވަޒީރު ވިދާޅުވީ މިއީ ރައްޔިތުންގެ ދިރިއުޅުމާއި ގުޅިފައިވާ ކަންކަން ކަމުން ބަދަލުތައް އަންނަން ވަގުތު ނަގާނޭކަމަށެވެ. ނަމަވެސް މާ ލަސްތަކެއްނުވެ ރާއްޖޭގެ ސިއްހީ ދާއިރާއިން ހެޔޮބަދަލުތައް އަންނަމުންދާތަން ފެންނަން ފަށާނޭކަމަށް ނާޒިމް ވިދާޅުވިއެވެ. އެގޮތުން މިއަދު ކުރެވެމުންދާ ކަންކަން ދިވެހި ތާރީހުގައި ކުލަގަދަކޮށް ފެންނަން އޮންނާނޭކަމަށް ވަޒީރު ވިދާޅުވިއެވެ.
އަންނަން އޮތް ޖީލުތަކުން މިވާހަކަދައްކާނެ، އެއީ ޝައްކެއް އޮތްކަމެއްނޫން
ސިއްހަތާ ބެހޭ ވަޒީރު ޢަބްދުﷲ ނާޒިމް އިބްރާހީމް
ވަޒީރު ވިދާޅުވީ ދުޅަހެޔޮ މުޖުތަމައުއެއް ބިނާކުރުމަކީ ސަރުކާރުން ހާއްސަ އިސްކަމެއްދޭ ކަމެއް ކަމަށާއި، ތަފާތު އެކި ބަލިތަކުން ސަލާމަތްވެފައިވާ ދުޅަހެޔޮ މުޖުތަމައުއަކަށް ވާސިލްވުމަށް ކުރާ މަސައްކަތުގައި އެންމެންގެ ބައިވެރިވުން މުހިންމުކަމަށެވެ. އެގޮތުން ސަރުކާރުން ކުރަމުންގެންދާ މަސައްކަތްތަކުގައި އަމިއްލަ ފަރާތްތަކުގެ ބައިވެރިވުން މިހާރުވެސް ވަރަށްބޮޑަށް ލިބެމުންދާކަން ވަޒީރު ވިދާޅުވިއެވެ. އެގޮތުން މިއަދު ބޭއްވިގެންދާ ހެލްތު އެކްސްޕޯއަކީ އެކަމުގެ މިސާލެއްކަން ވަޒީރު ފާހަގަކުރެއްވިއެވެ.
Advertisement
This content is created and paid for by advertisers and does not involve Voice Journalists
