ރައީސުލްޖުމްހޫރިއްޔާ ޑރ.މުހައްމަދު މުޢިއްޒުގެ ސަރުކާރުގެ، ބޯހިޔާވަހިކަން އެންމެންނަށް ސިޔާސަތުގެ ދަށުން އެންމެ ފުރަތަމަ ދޫކުރާ ފްލެޓާއި ގޯއްޗަށް އެދި ފޯމު ހުށަހެޅޭނޭ ތާރީހު އިއުލާނުކޮށްފިއެވެ.

އިމާރާތްކުރުމާއި ގެދޮރުވެރިކަމާ ބިނާރާ ބެހޭ ވުޒާރާއިން ރޭ ވަނީ މި ސަރުކާރުގެ ބޯހިޔާވަހިކަމުގެ ސިޔާސަތު އިފްތިތާހްކޮށް، ބޯހިޔާވަހިކަމުގެ އުސޫލްތައް ވަނީ އާއްމުކޮށްފައެވެ. ބޯހިޔާވަހިކަން ލިބޭ އުސޫލްތައް އާއްމުކުރިއިރު، ތަނަވަސްކަން ނެތް މީހުންނަށް ރެންޓް އޯން މޮޑެލްގެ ދަށުން ބޯހިޔާވަހިކަން ލިބޭއިރު، މި ސިޔާސަތުގެ ދަށުން މާލޭގެ ރަށްވެހިންގެ އިތުރުން މާލޭގައި އުޅޭތާ 15 އަހަރުވެފައިވާނަމަ ބޯހިޔާވަހިކަން މާލެ ސަރަހައްދުން ގޯތި ގެދޮރުގެ ކަށަވަރުކަން ލިބެއެވެ. އެފަރާތްތަކަށް ގޯއްޗާއި ފްލެޓް ދިނުމަށް ނިންމާފައިވަނީ މާލެ ސަރަހައްދުގެ އިތުރުން މިހާރު ހިއްކަމުންދާ ރަސްމާލެއިންނެވެ.

ހައުސިން މިނިސްޓްރީން އުސޫލްތައް އާއްމުކުރިއިރު ސަރުކާރުން ދޫކުރާ ގޯއްޗާއި ފްލެޓަށް ކުރިމަތިލާން ހުޅުވާލުމަށް ނިންމާފައިވަނީ އަންނަ އަހަރުގެ ޖެނުއަރީމަހުގެ 4 ވަނަ ދުވަހުން ފެށިގެން މާޗްމަހުގެ 3 ވަނަ ދުވަހުގެ ނިޔަލަށެވެ. މިނިސްޓްރީން ބުނީ ފްްްްލެޓާއި ގޯއްޗަށް އެދި ހުށަހެޅޭނީ ހިޔާވަހި ޕޯޓަލް މެދުވެރިކޮށް ކަމަށެވެ.

މާލޭގައި ދިރިއުޅޭ ރައްޔިތުންނަށް ދިރިއުޅުމަށް ބިން ދޫކުރުމުގެ އުޞޫލުން ދޫކުރުމަށް ނިންމާފައިވަނީ 1200 އަކަފޫޓުގެ 15,000 ގޯއްޗެވެ. އަދި މާލޭގައި ދިރިއުޅޭ ރައްޔިތުންނަށް ފްލެޓް ދޫކުރުމުގެ އުޞޫލު ދޫކުރުމަށް ހަމަޖެހިފައިވަނީ 7،500 ހައުސިން ޔުނިޓެވެ.

ބޯހިޔާވަހިކަން އެންމެނަށް ސިޔާސަތު އިފްތިތާހްކޮށްދެއްވުމަށްފަހު މިނިސްޓަރު މުއްތަލިބް ވިދާޅުވީ، ރައީސް ޑރ.މުހައްމަދު މުއިއްޒުގެ ބޯހިޔާވަހިކަމުގެ ސިޔާސަތު އެކުލަވާލާފައިވަނީ ހުރިހާ ފަންތިއެއްގެ މީހުންނަށް ބޯހިޔާވަހިކަން ކަށަވަރުވާގޮތަށްކަމަށެވެ. އެގޮތުން މި ސިޔާސަތުގެ ތެރެއިން ފުދުންތެރިވިއަސް ނުވިއަސް އެމީހަކީ އަމިއްލަ ގެދޮރެއް ލިބިގެންވާ މީހަކަށް ވެގެންދިއުމަކީ މި ސިޔާސަތުގެ އެއް އަސާސްކަމަށް ވަޒީރު ފާހަގަކުރެއްވިއެވެ.