ބޯހިޔާވަހިކަން އެންމެންނަށް ސިޔާސަތުގެ ދަށުން އާމްދަނީ މަދުންލިބޭ ފަރާތްތަކަށް ފްލެޓް ލިބުމުގެ ފުރުސަތު ބޮޑުވެއްޖެއެވެ.

މި ސަރުކާރުގެ ބޯހިޔާވަހިކަމުގެ އުސޫލްތައް މިއަދު އާއްމުޮށްފައިވާއިރު، މިހާތަނަށް ބޯހިޔާވަހިކަމެއް ލިބިފައިނުވާ އާދައިގެ އާއިލާތަކަށް މަތިން ޕޮއިންޓް ސްކޯކުރެވޭގޮތަށް ވަނީ އުސޫލްތައް ފަހިކޮށްދީފައެވެ. އެގޮތުން އެންމެ ފާހަގަކޮށްލެވެނީ، މާލޭގައި ދިރިއުޅެމުންދާ ރައްޔިތުންނަށް ފްލެޓް ދޫކުރުމުގައި އެކުލަވާލާފައިވާ އުސޫލެވެ. 

މި އުސޫލުގެ ގޭބިސީގެ ޖުމްލަ އާމްދަނީއަށް ބަލާއިރު އެޕްލިކަންޓާ އެފަރާތުގެ ބެލުމުގެ ދަށުގައިވާ ކޮންމެ ފަރާތަކަށް މަހަކަށް އެވްރެޖްކޮށް ޖެހޭ އާމްދަނީ 15،000 ރުފިޔާއަށްވުރެ ދަށް ނަމަ 25 ޕޮއިންޓް ލިބެއެވެ. ގޭބިސީގެ ޖމްލަ އާމްދަނީ 15،001 ރުފިޔާއިން ފެށިގެން 30،000 ރުފިޔާ އާ ދެމެދު ނަމަ ލިބެނީ 15 ޕޮއިންޓެވެ. އަދި އެ އަދަދަށްވުރެ އާމްދަނީ މަތިވެއްޖެނަމަ 10 ޕޮއިންޓެވެ.

"ބޯހިޔާވަހިކަން އެންމެނަށް" ސިޔާސަތުގެ އުސޫލް އެކުލަވާލާފައިވާ ގޮތަށް ބަލާއިރު ކުރިން ފްލެޓެއް ލިބިފައިވާނަމަ، މި ސަރުކާރުން ކުރިއަށް ގެންދާ އައު ސްކީމްތަކަށް ކުރިމައްޗެއް ނުލެވެއެވެ. އެގޮތުން ފިރިމީހާ ނުވަތަ އަނބިމީހާއަށް މީގެ ކުރީން ބޯހިޔާވަހިކަމެއް ލިބިފައިވާނަމަ އައު ސްކީމްތަކަށް ކުރިމަތިނުލެވޭނެ ކަމަށް ވަނީ ކަނޑައަޅާފަ އެވެ. އަދި 400 އަކަފޫޓަށްވުރެ ބޮޑު ބަންޑާރަ ގޯއްޗެއް ނޫނީ އަމިއްލަ ބިން ނުވަތަ ގޯތިގެދޮރު މިލްކުވެފައިވާ މީހަކަށްވެސް ކުރިމަތިނުލެވޭނެ އެވެ.

ސަރުކާރުން ދޫކުރާ ގޯއްޗާއި ފްލެޓަށް ކުރިމަތިލާން ހުޅުވާލުމަށް ނިންމާފައިވަނީ އަންނަ އަހަރުގެ ޖެނުއަރީމަހުގެ 4 ވަނަ ދުވަހުން ފެށިގެން މާޗްމަހުގެ 3 ވަނަ ދުވަހުގެ ނިޔަލަށެވެ.