ތެލުލިފޮޅި ފެނުމުން އިންޑިޔާ މީހުން ކައިއުޅޭ ޕޫރީ ސިފަވި ނަމަވެސް، މިއީ އޭގެ ރަހަ އާއި ތައްޔާރުކުރާ ގޮތްވެސް ޕޫރީއާ ތަފާތު އެއްޗެކެވެ. ރާއްޖޭގައި މި ފޮޅި އާއްމުކޮށް އައްޑޫއަށް ނިސްބަތްކުރެވުނު ނަމަވެސް މިއީ މިހާރު ހުރިހާ ރަށެއްގެ މީހުންވެސް ހަދައި އުޅޭ އެއްޗެކޭ ބުނެވިދާނެއެވެ. މި ފޮޅި  ތަފާތު އެކި ބާވަތްތަކުގެ ރިހައާއި ފިހުނު ކުކުޅާއެކު ކާލަންވެސް ވަރަށް މީރުވާނެއެވެ. 

1/3 ޖޯޑު ދިޔާ ކިރު (ތާފަނާކޮށް) 

2 ސައި ސަމުސާ ލޮނު

2 ސައި ސަމުސާ އީސްޓް

1 ސައި ސަމުސާ ހަކުރު

2 1/2 ޖޯޑު ފުށް

2 މޭޒުމަތީ ސަމުސާ ހިކިކިރު

2 މޭޒުމަތީ ސަމުސާ މާޖިރިން

1 ބިސް

ތެޔޮ

1. ތާފަނާކޮށްހުރި ދިޔާ ކިރުގެ ތެރެއަށް ލޮނު، އީސްޓް އަދި ހަކުރު އަޅާލުމަށްފަހު 5 މިނެޓް ވަންދެން މަތިޖަހާފައި އީސްޓް އެކްޓިވޭޓް ކުރަން ބަހައްޓާށެވެ. އީސްޓް އެކްޓިވޭޓްވުމުން، މި މިކްސްޗާގެ މަތީގައި ކުދި ފޮނު ބޮކިތަކެއް ހުންނާނެއެވެ.

2. ފުށްކޮޅު ފުރާނާލުމަށްފަހު، އޭގެ ތެރެއަށްހިކިކިރާއި، މާޖިރިން އަދި ބިސް އަޅައި އެކުލަވާލާށެވެ.

3. ދެން،އީސްޓް މިކްސްޗާވެސް ފުށަށް އަޅައި ގާތްގަނޑަކަށް 5 މިނެޓް ވަރު ވަންދެން ރަނގަޅަށް މޮޑެލާށެވެ. އަތުގައި ފުށް ތަތްލަަވާނަމަ ތެޔޮ ފޮދެއް ހާކާލުމަށްފަހު މޮޑެމުންދާނީއެވެ.

4. ފުށްގަނޑު މޮޑެވުމުން ގާތްގަނޑަކަށް 1 ގަޑިއިރު ވާންދެން މަތި ބަންދުކޮށްލާފައި ބަހައްޓާށެވެ. މިވަގުތުގައި ފުށްގަނޑު ރަނގަޅަށް ފުފިލާނެއެވެ.

5. ފުށްގަނޑު ރަނގަޅަށް ފުފުމުން، ދެ މިނެޓް ވަންދެން މޮޑެލުމަށްފަހު، ތެލުލިފޮޅިހަދަން ބޭނުންވާ ސައިޒަށް ގުޅަޖަހާލާށެވެ. ދެން ރޮށި ދަމާއެތިން މާ ތުނި ނުވާނޭހެން ފޮޅިތައް ދަމާލާށެވެ.

6. ފޮލިތައް ދަމައި ނިމުމުން، ތެޔޮފޮދު ހޫނުކުރަން އުނދައި، ތެޔޮ ހޫނުވުމުން، ފަހަރަކުފޮޅިއެއް ތެލުލާލާށެވެ. ފޮޅި ތެލުލަންވާނީ މަޑު ގިނީގައެވެ. އަދި ތެލުލަމުންދާއިރު ދެ ފަރާތަށް ޖަހާލަމުން ދެ ފަރާތްވެސް ރީތިކޮށް ރޯފިލުވާލަންވާނެއެވެ.