މާލެ އަދި ހުޅުމާލެ ސަރަހައްދުތަކުގައި ގޭންގުތައް ހަދައިގެން އުޅޭ ވިޔާނުދާ މީހުން ހޯދުމަށް ފުލުހުން މިހާރު ފަށާފައިވާ އޮޕަރޭޝަނުގެ ދަށުން 576 ތަނެއް ބަލައި ފާސްކޮށްފިއެވެ.

އެކްސްގައި ކުރި ޕޯސްޓުގައިވާ ތަފާސްހިސާބުތަކަށް ބަލާއިރު، ގޭންގް ކްރައިމް ސަޕްރެޝަން ޑިޕާރޓްމަންޓުން ފާއިތުވި 48 ގަޑިއިރުގެ ތެރޭގައި 576 ސަރަހައްދެއް ބަލައިފާސްކޮށް، ފުލުހުން ވަނީ 108 އިންޓަރެކްޝަން ހަދާފައެވެ. މި މުއްދަތުގެ ތެރޭގައި 30 އުޅަނދެއް ޗެކްކޮށް 6 އުޅަނދު ޓޯކޮށްފައި ވެއެވެ.

މިދިޔަ 48 ގަޑިއިރުގެ ތެރޭގައި ފުލުހުން ވަނީ މާލެ އަދި  ހުޅުމާލޭގެ އެކި ހިސާބުތަކުގައި ޖުމްލަ 912 މިނެޓް ޕެޓްރޯލްކޮށްފައެވެ. އެއީ 15.2 ގަޑިއިރެވެ. 

ގޭންގް ކުށްތަކާ ބެހޭ ޤާނޫނުގެ ދަށުން މީގެ ކުރިންވެސް ފުލުހުން ވަނީ މިފަދަ އޮޕަރޭޝަންތައް ކުރިއަށްގެންގޮސްފައެވެ. އެގޮތުން ސެޕްޓެމްބަރުމަހުގެ ތެރޭގައި ހިންގި އޮޕަރޭޝަނުގައި ތޫނު ހަތިޔާރާއެކު މީހުންވެސް ވަނީ ހައްޔަރުކޮށްފައެވެ. 

ބޮޑެތި އަދަބުތަކެއް ލިބޭގޮތަށް ތަސްދީގުކޮށްފައިވާ ނުރައްކާތެރި ކުށްތަކާބެހޭ ޤާނޫނަށް އަމަލުކުރަން ފަށާފައިވަނީ އޮގަސްޓްމަހުގެ 25 ވަނަ ދުވަހެވެ. އައު ޤާނޫނު އެކުލަވާލާފައިވަނީ، ރާއްޖޭގައި ނުރައްކާތެރި އަދި އިންތިޒާމުވެގެން ހިންގާ ބޮޑެތި ކުށްކުރުން ހުއްޓުވުމަށް ތަންފީޒީ އިދާރާތަކަށް ބޮޑެތި ބާރުތަކެއް ލިބޭގޮތަށެވެ.

މި ގާނޫނުގެ ދަށުން ގޭންގްތަކާއި ގުޅިގެން، ނުވަތަ އެނޫން ބޮޑެތި ކުށްކުށަށް އަރައިގަނެގެން، ނުހައްގު މުއްސަނދިކަން ހޯދާފައިވާ މީހުންގެ މައްސަލަތައް ތަޙްޤީގުކޮށް، އެގޮތުން ހޯދާފައިވާ ފައިސާއާއި މުދާ ކޯޓު މެދުވެރިކޮށް ދައުލަތަށް ނެގިގެންދާއިރު، ކުޑަކުދިން ގޭންގްތަކާ ގުޅުމާ، ބޮޑެތި ކުށްތައް ކުރުމުގައި ބައިވެރިވުން ހުއްޓުވުމަށް ޚާއްޞަ ފިޔަވަޅުތަކެއް އެޅިގެންދެއެވެ. އެގޮތުން އުމުރުން 18 އަހަރު ނުވާ ކުއްޖަކަށް ވަޅިއެއް ވިއްކައިފިނަމަ 20 ހާސްރުފިޔާ އާއި އެއްލައްކަ ރުފިޔާއާ ދެމެދުގެ އަދަދަކުން ޖޫރިމަނާކުރެވެއެވެ.

ގޭންގު ޤާނޫނުގެ ދަށުން ގޭންގެއް އުފެއްދުމާއި ހިންގުމާއި އަދި ގްރޫޕަށް މީހުން ހޯދުންފަދަ އަމަލުތަކަށް ބޮޑެތި އަދަބުތަކެއް ވަނީ ކަނޑައެޅިފައެވެެ. މި ޤާނޫނުގެ ދަށުން ގޭންގަކުން ކުޑަކުއްޖަކު ކުށުގައި ބައިވެރިކޮށްފިނަމަ އެފަރާތެއް އުމުރަށް ޖަލަށްލައި، 2 ލައްކަ ރުފިޔާ އާއި 10 މިލިއަން ރުފިޔާ އާ ދޭތެރޭގެ އަދަދަކުން ޖޫރިމަނާކުރެވެއެވެ. އުމުރުން 18 އަހަރުން މަތީ މީހެއް ގޭންގަށް ވައްދައިފިކަން ސާބިތުވެއްޖެނަމަ، އެމީހަކަށް 20 އަހަރުގެ ޖަލުހުކުމަކާއެކު 7 މިލިއަން ރުފިޔާއަށްވުރެ ބޮޑުނުވާގޮތަށް ޖޫރިމަނާ ކުރެވެ