އިސްރާއީލުން ފަލަސްޠީނުގައި ހިންގަމުންދިޔަ ޤަތުލްޢާއްމު މެދުކަނޑާލި ކަމަށް އެމީހުން ބުނި ނަމަވެސް، މިދިޔަ ހޮނިހިރު ދުވަހުވެސް ޣައްޒާއަށް ވައިގެ ހަމަލާތަކެއް ދީ 24 މީހުން ޝަހީދުކޮށްލާފައިވާ ކަމަށް މީޑިއާ ރިޕޯޓްތައް ބުނެފިއެވެ. 

އެގޮތުން އިސްރާއީލުގެ އަސްކަރިއްޔާއިން ހޮނިހިރު ދުވަހު ޣައްޒާއަށް ވައިގެ ހަމަލާތަކެއް ދީފައިވާއިރު، މިއީ އޮކްޓޯބަރު 10 ގައި އަމަލުކުރަން ފެށުނު ޤަތުލްޢާއްމު ހުއްޓާލުމުގެ އެއްބަސްވުމާ ޚިލާފަށް އެމީހުން ދިން ފުރަތަމަ ހަމަލާ ނޫންކަން ފާހަގަކޮށްލަންޖެހެއެވެ.

އަދި ޣައްޒާގެ ސިއްޙީ އިދާރާތަކުން ރިޕޯޓުކޮށްފައިވާ ގޮތުގައި ހޮނިހިރު ދުވަހު ދެވުނު ހަމަލާތަކުގައި މަދުވެގެން 24 މީހުން ޝަހީދުވެފައިވާއިރު، 54 މީހުންނަށް ވަނީ އަނިޔާވެފައެވެ. ޝަހީދުވި މީހުންނާއި އަނިޔާވި މީހުންގެ ތެރޭގައި ކުޑަކުދިން ވެސް ހިމެނެއެވެ.

އިސްރާއީލުން ދިން މި ހަމަލާތަކުގެ ބަހަނާއެއް ކަމަށް އެމީހުން ދެއްކީ އެމީހުންގެ ސިފައިންނާ ދިމާކޮށް ހަމާސް އިން ބަޑިޖެހުމެވެ.

ހޮނިހިރު ދުވަހު ދިން ހަމަލާތަކުގެ ތެރެއިން އެއް ހަމަލާއެއް އަމާޒުކޮށްފައިވަނީ ޣައްޒާ ސިޓީގެ ރިމާލް ސަރަހައްދުގެ އުޅަނދަކަށެވެ. މި ހަމަލާގައި 11 ފަލަސްތީނު މީހުން ޝަހީދުވެ، 20 އަށްވުރެ ގިނަ މީހުންނަށް ވަނީ އަނިޔާވެފައެވެ. ޝަހީދުވި މީހުންނާއި އަނިޔާވި މީހުން އަލް-ޝިފާ ހޮސްޕިޓަލަށް ގެންގޮސްފައިވާއިރު، ހޮސްޕިޓަލުގެ ޑިރެކްޓަރު މުޙައްމަދު އަބޫ ސަލްމިޔާ ވިދާޅުވީ އަނިޔާވި މީހުންގެ ގިނަ މީހުންނަކީ ކުޑަކުދިން ކަމަށެވެ.

މީގެ އިތުރުން، ޣައްޒާގެ މެދުތެރޭގައި އޮންނަ އަލް-ޢައުދާ ހޮސްޕިޓަލާ ކައިރީގައި ހުރި ގެއަކަށް އަމާޒުކޮށް ދިން ހަމަލާއެއްގައި މަދުވެގެން ތިން މީހުން ޝަހީދުވެ 11 މީހުންނަށް އަނިޔާވެފައިވެއެވެ. އަދި ނުސައިރާތު ހިޖުރީ ކޭމްޕްގައި ހުރި ގެއަކަށް ދިން އެހެން ހަމަލާއެއްގައި ކުޑަކުއްޖަކު ވެސް ހިމެނޭ ގޮތަށް މަދުވެގެން ހަތް މީހުން ޝަހީދުވެ، 16 މީހުންނަށް އަނިޔާވެފައިވާ ކަމަށް ހޮސްޕިޓަލުން ވަނީ ހާމަކޮށްފައެވެ.

މީގެ އިތުރުން ޣައްޒާގެ މެދުތެރޭގައި އޮންނަ ދެއިރު އަލް-ބަލަހުގައި ހުރި ގެއަކަށް އަމާޒުކޮށް ދިން ހަމަލާއެއްގައި އަންހެނަކު ވެސް ހިމެނޭ ގޮތަށް ތިން މީހުން ޝަހީދުވެފައިވާ ކަމަށް އަލް-އަޤްޞާ ޝަހީދުންގެ ހޮސްޕިޓަލުން ބުނެއެވެ.

މިވީ 44 ދުވަސް ތެރޭގައި، ޣައްޒާ ޤަތުލްޢާއްމު ހުއްޓާލުމުގެ އެއްބަސްވުމާ އިސްރާއީލުން ވަނީ މަދުވެގެން 497 ފަހަރު ޚިލާފުވެފައި ކަމަށް ޣައްޒާ ސަރުކާރުގެ މީޑިއާ އޮފީހުން ބުނެފިއެވެ.

މި ހަމަލާތަކުގައި 342 އާންމު ރައްޔިތުން ޝަހީދުކޮށްލާފައިވާއިރު، މީގެ ތެރެއިން ގިނައީ ކުޑަކުދިންނާއި، އަންހެނުންނާއި، ދޮށީ އުމުރުގެ މީހުންނެވެ.

މީގެ އިތުރުން، އެއްބަސްވުމުގައި ލާޒިމުކޮށްފައިވާ ގޮތަށް، ޣައްޒާގެ ސުންނާފަތިކޮށްލާފައިވާ ސަރަހައްދުތަކަށް ބޮޑަށް ބޭނުންވެފައިވާ އެހީގެ ސާމާނާއި ބޭސްފަރުވާއަށް ބޭނުންވާ ތަކެތި ފުރިހަމައަށް އަދި މިނިވަންކަމާއެކު ވެއްދުމަށް އިސްރާއީލުން ދަނީ ބޮޑެތި ހުރަސްތައް އަޅަމުންނެވެ.