ޒުވާނުންގެ މުޒާހަރާގެ ދެ ބައިވެރީންނަށް ދައުވާ ނުކުރަން ނިންމައިފި
މި އަހަރުގެ މޭޑޭގައި މާލޭގައި ކުރިއަށްގެންދިޔަ މުޒާހަރާ ތެރޭގައި ޖިނާއީ ކުށުގެ ޢަމަލުތަކެއް ހިންގިކަމަށް ތުހުމަތުކުރެވޭ މައްސަލާގައި ދައުވާ އުފުލި ދެ މީހުންގެ މައްޗަށް ދައުވާ ނުކުރަން ނިންމައިފި އެވެ.
މި މައްސަލާގައި ދައުވާ އުފުލީ ނ. ކުޑަފަރީ، ބަގީޗާގެ، ޢަބްދުﷲ މަޙްޒޫމް މާޖިދުގެ މައްޗަށް ގައިގާ އަތްލުމުގެ ކުށުގެ ދަޢުވާ އަދި ކ. މާލެ މ. ހަސްތީ، ޢާއިޝަތު ޝިމަން އަޙްމަދުގެ މައްޗަށް ޤާނޫނު ތަންފީޛްކުރާ މުވައްޒަފެއްގެ މަސައްކަތަށް ޤަޞްދުގައި ހުރަސްއެޅުމުގެ ކުށުގެ ދަޢުވާ އެވެ.
އެ ދެ ދައުވާ އުފުލައި 25 ޖޫން 2025 ގައި ކްރިމިނަލް ކޯޓަށް ވަނީ ހުށައަޅާފަ އެވެ.
ޕީޖީ އޮފީހުން މިއަދު ބުނީ މި ދަޢުވާތައް މުރާޖަޢާކުރުމަށްފަހު، މި ދެ މީހުންގެ އިތުރު ކުށުގެ ރެކޯޑެއް ނެތަތީއާއި، މި މީހުންގެ ޢަމަލެއްގެ ސަބަބުން އެއްވެސް މީހަކަށް އަނިޔާއެއް ނުވަތަ މުދަލަކަށް ގެއްލުމެއް ލިބިފައިނުވާތީއާއި، މި ކުށަށް ޤާނޫނުގައި ކަނޑައެޅިފައިވާ އަދަބާއި، މައްސަލައިގެ ހާދިސާގެ ވަށައިގެންވާ އެންމެހައި ކަންކަމަށް ރިޢާޔަތްކޮށް، މި ދަޢުވާތައް އިތުރަށް ކުރިއަށް ނުގެންދިއުމަށް އެ އޮފީހުން ވަނީ ނިންމާފައި ކަމަށެވެ.
އިދިކޮޅު އެމްޑީޕީގެ ހަރަކާތްތަކުން ފެންނަ މި ދެ މީހުން ހައްޔަރުކޮށްގެން ޖަލުގައިވެސް ގެންގުޅުނެވެ.
Advertisement
This content is created and paid for by advertisers and does not involve Voice Journalists
