އިއްޔެ ބާކީވެފައި ހުންނަ ރޮށިންވެސް ވަރަށް ތަފާތު މީރު އެއްޗެހި ތައްޔާރު ކޮށްލެވޭނެއެވެ. އެ އުކާލުމުގެ ބަދަލުގައި މިފަދަ ރޯލް ކަހަލަ މޯރު އެއްޗެއް ހަދާލުމަކީ އިސްރާފް ކުރުމުން ދުރުހެލި ކޮށްދޭނެ ކަމެކެވެ. 

500 ގ ބޯންލެސް ކުކުޅު (ކިޔުބް ކޮށް ކޮށާފައި)

1 މޭޒުމަތީ ސަމުސާ އިނގުރު ލޮނުމެދު ޕޭސްޓް

1/4 ޖޯޑު ޔޯގަޓް

1 ސައި ސަމުސާ މުގުރި މިރުސް

1 ސައި ސަމުސާ މުގުރި އަސޭމިރުސް

1 ސައި ސަމުސާ މުގުރި ދިރި

1 ސައި ސަމުސާ ލޮނު

1 ލުނބޮލުގެ ހުތް

ރަތް ކުލައިގެ ކާކުލަ ކޮޅެއް (ބޭނުން ނަމަ) 

ކުކުޅު ކޮޅު ބޮޑު ތައްޓަކަށް އަޅާލުމަށްފަހު، ހުރިހާ ތަކެތި އެ ތައްޓަށް އަޅާލައި ރަނގަޅަށް އެކުލަވާލާށެވެ. 

ދެން 30 މިނެޓް ވަންދެން މެރިނޭޓްކޮށްލުމަށްފަހު ތަވައަކަށް ކުޑާ ތެޔޮފޮދެއް އެޅުމަށްފަހު ރޯފިލަންދެން ކުކުޅު ފްރައި ކޮށްލާށެވެ. 

ރޮށި

2 ބެލްޕެޕާ (ކިޔުބްކޮށް ކޮށްފައި)

ލެޓިޔުސް ފަތް (ކޮށަފައި) 

5 މޭޒުމަތީ ސަމްސާ މަޔޮނައިޒް

1 ލޮނުމެދު (ގާނާަފައި)

1 މޭޒުމަތީ ސަމުސާ ފްރައިޑް ޗިކަން ޗިލީ ސޯސް

ކުޑަ ލޮނު ކޮޅެއް

މޮޒެރެއްލާ ޗީޒް (ގާނާފައި)

މަޔޮނައިޒް، ގާނާފައި ހުރި ލޮނުމެދު ، ފްރައިޑް ޗިކަން ޗިލީ ސޯސް އަދި ލޮނު ތައްޓެއްގައި އެކުލަވާލައި ސޯސް ތައްޔާރު ކޮށްލާށެވެ. 

ދެން ރޮށީގައި ސޯސް އުނގުލާމުަށްފަހު ރޮށީގެ މެދަށް ކުކުޅު ކޮޅެއް އަޅާލާށެވެ. 

ކުކުޅުކޮޅު މައްޗަަށް ބެލް ޕެޕާ ކޮޅަކާ، ލެޓިޔުސް ފަތް ކޮޅެއް އަޅާލުމަށްފަހު، މައްޗަށް ޗީޒް އަޅާލާށެވެ. 

ދެން ރޮށީގެ ދެފަރާތުން ފޯލްޑް ކޮށްލައި ޝަވަރުމާއެއް ގޮތަށް ރޯލް ހަދާލާށެވެ. ބާކީ ރޮށިތައްވެސް މިގޮތަށް ތައްޔާރު ކޮށްލާށެވެ. 

އެއަށްފަހު ކުޑަ ތެޔޮ ފޮދެއް ތަވައަށް އަޅާލުމަށްފަހު ފޮޅިތަކުގެ ދެފަރާތް ކުޑަކޮށް ފްރައި ކޮށްލާށެވެ.