އިއްޔެ ދިވެއްސަކަށް ގެއްލުންވިކަމުގެ ރިޕޯޓެއް ނުލިބޭ: ލަންކާ ހައިކޮމިޝަން
އަވައްޓެރި ސްރީލަންކާއަށް މިހާރު ކުރަމުންދާ މޫސުމީ ވިއްސާރާގައި އިއްޔެ ދިވެއްސަކަށް ގެއްލުންވިކަމުގެ ރިޕޯޓެއް ލިބިފައިނުވާކަމަށް އެޤައުމުގައި ހުންނަ ދުިވެހި ހައިކޮމިޝަނުން ބުނެފިއެވެ.
ލަންކާއަށް ކުރަމުންދާ ވިއްސާރާގައި އިއްޔެ ނޫރަލިއާއަށް ދިޔަ ދިވެހި އާއިލާއެއް ގެއްލުނުކަމުގެ ހަބަރުތަކެއް މީޑިއާގައި ދައުރުވަމުްނދިޔައިރު، ފަހުން ވަނީ އެމީހުން ފެނުނުކަމަށް ރިޕޯޓްކޮށްފައެވެ. ނަމަވެސް ކަމާބެހޭ އެއްވެސް އިދާރާއަކުން އެކަން ކަށަވަރުކޮށްދީފައެއް ނުވެއެވެ.
ދައުލަތުގެ މީޑިއާ ޕީއެސްއެމަށް މައުލޫމާތު ހިއްސާކުރަމުން ލަންކާގައި ހުންނަ ރާއްޖޭގެ އެމްބަސީން ރޭ ބުނެފައިވަނީ ވިއްސާރާގައި ފެންބޮޑުވެ ދިވެއްސަކަށް ގެއްލުންވިކަމުގެ ރިޕޯޓެއް ލިބިފައިނުވާކަމަށެވެ. ނަމަވެސް ދިވެހިންގެ ހާލަތު ވަރަށް ގާތުން ބަލަމުންދާކަމަށް އެމްބަސީން ވަނީ ބުނެފައެވެ. އެގޮތުން އެހީތެރިކަން ބޭނުންނަމަ ގުޅޭނެ ހާއްސަ ހޮޓްލައިނެއް ވަނީ ގާއިމްކޮށްފައެވެ. އެގޮތުން އެހީތެރިކަމެއް ބޭނުންވެއްޖެނަމަ އެމްބަސީން ވަނީ 768816666 އަށް ގުޅުމަށް ވަނީ އެދިފައެވެ.
އެމްބަސީން ވަނީ ތޫފާން ޑިޓްވާހ ގެ ނުރައްކަލުން ރާއްކާތެރިވުމަށް މިވަގުތަށް ކޮންމެހެން ކުރަންޖެހޭ ދަތުރުތައް ނުކުރުމަށް ލަންކާގައި ތިބި ދިވެހިންނަށް އިލްތިމާސްކޮށްފައެވެ. އަދި ފެނާއި ކާބޯތަކެތީގެ އިތުރުން ބޭސްފަދަ ތަކެތި އަތުޖެހޭ ހިސާބުތަކުގައި ބަހައްޓައި، މޯބައިލްފޯން ޗާޖްކޮށް، ލިޔެކިޔުންތަކަށް ރައްކާތެރިވުމަށްވެސް ވަނީ އިލްތިމާސްކޮށްފައެވެ.
ސްރީލަންކާއަށް ކުރަމުންދާ ވިއްސާރައާއި އެރި ތޫފާނުގެ ސަބަބުން ބޯކޮށް ވާރޭވެހި ކޯރުތައް ބަންޑުންވެ، ގިނަ ސަރައްދުތަކެއްގެ ބިންގަނޑު ވަނީ ކަނޑައިގެންގޮސްފައެވެ. މިއީ މި ފަހުގެ ތާރީހެއްގައި އެޤައުމަށް ކުރިމަތިވި ގުދުރަތީ އެންމެ ގެއްލުންބޮޑު ކާރިސާއަށް ވާނޭކަމަށް އެޤައުމުގެ ކަމާބެހޭ އިދާރާތަކުން ބުނެއެވެ.
Advertisement
This content is created and paid for by advertisers and does not involve Voice Journalists
