ބިދޭސީންގެ ނަމުގައި އުޅަނދު ރެޖިސްޓްރީ ކުރުމުގެ ހިދުމަތް ޓްރާންސްޕޯޓް މިނިސްޓްރީން މެދުކަނޑާލައިފި އެވެ.
ޓްރާންސްޕޯޓު މިނިސްޓަރު މުހައްމަދު އަމީން މިއަދު 'އެކްސް'ގައި ކުރެއްވި ޕޯސްޓެއްގައި ވިދާޅުވީ ރާއްޖޭގެ އެކި ސަރަހައްދުތަކުގައި، ޚާއްސަކޮށް މާލޭ ސަރަހައްދުގައި އެއްގަމު އުޅަނދުތައް ގިނަވެ، ތޮއްޖެހުމުގެ މައްސަލަ ހައްލުކުރުމަށްޓަކައި، އެއްގަމު ދަތުރުފަތުރުގެ ޤާނޫނާއި ޤަވާއިދުތަކަށް ގެންނަންޖެހޭ ބަދަލުތައް ގެނެސް އިސްލާހުކުރުމުގެ މަސައްކަތްތައް ކުރިއަށްދާ ކަމަށެވެ.
އެހެންކަމުން، ބިދޭސީންގެ ނަމުގައި އުޅަނދު ރަޖިސްޓަރީ ކުރުމުގެ ޚިދުމަތް ވަނީ މިވަގުތައް ހުއްޓާލެވިފައިވާ ކަމަށެވެ.
މިނިސްޓަރު މިހެން ވިދާޅުވެފައިވާއިރު މިހާރު އަމަލުކުރަމުންދާ އެއްގަމު ދަތުރުފަތުރުގެ ގާނޫނުގެ ބަދަލުގައި މުޅިން އާ ބިލެއް ރައްޔިތުންގެ މަޖިލީހަށް ސަރުކާރުގެ ފަރާތުން ވަނީ ހުށަހަޅައިފަ އެވެ.
އެގޮތުން، ސަރުކާރުގެ ފަރާތުން އެއްގަމު ދަތުރުފަތުރު ކުރުމާބެހޭ މި ބިލު ހުށަހެޅުއްވީ ކުރެންދޫ ދާއިރާގެ މެންބަރު މުހައްމަދު ޝާމިން ހަބީބެވެ.
މި އައު ބިލުގައި، ގާނޫނާ ޚިލާފުވާ ފަރާތްތައް ބޮޑެތި އަދަދުތަކުން ޖޫރިމަނާ ކުރުމަށް ހިމަނާފައިވެއެވެ. އަދި ބިދޭސީންނަށް ލައިސެންސް ދިނުމުގައި ޢަމަލުކުރާނެ ގޮތްތައް ހިމަނާފައިވެއެވެ.
Advertisement
This content is created and paid for by advertisers and does not involve Voice Journalists
