އަވައްޓެރި ސްރީލަންކާއަށް އެރި ބާރުގަދަ ތޫފާނާއި އަދި ބޯކޮށް ވާރޭވެހި ފެންބޮޑުވުމުގެ ސަބަބުން އެޤައުމަށް ކުރިމަތިވި ގެއްލުންތަކުން އަރައިގަތުމަށް ދިވެހިރާއްޖެއިން އެހީގެ ގޮތުގައި ދިނުމަށް ނިންމި 50،000 ޑޮލަރު، ލަންކާ ސަރުކާރާ މިއަދު ހަވާލުކޮށްފިއެވެ.

ދިވެހި ސަރުކާރުން އެހީގެ ގޮތުގައި 50،000 ޑޮލަރާއި 25،000 މަސްދަޅުކޭސް ލަންކާއަށް ހަދިޔާކުރުމަށް ނިންމީ މިދިޔަ ނޮވެމްބަރުމަހުގެ 29 ވަނަ ދުވަހުއެވެ.

ސަރުކާރުން ދޭން ނިންމި 50،000 ޑޮލަރު ލަންކާއާ ހަވާލުކުރުން އޮތީ މިއަދު ލަންކާގެ ފޮރިން މިނިސްޓްރީގައި ބޭއްވި  ރަސްމިއްޔާތެއްގައެވެ. ލަންކާ ސަރުކާރުގެ ފަރާތުން އެހީއާ ހަވާލުވެލެއްވީ ފޮރިން މިނިސްޓަރު ވިޖިތާ ހެރަތުއާ އެވެ. ދިވެހި ސަރުކާރުގެ ފަރާތުން އެހީ ހަވާލު ކޮށްދެއްވީ އެ ގައުމުގައި ހުންނަވާ ރާއްޖޭގެ ސަފީރު މަސްއޫދު އިމާދެވެ.

ދިވެހި ސަރުކާރުން ބުނެފައިވަނީ އެ އެހީއަކީ "ދިޓްވާ" ތޫފާންގެ ސަބަބުން ސްރީލަންކާ ގެ އެކި ހިސާބުތަކަށް ބޯކޮށް ވާރޭވެހި ރައްޔިތުންނަށް ލިބިފައިވާ ގެއްލުންތަކާއި ދަތިތަކުން އަރައިގަތުމަށް އެ ޤައުމަށް އެހީތެރިވުމުގެ ގޮތުން ދިނުމަށް ނިންމި އެހީއެއްކަމަށެވެ.

ލަންކާ ސަރުކާރަށް ފައިސާގެ އެހީގެ އިތުރުން ހަދިޔާކުރާ މަސްދަޅުކޭސް ޝިޕްމަންޓް ހިފައިގެން އެސްޓީއޯގެ ބޯޓު ވަނީ ލަންކާއަށް ދިއުމަށް ފުރާފައެވެ.