ދިވެހިންގެ ފަރާތުން އަވަށްޓެރި ސްރީލަންކާގެ ރައްޔިތުންނަށް ވެދިން ދީލަތި އެހީއަށް ޝުކުރު އަދާކުރުމުގެ ގޮތުން ރާއްޖޭގައި ދިރިއުޅޭ ލަންކާގެ ރައްޔިތުން ބޮޑު އެއްވުމެއް ބާއްވަން ނިންމައިފިއެވެ. 

މިކަން އިއުލާންކޮށް ކޮށްފައިވާ ޕޯސްޓަރުގައިވާގޮތުން މި އެއްވުން އޮންނާނީ މިއަދު ހަވީރު 5:00 ގައި ވިލާ ކޮލެޖާއި ސްވިމިންގ ޓްރެކާ ދެމެދުގައި އޮންނަ ސަރަހައްދުގައެވެ.

އެ ޕޯސްޓަރުގައިވަނީ، ދިވެހިންގެ ފަރާތުން ދެއްކި ހިތްހެޔޮކަމަށް ޝުކުރު އަދާކޮށްފައެވެ. އަދި އެކަން ދުވަހަކުވެސް ހަނދާނުން ނުފިލާނެ ކަމަށް ބުނެފައިވެއެވެ. 

އަވައްޓެރި ސްރީލަންކާއަށް އެރި ތޫފާން ދިތުވާގައި ބޯކޮށް ވާރޭ ވެހި އެޤައުމުގެ އެކި އަވަށްތަކަށް ވަނީ ބޮޑެތި ގެއްލުންތަކެއް ލިބިފައެވެ. ލަންކާއަށް ލިބިގެންދިޔަ ގެއްލުންތަކަށް އެހީވުމުގެ ގޮތުން އެހީވުމުގެ މަސައްކަތް ރައްޖެއިން ވަގުތުން ފެށިއިރު، ދިވެހި ސަރުކާރުންނާއި މީޑިއާތައް ގުޅިގެން ވަނީ އެޤައުމަށް އެހީވުމަށް ހަރަކާތްތަކެއް ކުރިއަށްގެންގޮސްފައެވެ.

އެގޮތުން، ސްރީލަންކާއަށް އެހީވުމަށް ދިވެހި މީޑިއާތަކުން ހިންގި ތެލެތޯނަށް ރާއްޖޭގެ ރައްޔިތުންނާއި ކުންފުނިތަކުން ވަނީ 11،553،291.10 ދިވެހި ރުފިޔާ އާއި 51،088.31 ޑޮލަރުގެ އިތުރުން 20 ޔޫރޯ ހަދިޔާކޮށްފައެވެ.

މީގެ އިތުރުން، ސަރުކާރުން ވަނީ 50،000 ޑޮލަރާއި 25،000 މަސްދަޅުކޭސް ހަދިޔާކޮށްފައެވެ.