އިންޑިޔާގެ ގޯވާގައި، ނާޗަރަންގީ ކުޅެން ހަދާފައި ހުންނަ ނައިޓް ކްލަބެއްގައި އަލިފާނުގެ ހާދިސާއެއް ހިނގައި، މަދުވެގެން 25 މީހުން މަރުވެއްޖެއެވެ.
މި ހާދިސާ ހިނގާފައިވަނީ އެ ނައިޓް ކްލަބުގެ ބަދިގޭގައި ހުރި ގޭސް ސިލިންޑަރެއް ގޮވައިގެން ކަމަށް ބެލެވޭ ކަމަށް އޮފިޝަލުން އާދީއްތަ ދުވަހު ބުނެފައިވެއެވެ.
މި ހާދިސާ ހިނގާފައިވަނީ ނޯތު ގޯވާގެ އަރްޕޯރާގައި ހުންނަ، ގޯވާގެ އެންމެ މަޝްހޫރު ބީޗް ޑެސްޓިނޭޝަންތަކުގެ ތެރޭގައި ހިމެނޭ ބާގާގައި ހުންނަ 'ބާޗް ބައި ރޯމިއޯ ލޭން' ކްލަބުގައެވެ. އަލިފާން ރޯވެފައިވަނީ ހޮނިހިރު ދުވަހުގެ ރޭ މެންދަމު އެހާކަށް ހާއިރު ކަމަށްވާއިރު، ވަރަށް ހަލުވިކަމާއެކު މުޅި ތަނަށް އަލިފާންގަނޑު ވަނީ ފެތުރިފައެވެ.
ގޯވާގެ ޑިރެކްޓަރ ޖެނެރަލް އޮފް ޕޮލިސް، ޝްރީ އަލޯކް ކުމާރު ބުނީ، އަލިފާންގަނޑު މައިގަނޑު ގޮތެއްގައި ފެތުރިގެން ދިޔައީ ގްރައުންޑް ފްލޯގައި ހުރި ބަދިގެ ސަރަހައްދުގައި ކަމަށެވެ. އަދި އަލިފާން ރޯވީ މެންދަމު އެހާކަށް ހާއިރު ކަމަށާ ބަދިގެއާއި ބަދިގެ ކައިރިން މަރުވެފައި ތިބި މީހުން ހަށިގަނޑުތައް ފެނިފައިވާ ކަމަށްވެސް ބުންޏެވެ. އެހެންކަމުން، މަރުވި ގިނަ މީހުންނަކީ ކްލަބުގެ މުވައްޒަފުން ކަމަށް ބެލެވޭ ކަމަށް ކުމާރު ބުންޏެވެ.
ގޯވާގެ ޗީފް މިނިސްޓަރ ޕްރަމޯދު ސާވަންތު ބުނީ، މަރުވި މީހުންގެ ތެރެއިން ތިން މީހުން މަރުވީ ފިހިގެން ކަމަށާއި، އަނެއް ބަޔަކު މަރުވީ ދުމުގެ ސަބަބުން ނޭވާ ހާސްވެގެން ކަމަށެވެ. އަދި މަރުވި މީހުންގެ ތެރޭގައި "ތިން ނުވަތަ ހަތަރު" ފަތުރުވެރިން ހިމެނޭ ކަމަށް ވިދާޅުވި ނަމަވެސް، އެމީހުންގެ އުމުރާއި ގައުމިއްޔަތު އަދި ނޭނގޭ ކަމަށް ސާވަންތު ބުނެފައިވެއެވެ.
ޗީފް މިނިސްޓަރ ސާވަންތު އިތުރަށް ބުނީ، މި ހާދިސާއާ ގުޅިގެން ރަސްމީ ތަހުގީގެއް ފަށާފައިވާ ކަމަށާއި، މިކަމަށް ތުހުމަތުވާ ފަރާތްތަކާމެދު ހަރުކަށި ފިޔަވަޅު އަޅާނެ ކަމަށެވެ.
Advertisement
This content is created and paid for by advertisers and does not involve Voice Journalists
