ފަލަސްތީނުގެ ބިން ފޭރިގެން ދިރިއުޅެމުންދާ އިޒްރޭލްގެ ބޮޑުވަޒީރު ބެންޖަމިން ނަތަންޔާހޫ، އިންޑިއާގެ ބޮޑުވަޒީރު މޯދީއަށް ގުޅައި ގިނަ މަޝްވަރާތަކެއް ކޮށްފިއެވެ.

ނަތަންޔާހޫގެ ކޯލްއާ ގުޅިގެން އިންޑިޔާ ސަރުކާރުން ނެރުނު ބަޔާނުގަައި ބުނީ، އެ ގުޅައިގެން ނަތަންޔާހޫ ދައްކާފައިވަނީ އިސްރާއިލާ އިންޑިޔާއާ ދެމެދުގައި އޮތް ގުޅުމުގެ ސަބަބުން ލިބެމުންދާ ކުރިއެރުންތަކާއި އެ ގުޅުން އިތުރަށް ބަދަހިކޮށް ވަރުގަދަ ކުރުމުގެ ވާހަކަ ކަމަށެވެ.

މީގެ އިތުރުން، ހުރިހާ ބާވަތެއް ޓެރަރިޒަމްގެ ޢަމަލުތަކެއް ކުށްވެރިކުރި ކަމަށާ، ޓެރަރިޒަމަށް އެއްވެސް މިންވަރަކަށް ޖާގަ ނުދޭނެކަމަށް މޯދީއާއި ނަތަންޔާހޫވެސް ބުނި ކަމަށް އެ ބަޔާނުގައިވެއެވެ.

އަދި ހަމައެހެންމެ ހުޅަނގު އޭޝިއާ ސަރަހައްދުގެ މިހާރުގެ ހާލަތާ ގުޅޭގޮތުން ޚިޔާލު ބަދަލުކޮށް، އެ ސަރަހައްދަށް އިންސާފުވެރި އަދި ދެމެހެއްޓެނިވި ސުލްހައެއް ގެނައުމަށް ކުރެވޭ މަސައްކަތްތަކަށް އެއްބާރުލުންދޭނެ ކަމަށާ، ޚާއްސަކޮށް ޣައްޒާގެ ކަންކަމުގައި އެއްބާރުލުންދޭނެ ކަމަށް މޯދީ ބުނި ކަމަށްވެސް ބަޔާނުގައިވެއެވެ.

މި ފޯންކޯލާ ގުޅޭގޮތުން މޯދީ، އޭނާގެ އެކްސް އެކައުންޓުގައި ކުރި ޕޯސްޓެއްގައިވެސް ވަނީ، އޭނާގެ އެކުވެރި ނަތަންޔާހޫގެ ފޯން ކޯލްގައި ސީދާކޮށް ނުވަތަ ނުސީދާކޮށްވެސް ޓެރަރިޒަމް ތަހައްމަލު ނުކުރުމަށް ދެމީހުން އެއްބަސްވިކަމަށް ބުނެފައެވެ. 

މޯދީއާ ނަތަންޔާހޫ ޓެރަރިޒަމް އަށް ޖާގަނުދޭނެ ކަމަށް ބުނެ ވާހަކަދައްކާއިރު، އިންޑިޔާގެ މުސްލިމުންގެ ގެދޮރު ސުންނާފަތިކޮށް، މިސްކިތްތައް ހަލާކޮށް، މުސްލިމުންނަށް އަނިޔާވެރިވެ ޓެރަރިޒަމްގެ އެންމެ ގިނަ ޢަމަލުތައް ކުރި އެއް ބޮޑުވަޒީރަކީ މޯދީކަން ފާހަގަކޮށްލަންޖެހެއެވެ. 

އަދި ނަތަންޔާހޫ އަކީ މި ފަހުގެ ތާރީޚްގައިވެސް، ހިންގަމުންދާ އެންމެ ބޮޑު ޤަތުލްޢާއްމުގެ މޭސްތިރިއެވެ. އެގޮތުން އޭނާ އަންގައިގެން ފަލަސްތީނުގެ ނަސްލުވެސް ނައްތާލުމަށް ކުރަމުންދާ މަސައްކަތުގެ ތެރެއިން ފާއިތުވެދިޔަ ދެ އަހަރުތެރޭ 70،000 އަށްވުރެ ގިނަ މުސްލިމުން ވަނީ ޝަހީދުކޮށްލާފައެވެ. އަދި ޣައްޒާގެ ދިރިތިބީންނާ މެދުވެސް ހިންގާފައިވާ ޓެރަރިޒަމްގެ ޢަމަލުތަކަކީ ކިޔައި ކޮޅުންލާނެ ޢަމަލުތަކެއް ނޫނެވެ.