ހުކުރު ދުވަހު މެންދުރު ކުކުޅާއެކު ކާލާނެ މީރު ބަތްގަނޑަކާ މެދުވެސް ބައެއް ފަހަރު ވިސްނާލަން އިންނަން ޖެހި އެކަމަށްވެސް ބޭކާރު ގޮތުގައި ވަގުތު ހޭދަކުރަންޖެހޭ ފަހަރު އާދެއެވެ. އެހެންކަމުން މިފަހަރު މި ގެނެސްދެނީ މީރު ބަތްގަނޑެއްގެ ރެސިޕީއެވެ. މިއީ ކުކުޅު ރިހަ، ޗިލީ ޗިކަން، ފިހުނު ކުކުޅު، ޗިލީ ފިޝް ފަދަ ގިނަ ބާވަތްތަކާއެކު ކާލަން ވަރަށް މީރު ތައްޔާރުކޮށްލަން ފަސޭހަ ބަތެކެވެ.

ބޭނުންވާ ތަކެތި

2 ޖޯޑު ބާސްމަތީ ހަނޑޫ

1 ޖޯޑު ކެޝޫނަޓް

1/2 ޖޯޑު ހިކިމޭބިސްކަދުރު

1 ޖޯޑު ލީކްސް (ތުނިކޮށް ކޮށާފައި)

1 ކުޑަ ފިޔާ (ތުނިކޮށް ކޮށާފައި)

4 ލޮނުމެދު (ޗޮޕް ކޮށްފައި) 

އޮލިވް އޮއިލް

1/2 ސައިސަމުސާ ސޯޔާ ސޯސް

ލޮނު

ފެން

1) ބާސްމަތީ ހަނޑޫ ދޮވެލުމަށްފަހު ތެލާއި ލޮނާއި ފެންފޮދެއްގައި ބަތް ކައްކާލާށެވެ. ފެން އަޅާނީ ޗަސް ނުވެ ބަތް ހިކިކޮށް ހުންނަ ވަރަށެވެ. ބަތް ކެކުމުން ޓްރޭއެއްގައި ފަތުރާލާފައި ބަހައްޓާށެވެ. 

2) ދެން، ތެއްޔަކަށް ކުޑަ ތެޔޮފޮދެއް (ގާތްގަނޑަކަށް 1/4 ޖޯޑު) އެޅުމަށްފަހު، މަޑު ގިނީގައި ބަހައްޓައި ތެޔޮ ހޫނު ވުމުން ކެޝޫނަޓް އަޅައި އެ ތެލުލާލާށެވެ. ދެން އެ ނެގުމަށްފަހު ހިކިމޭބިސްކަދުރުކޮޅު އަޅައިގެން އެވެސް ތެލުލާލާށެވެ. (ނަޓް ތެލުލާއިރު ރަނގަޅަށް ހަލުވައި، އެނދިޔަނުދީ ތެލުލާލަން ސަމާލުކަންދޭން ވާނެއެވެ) 

3) ހިކިމޭބިސްކަދުރު ތެލުލެވުމުން އެވެސް ނެގުމަށްފަހު، ތެޔޮ މާ ގިނަ ނަމަ، ތެޔޮވެސް މަދުކޮށްލުމަށްފަހު، ނަޓް ތެލުލި ތެޔޮފޮދުގެ ތެރެއަށް ލީކްސްކޮޅު އަޅާލާށެވެ. ލީކްސް މޯޅި ވުމުން ފިޔާ، ލޮނުމެދު އަދި ކުޑަ ލޮނުކޮޅެއް އަޅާލައިގެން ރަނގަޅަށް ކައްކާލާށެވެ.  

4) ފިޔާކޮޅަށް ކުޑަކޮށް މުށި ކުލަ އަރަންފެށުމުން ސޯޔާ ސޯސްފޮދު އަޅާލައި، ނަޓްކޮޅުވެސް އަޅާލައި އެކުލަވާލާށެވެ. 

5) ދެން ކެއްކި ބާސްމަތީ ބަތް ތެއްޔަށް އަޅައި ރަނގަޅަށް އެކުލަވާލާށެވެ.