ދިވެހި ފުލުހުންގެ ޚިދުމަތާ ގުޅޭ ފުލުހުންނަށް ކުރިއަށްގެންދާ އަސާސީ ތަމްރީން ކޯހުގެ 41ވަނަ ބެޗުގެ ކިޔެވުން ނިންމައި ޝަރަފުގެ ހިނގާލުން ބާއްވައިފިއެވެ.

ރޭ ބޭއްވުނު މި ރަސްމިއްޔާތު ޝަރަފުވެރިކޮށްދެއްވީ ދާޚިލީ ސަލާމަތާއި ފަންނިއްޔާތާބެހޭ ވަޒީރު އަލީ އިޙްސާނެވެ. މި ރަސްމިއްޔާތުގައި ވަޒީރުގެ އިތުރުން ކޮމިޝަނަރ އޮފް ޕޮލިސް އިސްމާޢިލް ނާވީނާއި، ބޭރުގެ ސަފީރުންނާއި، ފުލުހުންގެ މުއައްސަސާގެ އިސްވެރިން ބައިވެރިވެވަޑައިގެންނެވިއެވެ.

މިދިޔަ އޯގަސްޓް މަހު އައްޑޫ ސިޓީގައި ހުންނަ ނޭޝަނަލް ކޮލެޖް އޮފް ޕޮލިސިންގ އެންޑް ލޯ އެންފޯސްމަންޓުގެ މަރުކަޒުގައި ފެށި މި ކޯހުގައި 210 ފުލުހުން ބައިވެރިވި ނަމަވެސް ކޯސް ފުރިހަމަ ކުރީ 185 ދަރިވަރުންނެވެ. އެއީ ތެރޭގައި ހިމެނެނީ 107 ފިރިހެން ފުލުހުންނާއި 78 އަންހެން ފުލުހުންނެވެ.

ރޭގެ ރަސްމިއްތުގައި ވަނީ އެކި ގޮތްގޮތުން ވަނަވަނައަށް އައި ދަރިވަރުންނާ ސްކޮޑްތައް ހޮވާފައެވެ. އެގޮތުން ހޮވުނު ދަރިވަރުންނަކީ؛

ހުރިހާގޮތަކުން އެންމެ މޮޅު ދަރިވަރު: ގއ، ގެމަނަފުށީ އުމުރުން 22 އަހަރުގެ އިމްޝާ ޢަބްދުއްލަތީފު.

ކޯހުގެ އިންޑޯ މާއްދާތަކުން އެންމެ މޮޅު ދަރިވަރު: ސަރޖެންޓް މަރިޔަމް ލުއުލުއާ މުޙައްމަދު

އައުޓްޑޯ މާއްދާތަކުން އެއްވަނަ: ކޮންސްޓަބަލް އަލްޔާ އަހުމަދު.

ސްކޮޑްތަކުގެ ތެރެއިން އެންމެ ރަނގަޅު ސްކޮޑް: އައިނެއްލާ ސްކޮޑް.

އައިނެއްލާ ސްކޮޑްގެ އެންމެ މޮޅު ދަރިވަރު: އާމިނަތު ސަމްރާ

އަންބަރީ ސްކޮޑްގެ އެންމެ މޮޅު ދަރިވަރު: ކޮންސްޓެބަލް އަނަސް މުޙައްމަދު ޤާސިމް

ބީފާން ސްކޮޑްގެ އެންމެ މޮޅު ދަރިވަރު: ސަރޖަންޓް މަރިޔަމް ލާޝާ އާދަމް

ހާޖީ ސްކޮޑްގެ އެންމެ މޮޅު ދަރިވަރު: ސަރޖަންޓް މަރިޔަމް ލުއުލުއާ މުޙައްމަދު

ރަންވިއްކާ ސްކޮޑްގެ އެންމެ މޮޅު ދަރިވަރު: އިމްޝާ އަބްދުއްލަތީފް

ފުލުހުންގެ އަސާސީ ތަމްރީނު ކޯހަކީ ކޮންމެ ފުލުހަކުވެސް ފުރިހަމަ ކުރަންޖެހޭ ކޯހެކެވެ. މި ކޯހުގައި ފިޒިކަލް ޓްރެއިނިންގ، އޮޕަރޭޝަނަލް ސޭފްޓީ އެންޑް ޓެކްޓިކްސް އަދި ޤާނޫނާއި ގަވާއިދުތަކުގެ އިތުރުން ފުލުހުންގެ މަސައްކަތްތަކާ ގުޅުންހުރި ބައިތައް ކިޔަވައިދެއެވެ.