އިހްސާންގެ ނަޞޭހަތެއް ފުލުހުންނަށް: މީހުން ފައިސާ ބަހާނެ؛ ނަމަވެސް ކޮރަޕްޝަންގެ ބަލިމަޑުކަމުގައި ނުޖެހޭތި
ފުލުހެއްގެ ވަޒީފާ އަދާކުރަމުންދާއިރު ތަފާތު އެކި ގޮންޖެހުންތަކާއި ކުރިމަތިލާންޖެހޭނެ ކަމަށާ، އެހެން ނަމަވެސް، ފުލުހުން މަސައްކަތް ކުރަންވާނީ އެކަންކަމަށް ބެލުމެއް ނެތި، އެމީހުންގެ ޒިންމާ ފުރިހަމަގޮތުގައި އަދާކުރުމަށް ކަމަށް ދާޚިލީ ސަލާމަތާ ބެހޭ ވަޒީރު ޢަލީ އިހްސާން ވިދާޅުވެއްޖެއެވެ.
41ވަނަ ފުލުހުންގެ އަސާސީ ތަމްރީން ޕްރޮގްރާމް ނިންމި ދަރިވަރުންގެ ދަސްވެނިވި ރަސްމިއްޔާތުގައި ވާހަކަދައްކަވަމުން އިހްސާން ވިދާޅުވީ، ފުލުހުންގެ ތަމްރީނު ހަދައިގެން ނުކުންނަށް ފުލުހުންނަށް ޚާއްސަ މިޝަން ސެޓްތަކެއް ހަވާލުވެފައިވާ ކަމަށެވެ.
އެ މަސައްކަތް ތަކަކީ ދިވެހިރާއްޖެއިން ޑްރަގުގެ ވަބާ އެއްކޮށް ނައްތާލުން. ރާއްޖޭގައި ގޭންގު ހަދައިގެން ކުށްކުރަމުން އަންނަ ގްރޫޕްތައް އެއްކޮށް ގާނޫނުގެ ކުރިމައްޗަށް ގެނައުމާ، އެމީހުންގެ ފަރާތުން މުޖުތަމަޢު ސަލާމަތް ކުރުމާ، ރާއްޖޭގައި ގަވާއިދާ ޚިލާފަށް އުޅެމުންދާ ބިދޭސީންގެ މައްސަލަ އެއްކޮށް ހައްލުކުރުމާ، ކުށުގެ މާހަލުގައި އުޅެމުންދާ ކުދިން، ކުށުގެ މާހައުލުން ނެރެ، ކުދިންނަށް ބޭނުންވާ ތަމްރީނާ އިންޓެވެންޝަން ޕްރޮގްރާމްތައް ހިންގައި ކުށުގެ މާހައުލުތައް އެއްކޮށް ނައްތާލުން.
ވަޒީރު ޢަލީ އިހްސާން
އިހްސާން ވަނީ އެ މިޝަންތައް ހާސިލް ކުރުމަށް ހުރިހާ ފުލުހުން ކެނޑިނޭޅި މަސައްކަތް ކުރުމަށް ނަޞޭހަތްތެރިވެފައެވެ.
މީގެ އިތުރުން އިހްސާން ވިދާޅުވީ، ދިވެހިރައްޔިތުން ފުލުހުންގެ ކިބައިން އެދެނީ ދިވެހި މުޖުތަމަޢު %100 ކުށުގެ ވެށިން ސަލާމަތްވެފައިވާ މުޖުތަމަޢުއަކަށް ހެދުމަށް ކަމަށެވެ.
ދިވެހިރައްޔިތުން އެދެނީ 100 ޕަސެންޓް ރާއްޖޭގެ ސަލާމަތާ ރައްކާތެރިކަން ކަށަވަރުވެފައި އޮތުން. ރައްޔިތުން އެދެނީ ރާއްޖޭގެ ކޮންމެ މަގަކީ، ކޮންމެ ގޯޅިގަނޑަކީ، ކޮންމެ ރަށަކީ، ކޮންމެ އަނދިރި ހިސާބަކީ ރައްކާތެރިކަން ކަށަވެފައި އޮތް، އެމީހުންނަށް ހިނގާ ބިނގާވެ އުޅެވޭ، ސަލާމަތާ ރައްކާތެރިކަން އިހްސާސްކުރެވޭ، މާހައުލެއް އޮތްތަނަކަށް ރާއްޖެވުން.
ވަޒީރު ޢަލީ އިހްސާން
ވަޒީރު ވިދާޅުވީ، ކޮންމެ ފުލުހަކުވެސް މަސައްކަތް ކިރަންވީ ރައްޔިތުން ފުލުހުންގެ ކިބައިން އެ އެދޭ، ކަންކަން ހާސިލްކޮށްދިނުމަށް ކަމަށެވެ. އަދި އެކަން ކުރަމުންދާއިރު ނުރައްކާތެރި މާޙައުލުތަކުގައިވެސް ފުލުހުން ހަރަކާތްތެރިވާންޖެހޭނެކަމަށެވެ. ނަމަވެސް މިއިން ކޮންމެ މަސައްކަތަކީ، ރައްޔިތު މީހާއަށް ރައްކާތެރި މާޙައުލެއްކަމުގެ އިޙުސާސުކޮށްދިނުމަށް އަދާކުރާ ޤައުމީ ވާޖިބެއްކަން އިހްސާން ހަނދާންކޮށްދިނެވެ.
"މި މާހައުލުގައި ކޮރަޕްޝަން އެބަ އޮތް. މީހުން ފައިސާ ބަހާނެ. ފައިސާ ދިއްކުރާނެ. މީހުން މަގާމުގެ ކުރިއެރުމަށް ޕްރޮމިސް ކުރާނެ. އުފާވެރި ދިރިއުޅުމާ ދަތުރުތަކަށް ޕްރޮމިސް ކުރާނެ. އެހެން ނަމަވެސް ތިޔަ ތިއްބެވި ސާބިތުކަން ދުއްވާލައިގެން ނުވާނެ…މިފަދަ ބަލިމަޑުކަމެއްގައި ނުޖެހުމަށް ނަސޭހަތްތެރިވަން." ވަޒީރު ވިދާޅުވިއެވެ.
އިހްސާން ވިދާޅުވީ ފުލުހުންގެ މުވައްސަސާގައި ކޮރަޕްޝަންއަށް އެއްވެސް ޖާގައެއް ނުދެވޭނެ ކަމަށާ، ފުލުހުންވެސް މަސައްކަތް ކުރަންވާނީ އޭގައި ނުޖެހުމަށް ކަމަށާ، އެގޮތުގައި މަސައްކަތް ކުރުމުން ރައްޔޮތުން އެދޭފަދަ ރާއްޖެއެއް އުފެދިގެންދާނެ ކަމަށެވެ.
Advertisement
This content is created and paid for by advertisers and does not involve Voice Journalists
