ފުލުހުންގެ ޔުނީފޯމުގެ ގަދަރުކުޑަވާފަދަ އެއްވެސް ކަމެއް ނުކުރުމަށް ކޮމިޝަނަރ އޮފް ޕޮލިސް އިސްމާއިލް ނަވީން އިލްތިމާސްކުރައްވައިފިއެވެ.
ކޮމިޝަނަރ އޮފް ޕޮލިސް މިހެން ވިދާޅުވީ، 41 ވަނަ ޕޮލިސް އިނީޝިއަލް ޓްރެއިނިން ކޯސް ދަސްވެނިވެ ހިނގާލުމުގެ ރަސްމިއްޔާތުގައި ވާހަކަދައްކަވަމުންނެވެ.
އެގޮތުން ސީޕީ ވިދާޅުވީ، ފުލުހުންގެ ޔުނީފޯމަކީ، ފުލުހުން އަދާކުރާ ޑިޔުޓީއާއި، ފުލުހުންގެ ހުވާއާއި، ޢަޒުމް އަދި ހަވާލުކުރެވިފައިވާ ޒިންމާ ހަނދާންކޮށްދޭނެ އެއްޗެއް ކަމަށެވެ. އަދި އެ ނޫ ޔުނީފޯމަކީ ރައްޔިތުންގެ ސަލާމަތާ ރައްކާތެރިކަމުގެ އިތުރުން ޢަދުލުވެރިކަމުގެ ރަމްޒެއް ކަމަށްވެސް ވިދާޅުވިއެވެ.
މި ޔުނީފޯމަކީ ދިވެހި ފުލުހުންގެ އަމާނާތެއް. އެހެންކަމުން މި ޔުނީފޯމަށް ޤަދަރުކުޑަވާނެ އެއްވެސް ކަމެއް ނުކުރުމަށް އަޅުގަނޑު ނަޞޭހަތްތެރިވަން
ކޮމިޝަނާ އޮފް ޕޮލިސް ނަވީން
މިއާއެކު ސީޕީ ވިދާޅުވީ، ފުލުހުންގެ ވަޒީފާއަކީ އަދާކުރަން ފަސޭހަ ވަޒީފާއެއް ނޫން ކަމަށެވެ. އެހެނެއް ކަމަކު އެއީ، ވަރަށް ބުރަ އެހާމެ ޒިންމާދާރު އަދި ގުރުބާނީތަކެއް އެކުލެވޭ ވަޒީފާއެއް ކަމަށެވެ.
ނަމަވެސް ހަނދާނުގައި ބަހައްޓަންވީ ތިޔަ ފަށަނީ ހަމައެކަނި ވަޒީފާއެއް ނޫންކަން. ތިޔަ ދެވެނީ ޤައުމީ ގޮވާލުމަކަށް އިޖާބަކަން. ތިޔަ ނިކުމެވެނީ ރައްޔިތުންގެ ސަލާމަތާއި ރައްކާތެރިކަމަށްޓަކައި ޝަރަފްވެރި ޤައުމީ ޚިދުމަތަކަށްކަން. އެކަމަށްޓަކައި އަޅުގަނޑުމެން އެންމެން ތިޔަ ފުލުހުންނަށްޓަކައި ފަހުރުވެރިވަން."
ކޮމިޝަނަރ އޮފް ޕޮލިސް ނަވީން
މީގެ އިތުރުން ސީޕީ ވަނީ، ފުލުހުންގެ ވަޒީފާ އަދާކުރުމުގައި ދިމާވާ ގޮންޖެހުންތަކާއި ކުރިމަތިލައި، ނަޒާހާތްތެރިކަމާއި ހިތްވަރާއެކު މަސައްކަތްކުރުމަށް ނަސޭހަތްތެރިވެފައެވެ.
އަދި ރައްޔިތުންނަށް ލިބިދޭންޖެހޭ ސަލާމަތާއި ރައްކާތެރިކަން ތަފާތުކުރުމެއްނެތި ހަމަހަމަކަމާއެކު ފޯރުކޮށްދިނުމަށްވެދް ވަނީ އިލްތިމާސްކުރައްވާފައެވެ.
Advertisement
This content is created and paid for by advertisers and does not involve Voice Journalists
