ހައްދުފަހަނައަޅާފައިވާ އިސްރާއިލުން ގަދަކަމުން ވަޒަންވެރުވެގަނެގެން ދިރިއުޅެމުންދާ ހުޅަނގު އައްސޭރީގެ 19 ސަރަޙައްދެއްގައި އެމީހުން ވަޒަންވެރިކުރުވުމަށް އިސްރާއީލުގެ ކެބިނެޓުން ނިންމި ނިންމުން ދިވެހި ސަރުކާރުން ކުށްވެރިކޮށްފިއެވެ.
އިސްރާއިލުގެ ނިންމުން ކުށްވެރިކޮށް ދިވެހި ސަރުކާރުން ނެރުނު ބަޔާނުގައި ބުނީ ފަލަސްޠީނުގެ އެކި ސަރަޙައްދުތަކުގައި ބައިނަލްއަޤުވާމީ ޤާނޫނުތަކާއި އަދި އދ.ގެ ސެކިއުރިޓީ ކައުންސިލްގެ އެކި މުޢާޙަދާތަކާއި ޚިލާފަށް އިސްރާއީލުން ހިންގަމުންދާ އެކި ލާއިންސާނީ ޢަމަލުތައް ހަރުކަށި އިބާރާތުން ކުށްވެރިކުރާ ކަމަށެވެ.
އަދި އިސްރާއީލުގެ އެފަދަ އިންސާނިއްޔަތާ ޚިލާފު ޢަމަލުތަކުގެ ސަބަބުން އިންސާފު ޤާއިމުކުރުމަށާއި ހަމަޖެހުން ޤާއިމުކުރުމަށް ހުރަސްތައް އެޅޭކަން ސަރުކާރުން ވަނީ ފާހަގަކޮށްފައެވެ.
މިއާއެކު ސަރުކާރުން ވަނީ ޤާނޫނީ އަދި އިންސާނީ ހަމަތަކާއި ޒިންމާ އަދާކޮށް، އިންސާފަށް މަސައްކަތްކުރުމަށް ބައިނަލްއަޤުވާމީ މުޖުތަމަޢަށް ގޮވާލާފައެވެ. އަދި އިސްރާއީލުން ފަލަސްތީނުގެ ބިންފޭރުމަށް ކުރަމުންދާ މަސައްކަތް ހުއްޓުވުމަށް ވެސް ގޮވާލާފައިވެއެވެ.
މީގެ އިތުރުން ސަރުކާރުން ވަނީ ފަލަސްޠީނުގެ ރައްޔިތުންނާއެކު ދިވެހީން ތިބި ތިބުން އަދި ފަލަސްޠީނުގެ ރައްޔިތުންގެ ޙައްގުތައް ކަށަވަރުކުރުމަށާއި ފަލަސްޠީނުގެ މިނިވަން ދައުލަތެއް ޤާއިމުކުރުމަށް ކުރަމުންދާ މަސައްކަތުގައި ދިވެހީން އަބަދުވެސް ސާބިތުވެ ތިބޭނެކަމުގެ ޔަގީންކަން ދީފައެވެ.
Advertisement
This content is created and paid for by advertisers and does not involve Voice Journalists
