ބައިނަލް އަޤްވާމީ ނުކުޅެދުންތެރިކަން ހުންނަ މީހުންގެ ދުވަސް 2025 ފާހަގަކުރުމަށްޓަކައި، އިޖުތިމާޢީ ތަރައްގީއާ ބެހޭ ވުޒާރާއާއި އެލައިޑް ހެލްތް ޕްރޮފެޝަނަލުން ގުޅިގެން ޚާއްސަ ޕެނަލް ޑިސްކަޝަންއަކާއި ދެ ވެބިނާ ބޭއްވުމަށް ނިންމައިފިއެވެ.

އެގޮތުން، މި ހަރަކާތަކުގައި އެލައިޑް ހެލްތް ޕްރޮފެޝަނަލުންގެ ތެރެއިން ސްޕީޗްޕެތޮލޮޖިސްޓުންނާއި، އޮކިޔުޕޭޝަނަލް ތެރަޕިސްޓުން، ޑައިޓީޝަނުން އަދިފިޒިއޮތެރަޕިސްޓުން ބައިވެރިވެވަޑައިގަންނަވާނެ ކަމަށް އިޖުތިމާޢީ ތަރައްގީއާ ބެހޭ ވުޒާރާއިން ވަނީ ބުނެފައެވެ. 

އާންމުންނަށް ބައިވެރިވުމުގެ ފުރުސަތު ހުޅުވާލައިގެން ކުރިއަށް ގެންދާ މި ހަރަކާތުގެ ތެރެއިން ޕެނަލް ޑިސްކަޝަން ބޭއްވުމަށް ހަމަޖެހިފައިވަނީ މިރޭގައެވެ. މި ޕެނަލް ޑިސްކަޝަން ގެ ތެރެއިން ޝާމިލުކުރަނިވި ޚިދުމަތް ފޯރުކޮށްދިނުމުގައި ތެރަޕިސްޓުންގެ ދައުރާއި ބެހޭ މުހިއްމު މަޢުލޫމާތު މިދާއިރާތަކުގެ ޕްރޮފެޝަލުން މެދުވެރިކޮށް ހިއްސާކުރެވިގެންދާނެ ކަމަށް އެ ވުޒާރާއިން ބުނެއެވެ.

އެގޮތުން، ނުކުޅެދުންތެރިކަން ހުންނަފަރާތްތަކަށް ތެރަޕީގެ ހިދުމަތުގެ ތެރެއިން ގެނެވޭ ކުރިއެރުންތަކަކީ ކޮބައިކަމާއި ކުދިން ދިރިއުޅޭ މާހައުލުގެ ތެރެއިން ވަށާޖެހޭގޮތެއްގައި ފޯރުކޮށްދެވޭ އެހީތެރިކަމުގެ ސަބަބުން ލިބޭ ފައިދާތަކާއި، ގޭތެރޭގެ އާއްމު އުޅުމުގައި ބެލެނިވެރިންނަށ ކުރެވިދާނެ ކަންކަމުގެ އިތުރުން، މަލްޓި-ޑިސިޕްލިނަރީ ޓީމެއްގެ ގޮތުގައި ހިދުމަތްދޭ ފަރާތްތަކުން މަސައްކަތްކުރުމުގެ މުހިއްމުކަމާއިބެހޭގޮތުން ވާހަކަދެކެވިގެންދާނެއެވެ.

މި ޕެނަލް ޑިސްކަޝަންގައި ބައިވެރިވެލެއްވުމަށް ޝައުޤުވެރިވެލައްވާ ފަރާތްތަކުން، މިއަދުގެ 16:00 ގެ ކުރިން، ރެޖިސްޓަރީ ކުރުމަށް ވަނީ ހުޅުވާލާފައެވެ. 

ހަމައެހެންމެ، އަދި، މި މަހުގެ 19 ވަނަ ދުވަހާއި 20 ވަނަ ދުވަހު ބޭއްވުމަށް ހަމަޖެހިފައިވާ ވެބިނާތަކުގައިވެސް އެލައިޑް ޕްރޮފެޝަނަލުން ފައިދާހުރި ގިނަ މަޢުލޫމާތުތަކެއް ފޯރުކޮށްދެއްވާނެ ކަމަށް ބުނެފައިވެއެވެ. 

އެގޮތުން، 19 ވަނަ ދުވަހުގެރޭ ބޭއްވުމަށް ހަމަޖެހިފައިވާ ވެބިނަރ ގެ ތެރެއިން ނުކުޅެދުންތެރިކަން ހުންނަ ފަރާތްތަކުގެ ތެރެއިން ހެދިބޮޑުވުމުގެ އެކިމައްސަލަތައް ދިމާވާ ކުދިންނާއި ފަރާތްތަކަށް ކެއުންބުއިމުގައި ސަމާލުވާނެ ގޮތްތަކާއިބެހޭގޮތުން  މުހިންމު މައުލޫމާތުތަކެއް  މިދާއިރާތަކުގެ ޕްރޮފެޝަލުން މެދުވެރިކޮށްހިއްސާކުރެވިގެންދާނެކަން ފާހަގަކޮށްފައިވެއެވެ.

އަދި 20 ވަނަ ދުވަހުގެރޭ ބޭއްވުމަށް ހަމަޖެހިފައިވާ ވެބިނަރ ގެ ތެރެއިން ނުކުޅެދުންތެރިކަން ހުންނަ ފަރާތްތަކުގެ ތެރެއިން ހެދިބޮޑުވުމުގެ މައްސަލަތައް ދިމާވާކުދިންނާއި ފަރާތްތަކަށް ގޭތެރޭގެ މާހައުލުގައާއި އާއްމު ދިރިއުޅުމުގައި ކުރެވިދާނެކަންކަމާއި ގުޅޭގޮތުން  މުހިއްމު މައުލޫމާތުތަކެއް މިދާއިރާތަކުގެ ޕްރޮފެޝަލުން މެދުވެރިކޮށްހިއްސާކުރެވިގެންދާނެ ކަމަށްވެސް އެ ވުޒާރާއިން މައުލޫމާތު ދެއެވެ. 

މި ވެބިނަރތަކުގައި ބައިވެރިވާން ބޭނުންވާ ފަރާތްތަކަށް ވެސް ރަޖިސްޓަރީ ވުމަށް މިހާރުވަނީ ހުޅުވާލެވިފައެވެ.

މި ޕެނަލް ޑިސްކަޝަން އަދި ވެބިނާތަކުގައި ބައިވެރިވެލެއްވުމަށް އެދިލައްވާ ފަރާތްތަކުން ރަޖިސްޓަރީވުމަށް ތިރީގައިވާ ލިންކް ބޭނުންކުރެއްވުން އެދެމެވެ. މި ހަރަކާތްތަކާ ގުޅޭ އިތުރު މަޢުލޫމާތު ހޯދުމަށް 7206558 އަށް ގުޅާލައިގެން މަޢުލޫމާތު ސާފުކޮށްލެވޭނެއެވެ.

ޕެނަލް ޑިސްކަޝަން : https://forms.gle/xiBXDkHxsSFRYEcDA

ވެބިނަރ : https://forms.gle/SU1DvwNbmvfDvcn2A