މިދިޔަ މަހުގެ 15 ވަނަ ދުވަހުން ފެށިގެން މިއަދާއި ހަމައަށް 509 ބިދޭސީން ޑީޕޯޓް ކޮށްފައިވާ ކަމަށް ދާޚިލީ ސަލާމަތާއި ފަންނިއްޔާތާ ބެހޭ ވަޒީރު ޢަލީ އިޙްސާން ވިދާޅުވެއްޖެ އެވެ.

ވަޒީރު މިފަދައިން ވިދާޅުވީ އެ ވުޒާރާގެ ދަށުން ހިންގަމުންދާ އިދާރާތަކުގެ މަސައްކަތްތައް ހިއްސާކުރުމަށް ބޭއްވި ނޫސްވެރިންގެ ބައްދަލުވުމުގައެވެ.

މި ބައްދަލުވުމުގައި މިނިސްޓަރު ވަނީ ރާއްޖޭގައި ބިދޭސީންގެ މައްސަލަ ހައްލުކުރުމަށްޓަކައި ކުރަމުން އަންނަ މަސައްކަތުގެ މަޢުލޫމާތުތައް ހިއްސާ ކުރައްވާފައެވެ. އެގޮތުން "އޮޕަރޭޝަން ކުރަނގި" އެކި ފިޔަވަހިތަކަކަށް ބަހާލައިގެން ކުރިއަށް ގެންދާ ކަމަށް ވަޒީރު ވިދާޅުވި އެވެ. އެގޮތުން ފުރަތަމަ ފިޔަވަހީގައި މާލެ ސަރަޙައްދުގެ ރަށްރަށުގައި ދިރިއުޅޭ ބިދޭސީންގެ މަޢުލޫމާތު އެއްކުރުމުގެ މަސައްކަތް ކުރި ކަމަށާއި، ދެވަނަ ފިޔަވަހީގައި ރާއްޖެގެ މީހުން ދިރިއުޅޭ ހުރިހާ ރަށަކާއި ސިނާޢި މަސައްކަތް ކުރާ ރަށްރަށާއި ރިސޯޓުތަކުގައި މަސައްކަތް ކުރާ ބިދޭސީންގެ މަޢުލޫމާތު އެއްކުރުމުގެ މަސައްކަތް ވެސް ކޮށްފައިވާ ކަމަށް ވަޒީރު ފާހަގަ ކުރެއްވި އެވެ. މީގެ އިތުރުން، ވަޒީރު ވިދާޅުވީ މިހާތަނަށް އައިރު 202،000 ބިދޭސީންގެ 10 އިނގިލީގެ ނިޝާނާއި ފޭސް ރިކޮގްނިޝަން ނަގާ އެމީހުންގެ މަޢުލޫމާތުތައް އެއްކޮށްފައިވާ ކަމަށެވެ.

މި މަސައްކަތުގެ ތިން ވަނަ ފިޔަވަހީގެ މަސައްކަތް އަންނަ މަހު ފެށުމަށް ހަމަޖެހިފައިވާ ކަމަށް ވިދާޅުވި އެވެ. އަދި ޖެނުއަރީ މަހުގެ ފުރަތަމަ ދުވަހުން ފެށިގެން އެޕްރީލް މަހާ ހަމައަށް މިވަގުތު ފިންގާ ޕްރިންޓް ނަގާފައިތިބި މީހުންގެ ތެރެއިން ޤަވައިދާ ޚިލާފަށް އުޅޭ ބިދޭސީން ޤަވައިދުގެ ތެރެއަށް ވެއްދުމުގެ ބޮޑު މަސައްކަތެއް ވެސް ފަށާނެ ކަމަށް ވަޒީރު ވިދާޅުވި އެވެ.

މީގެ އިތުރުން އަންނަ އަހަރުގެ އެޕްރީލް މަހުގެ ދެ ވަނަ ދުވަހުން ފެށިގެން 2027 ވަނަ އަހަރުގެ މެއި މަހުގެ ފުރަތަމަ ދުވަހާ ހަމައަށް ގަވައިދާ ހިލާފަށް އުޅޭ ބިދޭސީން ހިފާ ހައްޔަރުކޮށް ޑީޕޯޓް ކުރުމުގެ ހާއްސަ މަސައްކަތެއް ފަށްޓަވާނެ ކަމަށް ވެސް ވަޒީރު ވިދާޅުވި އެވެ.

މިދިޔަ މަހުގެ ތެރޭގައި ޑީޕޯޓުކުރި 509 ބިދޭސީންނާއިއެކު މި ދެ އަހަރުގެ ތެރޭގައި ޑީޕޯޓްކޮށްލެވުނު ބިދޭސީންގެ އަދަދު ވަނީ 9697 އަށް އަރާފައެވެ.