ވަގު ޓެލެގްރަފިކް ޓްރާންސްފާ (ޓީޓީ) ފޮނުވައިގެން ބޭރުގެ ކުންފުނިތަކުން ވިޔަފާރިކުރި މައްސަލައިގައި އެތައް ދައުވާތަކެއް ސާބިތުވެ މއ. ހަނީސަކްލް-1، ހުސައިން ޝިފާއު، 109 އަހަރަށް ޖަލަށްލާން ކްރިމިނަލް ކޯޓުން ހުކުމްކޮށްފި އެވެ.
މިހާ ދިގު މުއްދަތަކަށް ޖަލަށް ލުމުގެ އިތުރުން ހަތް މިލިއަން ރުފިޔާއިން އޭނާ ޖޫރިމަނާ ވެސް ކޮށްފައިވެ އެވެ.
މި މައްސަލައިގައި 23 ދައުވާއެއް އޭނާގެ މައްޗަށް އުފުލި އެވެ. މި ދައުވާތައް އުފުލީ 2023, އޭޕްރީލް ގަ އެވެ.
އެދައުވާތަކުގެ ތެރޭގައި ހިމެނެނީ ދިވެހިރާއްޖޭގެ ޤާނޫނުލްޢުޤޫބާތުގެ 310 ވަނަ މާއްދާގެ ދަށުން، އެނގިހުރެ ޞައްޙަނޫން ލިޔުމެއް ދިނުމުގެ ކުށުގެ ނުވަ ދަޢުވާ އަކާއި ޤާނޫނުލްޢުޤޫބާތުގެ 212 ވަނަ މާއްދާގެ ދަށުން، މަކަރާއި ޙީލަތް ހެދުމުގެ ކުށުގެ ހަތް ދަޢުވާ އަދި މަނީ ލޯންޑްރިންގ އަދި ޓެރަރިޒަމަށް ފައިނޭންސްކުރުން ހުއްޓުވުމުގެ ޤާނޫނު 53 ވަނަ މާއްދާގެ ދަށުން، މަނީ ލޯންޑްރިންގގެ ކުށުގެ ހަތް ދަޢުވާ އެވެ.
އެ ހުރިހާ ދައުވާތައްވެސް ވަނީ އޭނާގެ މައްޗަށް ސާބިތުވެފަ އެވެ. މީގެ އިތުރުން މި މައްސަލަތަކުގައި ހިމެނޭ 123،844.54 އެމެރިކާ ޑޮލަރު ނުވަތަ ދިވެހި ރުފިޔާއިންނަމަ 1،909،682 ރުފިޔާ ދެެއްކުމަށްވެސް އަމުރުކޮށްފައިވެ އެވެ.
ހުކުމްގެ މަޖިލީހުގައި ޝިފާއު ވަނީ ލުއި އަދަބެއް ކަނޑައަޅައިދޭން އެދިފަ އެވެ. އަދި ޖަލު ހުކުމުން ބައެއް ގޭގައި ތަންފީޒު ކުރަން ޖެހޭ ގޮތަށް ހަދައިދޭން ވެސް އެދުނެވެ. ނަމަވެސް ގާޒީ އެކަމަށް ވަކި ގޮތްތަކެއް ކަނޑައަޅާފައެއް ނުވެ އެވެ.
Advertisement
This content is created and paid for by advertisers and does not involve Voice Journalists
