ހުޅުމާލެ ހިޔާ އަވަށުގައި ގެދޮރުވެރިޔާ ސްކީމުގެ ދަށުން ތަރައްގީކޮށްފައިވާ ފްލެޓްތަކުގެ ޑައުންޕޭމަންޓް ކުޑަކުރަން ނިންމާފައިވާތީ ޑައުންޕޭމަންޓް ދައްކާފައިވާ މީހުންނަށް މަހު ކުލީން އެބައި އުނިކޮށްދޭނެ ކަމަށް ހައުސިން މިނިސްޓްރީން ބުނެފި އެވެ.

ހިޔާ އަވަށުގެ ރައްޔިތުންނާއި ބައްދަލު ކުރެއްވުމަށް ރޭ ބޭއްވި ބައްދަލްވުމުގައި ގެދޮރުވެރިޔާ ފްލެޓްތަކުގެ ކުލި ކުޑަކޮށް ޑައުންޕޭމަންޓަށް ރަނގަޅު ބަދަލެއް ގެނެސްދޭން ބައެއް ރައްޔިތުން އެދުނެވެ. އެ ބައްދަލްވުން ނިންމަވާލައްވަމުން ރައީސް ވިދާޅުވީ ކުއްޔާއި ޑައުންޕޭމަންޓް ކުޑަކޮށްދެއްވަން ނިންމަވާފައިވާ ކަމަށެވެ.

އެގޮތުން ތިން ކޮޓަރީގެ ފްލެޓްތަކަށް މިހާރު ދައްކަން ޖެހޭ އެޑްވާންސް ޕޭމަންޓުން 17,000 ރުފިޔާ އުނިކުރަން ވަނީ ނިންމާފަ އެވެ. އެހެން ކަމުން ޑައުންޕޭމަންޓަށް ދައްކަން ޖެހޭ 25,000 ރުފިޔާގެ ބަދަލުގައި ދެން ދައްކަން ޖެހޭނީ 8,500 ރުފިޔާ އެވެ.

އަދި ތިން ކޮޓަރީގެ ފްލެޓްތަކަށް ކުއްޔާއި މެއިންޓަނަސް ފީގެ ގޮތުގައި ދައްކަން ޖެހޭ 10,500 ރުފިޔާއިން ވަނީ 500 ރުފިޔާ އުނިކޮށްފަ އެވެ. އެހެން ކަމުން ދެން ދައްކަން ޖެހޭނީ މަހަކު 10,000 ރުފިޔާ އެވެ.

ދެ ކޮޓަރީގެ ފްލެޓްތަކަށް މިހާރު ދައްކަން ޖެހޭ އެޑްވާންސް ޕޭމަންޓަކީ 15,000 ރުފިޔާ އެވެ. ނަމަވެސް ދެން ދައްކަން ޖެހޭނީ ހަ ހާސް ރުފިޔާ އެވެ. އަދި މަހު ކުލިވެސް ވަނީ 7,000 އިން 6,000 އަށް ކުޑަކޮށްފަ އެވެ.

މި ނިންމުން ނިންމިއިރު ބައެއް މީހުން ވަނީ ކުރީން ކަނޑައަޅާފައިވާ ބޮޑު ޑައުންޕޭމަންޓް ދައްކާފަ އެވެ. އެ ފައިސާއަށް ދެން ވާނީ ކިހިނެތްތޯ ސުވާލުކުރުމުން ހައުސިން މިނިސްޓްރީން ބުނީ މަހު ކުލީން އެބައި އުނިކޮށްދޭނެ ކަމަށެވެ.