ސިއްހަތަށް ނުރައްކާވާފަދަ ދަރަޖައަކަށް މިއަދު މާލެ ސަރަހައްދުގެ ވައި ނުސާފްވެއްޖެއެވެ.

ހެލްތު ޕްރޮޓަކްޝަން އޭޖެންސީ، އެޗްޕީއޭއިން މިއަދު ނެރެފައިވާ ވައި ސާފު މިންވަރު ހުންނަ މިންވަރު އަންގައިދޭ މިންގަނޑަށް ބަލާއިރު، ވިލިމާލެ އާއި ދ.ކުޑަހުވަދޫ ސަރަހައްދުގެ ވައިނުސާފްކަން ހުރީ ހުރިހާ އެންމެންގެ ސިއްހަތަށް ނުރައްކާވާފަދަ މިންގަނޑަކަށެވެ. އެގޮތުން އެޗްޕީއޭއިން ވަނީ އެ ސަރަހައްދަށް ރެޑް އެލާޓް ނެރެފައެވެ. 

އެގޮތުން މާލެ ސަރަހައްދުގެ ވައިގެ ކޮލިޓީ 170 ގައި ހުރިއިރު ކުޑަހުވަދޫ ސަރަހައްދުގެ މިންގަނޑު ހުރީ 165 ގައެވެ. ވައި ނުސާފް މިންގަނޑު 200-150 ގައި ހުންނަނަމަ އޭގެ މާނައަކީ ސިއްހީގޮތުން ނޭދެވޭ އަސަރުތައް ކުރުމާއި ފުއްޕާމެއާއި ހިތުގެ ބަލިތައް ބޮޑުވުމުގެ ނުރައްކާތެރިކަން ހަމަ އެންމެނަށްވެސް އޮތްކަމެވެ. 

ށ.ފުނަދޫ އަދި ލ.ގަން އަދި އައްޑޫސިޓީގެ ވައިގެ ކޮލިޓީ ހުރީ މެދުމިނުގައި ހުރިއިރު އެލާޓް ލެވެލް ހުރީ ރިނދޫގައެވެ. މާނައަކީ ނޭވާލާ ނިޒާމުގެ މައްސަލަތައް ޖެހުމުގެ ފުރުސަތު ބޮޑު، އަދި ނާޒުކު ހާލުގައިވާ ފަރާތްތައް ބޭރުގައި އުޅުމުން ދުރުވާންޖެހެއެވެ.

ކޮންމެ އަހަރެއްގެވެސް އިރުވައިމޫސުން ފެށޭ ދުވަސްކޮޅާ ދިމާވާއިރު، ވައިނުސާފުވެ ދުރު ފެންނަ ނިސްބަތް ވަރަށްބޮޑަށް ދަށްވެގެން ދެއެވެ. ވައިސާފް ވާނޭ ދުވަހެއް ކަނޑައެޅިގެން ބުނަން ނޭނގުނު ނަމަވެސް، ކުރިއަށް އޮތް ދުވަސްތަކުގައިވެސް މި މައްސަލަ ދިމާވާނޭކަމަށް ކަމާބެހޭ ފަރާތްތަކުން ބުނެއެވެ.

އެޗްޕީއޭއިން ވަނީ ވައިނުސާފްވުމުން ލިބިދާނޭ ގެއްލުންތަކުން ސަލާމަތްވުމަށް ދީފައިވާ އިރުޝާދުތަކަށް އަމަލުކުރުމަށް އިލްތިމާސްކޮށްފައެވެ.