ސްކޭމް ސެންޓަރު ގާއިމްކުރިފަހުން ގެއްލޭ ފައިސާ ހޯދޭ މިންވަރު އިތުރުވެއްޖެ: ފުލުހުން
އެންޓި ސްކޭމް ސެންޓަރު ގާއިމްކުރިފަހުން ރާއްޖޭގައި ހިންގާ އެކިއެކި ސްކޭމްތަކުން ގެއްލުނު ފައިސާ ހޭދުނު މިންވަރު އިތުރުވެފައިވާކަމަށް ފުލުހުން ބުނެފިއެވެ.
ފުލުހުން މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން އެންޓި ސްކޭމް ސެންޓަރު ހިންގުމާ ހަވާލުވެ ހުންނެވި އާދަމް ނަވީދު ވިދާޅުވީ، ސްކޭމްތަކުން ގެއްލޭ ފައިސާ ހޯދުމުގައި އެންޓި ސްކޭމް ސެންޓަރުން އެދެވޭފަދަ މަސައްކަތްތަކެއް ކުރެވިފައިވާކަމަށެވެ. ނަވީދު ވިދާޅުވީ މިދިޔަ 10 ވަރަކަށް މަސްދުވަހުގެ ތެރޭގައި ސްކޭމްތަކުން ގެއްލުނު ފައިސާގެ 32 އިންސައްތަ އަނބުރާ ހޯދިފައިވާކަމަށެވެ.
ނަވީދު ވިދާޅުވީ ސްކޭމްތަކުން ގެއްލޭ ފައިސާ އަނބުރާ ހޯދުމަށް ކުރެވުނު މަސައްކަތްތަކުން ހާސިލްވި ނަތީޖާއަކީ ދުނިޔޭގެ ކުރިއަރާފައިވާ ޤައުމުތަކުގައި އެދެވޭފަދަ ރަނގަޅު ނަތީޖާއެއްކަމަށެވެ.
އެންޓި ސްކޭމް ސެންޓަރެއް ގާއިމްކޮށް މަސައްކަތް ފެށިފަހުން 10 މަސްދުވަސް ވެފައިވާއިރު މިހާތަނަށް 1663 މައްސަލައެއް އެ ސެންޓަރަށް ވަނީ ހުށަހަޅާފައެވެ. މި މައްސަލަތަކުން ގެއްލުނު ފައިސާގެ އަދަދު 22.7 މިލިއަން ރުފިޔާ އަށް އަރާއިރު، އޭގެ ތެރެއިން 8.5 މިލިއަން ރުފިޔާ ވަނީ ހޯދާފައެވެ. އޭނާ ވިދާޅުވީ އެންޓި ސްކޭމް ސެންޓަރު ގާއިމްކުރުމުގެ ކުރިން ގެއްލޭ ފައިސާ އަނބުރާ ހޯދޭ މިންވަރަކީ އެންމެ ދެ އިންސައްތަ ކަމަށެވެ.
ސްކޭމްތައް ހުއްޓުވުމަށް ފުލުހުން އަންނަނީ ގިނަ މަސައްކަތްތަކެއް ކުރަމުންނެވެ. އެގޮތުން ބައިނަލްއަޤްވާމީ ޤައުމުތަކާއެކު މިހާރުވެސް އެކަމުގައި ގިނަ މަސައްކަތްތަކެއް ކުރަމުން އަންނަކަން ފުލުހުން ވަނީ މިއަދު ފާހަގަކޮށްފައެވެ.
Advertisement
This content is created and paid for by advertisers and does not involve Voice Journalists
