ބަންގްލަދޭޝްގައި ދެ ހިންދޫ ރައްޔިތަކު މަރާލުމާ ގުޅިގެން، ވެސްޓް ބެންގާލްގެ އިދިކޮޅު ލީޑަރު އަދި ބާރަތިޔާ ޖަނަތާ ޕާޓީ (ބީޖޭޕީ) ގެ އިސް ލީޑަރު ސުވެންދޫ އަދިކާރީ، ބަންގްލަދޭޝްއާ މުސްލިމުންނާ ދެކޮޅަށް ޤަތުލުޢާއްމު ހިންގުމަކީ ކުރަންޖެހޭ ކަމެއްކަމަށް ދޭހަވާ މޭރުމުން ވާހަކަދައްކައިފިއެވެ.

އެގޮތުން އޭނާ ބުނީ، ހައްދުފަހަނައަޅާފައިވާ އިސްރާއިލުން ޣައްޒާގައި ހިންގި ޤަތުލުޢާއްމަކީ ޣައްޒާއަށް ދިން ”ފިލާވަޅެއް ކަމަށް“ ބުނެ އެފަދަ ”ފިލާވަޅެއް“ ބަންގްލަދޭޝްއަށްވެސް ދޭންޖެހޭ ކަމަށް ބުނެފައެވެ.

”(ބަންގްލަދޭޝްއަށް) ރަނގަޅު ފިލާވަޅެއް ދޭން އެބަޖެހޭ. އިސްރާއިލުން ޣައްޒާއަށް ދިން ކަހަލަ ފިލާވަޅެއް ދޭން ޖެހޭ. އިންޑިޔާގައި 100 ކޮރޯޑް ހިންދޫއިން އުޅޭ. މި ސަރުކާރަކީވެސް ހިންދޫއިން ހައްގުގައި މަސައްކަތްކުރާ ސަރުކާރެއް. (ބަންގްލަދޭޝްއަށް) ފިލާވަޅެއް ދޭން ޖެހޭ. ’އޮޕްރޭޝަން ސިންދޫރް‘ އިން ޕާކިސްތާނަށް ދިން ކަހަލަ ފިލާވަޅެއް.“ ބީޖޭޕީ ލީޑަރު ބުނެފައިވެއެވެ.  

އަދިކާރީގެ މި ވާހަކަތަކާ ގުޅިގެން ގިނަ ބަޔަކު އަންނަނީ އޭނާއަށް ފާޑުކިޔައި އެ ވާހަކަތަކަކީ ޓެރަރިޒަމްއަށް މަގުފަހިވާގޮތަށް އެކަމަށް ހިތްވަރުދޭ ވާހަކަތަކެއް ކަމަށް ބުނަމުންނެވެ.

އެގޮތުން ވެސްޓް ބެންގާލްގެ ޓްރިނަމޫލް ކޮންގްރެސް (ޓީއެމްސީ) އިން އެކްސްގައި ކުރި ޕޯސްޓެއްގައި ބުނެފައިވަނީ، ނަފްރަތާއި ހައްދުފަހަނަޅާ ދިޔުމަކީ ބީޖޭޕީގެ ސިފައެއް ކަމުގައެވެ.

"ސުވެންދޫ ބުނަނީ ޣައްޒާއަށް އިސްރާއިލުން ފިލާވަޅު ދިން ފަދައިން ބަންގްލަދޭޝްއަށް ފިލާވަޅު ދޭން ޖެހޭނެ ކަމަށް. އޭނާ އެ ވާހަކަ ދައްކަނީ މުސްލިމުންގެ ނަސްލު ނައްތާލުމާ ބެހޭ ގޮތުން." ޓީއެމްސީން ބުނެފައިވެއެވެ.

މީގެ އިތުރުން ޓީއެމްސީއިން ފާހަގަކޮށްފައިވަނީ، ސުވެންދޫގެ މި ވާހަކަތަކަކީ މީހުން މެރުމަށާއި ނަސްލު ނައްތާލުމަށް ގޮވާލުން ކަމަށެވެ.

ކަންމިހެން ހުރި ނަމަވެސް، މިކަމާ ގުޅިގެން އޭނާއާ ދެކޮޅަށް އެއްވެސް މައްސަލައެއް ފުލުހަށް ހުށަހަޅާފައި ނުވާ ކަމަށާއި، ހައްޔަރުކޮށްފައި ނުވާ ކަމަށާއި އަދި އެއްވެސް ފިޔަވަޅެއްވެސް އަޅާފައި ނުވާ ކަން ފާހަގަކޮށް ޓީއެމްސީއިން ވަނީ ފާޑުކިޔާފައެވެ.

ޑިސެމްބަރު 18 ވަނަ ދުވަހު ޑާކާގައި ހިންދޫ އެއް ކަމަށްވާ ދީޕޫ ޗަންދުރާ ދާސް މަރާލެވިފައިވާއިރު، ޑިސެމްބަރު 24 ވަނަ ދުވަހު ރާޖްބާރީގެ އަމްރިތު މަންޑަލް ނަމަކަށް ކިޔާ ހިންދޫއެއް ވަނީ މަރާލާފައެވެ. އޭނާ މަރާލީ ފައިސާތަކެއް ނަގަން އުޅުނު ކަމުގެ ތުހުމަތުގައި ގުރޫޕެއްގެ މީހުން ހަމަލާދީ އެވެ. 

އެކަމާ ގުޅިގެން އިންޑިޔާގެ ހިންދޫއިން އަންނަނީ މަގުތަކަށް ނުކުމެ މުޒާހަރާ ކުރަމުންނެވެ. އެ މުޒާހަރާތަކުގައި ބީޖޭޕީ ލީޑަރު ސުވެންދޫ ވެސް އަންނަނީ ބައިވެރިވަމުންނެވެ.