ޣައްޒާގެ ހުޅަނގު އައްސޭރީގައި އިންސާނީ އެހީތެރިކަން ފޯރުކޮށްދެމުންދާ ބައިނަލްއަގުވާމީ ޖަމާއަތްތަކުގެ މަސައްކަތްތައް ހުއްޓުވުމަށްޓަކައި، އެ ޖަމާއަތްތަކަށް ދޫކޮށްފައިވާ ހުއްދަތައް ބާތިލްކުރަން ހައްދުފަހަނައަޅާފައިވާ އިސްރާއީލް ފަށައިފިއެވެ.

އިސްރާއީލުގެ ކަމާބެހޭ އިދާރާތަކުން ހާމަކޮށްފައިވާ ގޮތުގައި، އިންސާނީ އެހީ ފޯރުކޮށްދޭ 37 ޖަމާއަތެއްގެ ހުއްދަ ބާތިލްކުރުމަށް ވަނީ ނިންމާފައެވެ. މީގެ ތެރޭގައި ދުނިޔޭގެ މަޝްހޫރު 'ޑޮކްޓާސް ވިތައުޓް ބޯޑާސް' (އެމް.އެސް.އެފް) އާއި 'އެކްޝަން އެއިޑް' ފަދަ މުހިންމު ޖަމާއަތްތައް ހިމެނެއެވެ. މި ނިންމުން ނިންމާފައިވަނީ އެ ޖަމާއަތްތަކުން ފުރިހަމަކުރަންޖެހޭ ރަޖިސްޓްރީ ކުރުމުގެ އިޖުރާއަތްތައް ފުރިހަމަކޮށްފައި ނުވާކަމަށް ބުނެއެވެ.

އިސްރާއީލުގެ 'ޔެދިއޮތް އަހްރޮނޮތް' ނޫހުން ރިޕޯޓްކޮށްފައިވާ ގޮތުގައި، 12 އަށްވުރެ ގިނަ ބައިނަލްއަގުވާމީ ޖަމާއަތަކަށް މިހާރު ވަނީ ރަސްމީކޮށް ނޯޓިސް ފޮނުވާފައެވެ. އެ ނޯޓިސްގައިވާ ގޮތުން، އަންނަ އަހަރުގެ ޖެނުއަރީ މަހުގެ 1 ވަނަ ދުވަހުން ފެށިގެން އެ ޖަމާއަތްތަކުގެ ހުއްދަ ބާތިލްވާނެއެވެ. އަދި އަންނަ މާޗް މަހުގެ 1 ވަނަ ދުވަހުގެ ކުރިން އެ ޖަމާއަތްތަކުގެ ހުރިހާ ހަރަކާތްތަކެއް އެ ސަރަހައްދުތަކުގައި ހުއްޓާލުމަށް ވަނީ އަމުރުކޮށްފައެވެ.

މި ފިޔަވަޅު އެޅުމުގެ އިސްކޮޅުގައި ހުރީ އިސްރާއީލުގެ 'މިނިސްޓްރީ އޮފް ޑަޔަސްޕޯރާ އެފެއާޒް އެންޑް ކޮމްބެޓިން އެންޓިސެމިޓިޒަމް' އިން އެކުލަވާލާފައިވާ ޚާއްސަ ޓީމެކެވެ.

އެ މިނިސްޓްރީން ބުނެފައިވަނީ، ބައެއް ޖަމާއަތްތަކުން "ޓެރަރިސްޓް" ހަރަކާތްތަކުގައި ބައިވެރިވާ ފަލަސްތީނު މުވައްޒަފުން ވަޒީފާގައި ބައިތިއްބާ ކަމަށެވެ. އަދި ސަލާމަތީ ގޮތުން ބަލަންޖެހޭ ކަންކަން ބެލުމަށްޓަކައި މުވައްޒަފުންގެ ފުރިހަމަ ލިސްޓު ހުށަހެޅުމަށް އެންގުމުން، ބައެއް ޖަމާއަތްތަކުން އެކަމަށް އިންކާރުކޮށްފައިވާ ކަމަށްވެސް އިސްރާއީލުން ތުހުމަތުކުރެއެވެ.

މިއީ އިދާރީ ނިންމުމެއްގެ ގޮތުގައި ދެއްކި ނަމަވެސް، މީގެ އަސްލު މަގްސަދަކީ ފަލަސްތީނުގައި އެތައް އަހަރެއް ވަންދެން މަސައްކަތް ކުރަމުންދާ ޖަމާއަތްތަކުގެ މަސައްކަތަށް ހުރަސްއަޅައި، އެ ޖަމާއަތްތަކުގެ މައްޗަށް ބާރު ފޯރުވުމެވެ.

އަދި އިސްރާއީލުގެ ސިޔާސަތުތަކަށް ފާޑުކިޔާ ނުވަތަ އިސްރާއީލް ބޮއިކޮޓް ކުރުމަށް ފާއިތުވި ހަތް އަހަރު ތެރޭގައި ތާއީދުކޮށްފައިވާ އެއްވެސް މީހަކު ވަޒީފާގައި ބަހައްޓާ ޖަމާއަތަކަށް ފުރުސަތު ނުދޭނެ ކަމަށްވެސް އިސްރާއިލުން ވަނީ ބުނެފައެވެ.

މި ނިންމުމަކީ ފަލަސްތީނުގެ ހާލުގައި ޖެހިފައިވާ މީހުންނަށް އެހީވާ އދ. ގެ އެޖެންސީ (އުންރުވާ) ގެ ހަރަކާތްތައް އިސްރާއީލުގައި މަނާކުރުމަށް އެޖަމާއަތުގެ ގާނޫނު ހަދާ މަޖިލިސް، ކްނެސެޓުން 2024 ވަނަ އަހަރު ފާސްކުރި ގާނޫނަށްފަހު، އިންސާނީ އެހީއަށް ހުރަސްއެޅުމަށް އިސްރާއީލުން އަޅަމުންދާ އިތުރު ހަރުކަށި ފިޔަވަޅެކެވެ. އުންރުވާއިން ވަނީ އިސްރާއީލުގެ މިފަދަ ނިންމުންތަކާ ދެކޮޅު ހަދައި، އެ އެޖެންސީގެ މުސްތަގިއްލުކަން ދަމަހައްޓާނެ ކަމަށް ބުނެފައެވެ.