އިސްރާއީލުން ޣައްޒާގައި ހިންގަމުންދާ ނަސްލު ނައްތާލުމުގެ ޤަތުލުޢާއްމުގެ ތެރޭގައި، އެ ސިޓީގެ އަންހެނުން ތަހައްމަލްކުރަމުންދާ ބިރުވެރި އަދި ދަތި ހާލަތްތައް އެމީހުންގެ ދުލުން ކިޔައިދީފިއެވެ 

ކާބޯތަކެތީގެ ތަދާއި، ފިނި މޫސުމުގެ ގަދަ ފިންޏާއި، މެދުނުކެނޑި ދެމުންދާ ހަމަލާތަކުގެ ތެރޭގައިވެސް، ޣައްޒާގެ އަންހެނުން ދަނީ އެމީހުންގެ އާއިލާތަކަށްޓަކައި އަމިއްލަ ނަފްސު ގުރުބާންކުރަމުންނެވެ.

އިސްރާއީލުން ޣައްޒާއަށް ވަންނަ އެހީގެ ސާމާނާއި، ފޭލިގެ ފަދަ ޒަރޫރީ ތަކެތި ހިފަހައްޓަމުން ދާއިރު، ޣައްޒާގެ މައިން ދަނީ ބަނޑުހައިހޫނުކަމުގެ ތެރޭގައި އެމީހުންގެ ދަރިންގެ ފުރާނަ ސަލާމަތްކުރުމަށް މަސައްކަތް ކުރަމުންނެވެ. ޣައްޒާގައި މައެއްގެ ލޯތްބަކީ އިސްރާއީލުގެ އަނިޔާވެރިކަމާ ދެކޮޅަށް ކުރެވޭ ވަރުގަދަ ޖިހާދަކަށް ވަނީ ވެފައެވެ.

ޒައިތޫން އަވަށުން ރެފިއުޖީއަކަށް ވެފައިވާ ސޫޒަން ކިޔައިދިން ގޮތުގައި، އޭނާ މުޅި ރޭ ހޭދަކުރަނީ އޭނާގެ ތުއްތު ދަރިފުޅު ފިންޏާއި ވާރެއިން ސަލާމަތްކުރުމަށްޓަކައި ދަރިފުޅު އަތްދަނޑިމައްޗަށް ލައިގެންނެވެ.

"އަހަރެމެން އަތުގައި އޮތީ އެންމެ ތިން ރަޖާ. އެއީ ދަރިންނަށް. އަހަރެން ފިނިވިޔަސް ހެޔޮ، އެކަމަކު މި ފިނީގައި އަހަރެންގެ ދަރިންނަކަށް ކެތެއް ނުކުރެވޭނެ،" އޭނާ ބުންޏެވެ.

މިފަދަ ވާހަކަތަކަކީ މިއަދު ޣައްޒާގެ ކޮންމެ މައެއްގެ ދުލުން އިވޭ ހިތްދަތި އަޑުތަކެވެ.

ޣައްޒާގެ ރައްޔިތުން ބަނޑުހައިހޫނުކަމުގައި ހޭދަކުރަމުންދާއިރު އެސިޓީއަށް ނިސްބަތްވާ، މައިސޫން ފަދަ އެތައް މައިންނެއް ވަނީ އެމީހުންގެ ކާނާ ދަރިންނަށް ދީފައެވެ.

"އަހަރެންނަށް ލިބެނީ އެންމެ ރޮއްޓެއް. އެ ރޮށި ކުދިކޮށް ކޮށާލައިގެން ދަރިންނަށް ދެނީ. އެކުދިން ކެއުމުން އަހަރެންގެ ބަނޑު ފުރޭ ފަދަ،" މައިސޫން ބުންޏެވެ.

މީގެ އިތުރުން ޣައްޒާގެ އަންހެނުންނަށް ކުރިމަތިވެފައިވާ އަނެއް ބޮޑު ގޮންޖެހުމަކީ ސިއްހީ އަދި އަމިއްލަ ސާފުތާހިރުކަމުގެ މައްސަލަތަކެވެ. ފާޚާނާ ކުރުމާއި ފެންވެރުމުގެ މިނިވަންކަމެއް ނެތް އިރު، އެތައް ބަޔަކާއެކު އެއް ފާޚާނާއެއް ބޭނުންކުރަން ޖެހުމަކީ އެމީހުންގެ ނަފްސުގެ އިއްޒަތާއި ގަދަރަށްވެސް އަސަރުކުރާ ކަމެކެވެ. އަދި، މައްސަރު ކަންކަމާއި، މާބަނޑު ދުވަސްވަރާއި، ވިހެއުމުގެ ކަންކަން ކުރިއަށްދަނީ އެއްވެސް ކަހަލަ ތަދުކަނޑުވާ ބޭހަކާ ނުލައި، ނުރައްކާތެރި ހާލަތްތަކުގައެވެ.

ޤަތުލުޢާއްމުގައި ފިރިން ޝަހީދުވުމުގެ ސަބަބުން އެތައް ހާސް އަންހެނުންނެއް ވަނީ ހުވަފަތްވެފައެވެ. މީގެ ސަބަބުން އެކަނިވެރިކަމާއި، ބިރުވެރިކަމުގެ އިތުރުން އާއިލާ ބެލެހެއްޓުމުގެ މުޅި ޒިންމާ ވަނީ އެމީހުންގެ ބޮލުގައި އެޅިފައެވެ. އެހީ ހޯދުމަށް ދާ ވަގުތުތަކުގައި އިސްރާއީލު ސިފައިންގެ ހަމަލާތަކުގައި އެތައް އަންހެނުންނެއް ވަނީ ޝަހީދުވެ ނުވަތަ ޒަޚަމްވެފައެވެ.

އަލް-އަޤްޞާ ހޮސްޕިޓަލުގައި ފަރުވާ ހޯދަމުންދާ އަންހެނަކު ބުނި ގޮތުގައި، އޭނާގެ ބަނޑަށް ވަޒަން އެރީ އެހީ ހޯދަން ގޮސް ހުއްޓައެވެ. އަދި އޭނާ ފަރުވާ ހޯދަން ޖެހުނީ އެއްވެސް ކަހަލަ ހޭނައްތާ ބޭހަކާ ނުލައެވެ.

މި ޤަތުލްޢާއްމުގެ ސަބަބުން ޣައްޒާގެ އަންހެނުންގެ ސިއްހަތަށްވެސް ވަނީ ބޮޑެތި ގެއްލުންތަކެއް ވެފައެވެ. ބަނޑުހައިހޫނުކަމުގެ ސަބަބުން ދަރިންނަށް ގާތުން ކިރުދިނުމަށް އުނދަގޫވެފައިވާއިރު، ބައެއް އަންހެނުންނަށް ވަނީ ކެންސަރު ފަދަ ބަލިތައް ޖެހިފައެވެ.

ރަޝާ ނަމަކަށް ކިޔާ އަންހެނަކު ބުނި ގޮތުގައި، އޭނާއަށް ކެންސަރު ޖެހުނީ އޭނާގެ ގެއަށް ބޮން އެޅުމުން ކުނިތަކުގެ ދަށުގައި ތާށިވެ، އެތަނުގެ ވިހަ ދުމާއި ހިރަފުސް ނޭވާލުމުގެ ތެރެއަށް ދިއުމުގެ ސަބަބުންނެވެ.

މީގެ އިތުރުން ހާލާ ނަމަކަށް ކިޔާ އަންހެނަކު ކިޔައިދިން ގޮތުގައި، އޭނާ އުތުރުން ދެކުނަށް ހިޖުރަކުރަން ޖެހުނު ވަގުތު، އޭނާގެ ބަނޑުގައި އޮތް އެއްމާބަނޑު ދެ ކުދިންގެ ތެރެއިން އެއް ކުއްޖަކު ވަނީ ބަނޑަށް މަރުވެފައެވެ. އެ ހާލުގައިވެސް އޭނާ ދިޔައީ އޭނާގެ ސާމާނުތައް އުފުލަމުންނެވެ.

ޣައްޒާގެ އަންހެނުން މިއަދު ތަހައްމަލު ކުރަމުންދާ މި ބިރުވެރި ހާލަތަކީ ބައިނަލްއަގުވާމީ މުޖުތަމައުން ބޭނުންނަމަ ހުއްޓުވޭނެ ކަންކަމެވެ.

އެހެންނަމަވެސް، މިއަދާ ހަމައަށްވެސް އެކަނބަލުން ދަނީ ކަރުނައާއި ލޭގެ ތެރޭގައި، އެމީހުންގެ އާއިލާތަކަށްޓަކައި ސާބިތުކަމާއެކު ތިބެ، ދުނިޔެއަށް ކެތްތެރިކަމުގެ ނަމޫނާއެއް ދައްކަމުންނެވެ.