ވެނެޒެއުލާގައި ރައްކާތެރި، އެކަށީގެންވާ އިންތިޤާލީ މަރުޙަލާއެއް ގާއިމުކުރެވެންދެން އެ ޤައުމު ހިންގާނީ އެމެރިކާއިން ކަމަށް އެމެރިކާގެ ރައީސް ޑޮނަލްޑް ޓްރަމްޕް ވިދާޅުވެއްޖެއެވެ.

ކޮކެއިން ޓްރެފިކް ކުރުމުގެ ތުހުމަތުކޮށް އެމެރިކާގެ އަސްކަރިއްޔާއިން ހިންގި ޚާއްޞަ އޮޕަރޭޝަނެއްގައި، ވެނެޒެއުލާގެ ރައީސް ނިކޮލަސް މަދޫރޯ އާއި އޭނާގެ އަނބިކަނބަލުން ސީލިއާ ފްލޮރެސް ވަނީ އިއްޔެ ހައްޔަރުކޮށްފައެވެ. 

އެއަށްފަހު އިއްޔެ ބޭއްވި ނޫސްވެރިންގެ ބައްދަލުވުމުގައި ވާހަކަދައްކަމުން ޓްރަމްޕް ބުނީ، ވެނެޒެއުލާގައި ރައްކާތެރި، އެކަށީގެންވާ އަދި ބުއްދިވެރި އިންތިޤާލީ މަރުޙަލާއެއް ގާއިމުކުރެވެންދެން އެ ޤައުމު ހިންގާނީ އެމެރިކާއިން ކަމަށެވެ.

މީގެ އިތުރުން، ވެނެޒެއުލާގެ ރައީސް ހައްޔަރުކުރުމުން ނައިބު ރައީސް ޑެލްސީ ރޮޑްރިގޭޒް ވަގުތީ ރައީސްގެ ގޮތުގައި ހުވާކުރައްވާފައިވާ ކަމަށްވެސް ޓްރަމްޕް ބުންޏެވެ. އަދި ރޮޑްރިގޭޒް އެމެރިކާގެ ސެކްރެޓަރީ އޮފް ސްޓޭޓް މާކޯ ރޫބިއޯއާ ވާހަކަދައްކަވާފައި ކަމަށާއި، ވެނެޒެއުލާ އަލުން އާރާސްތުކުރުމަށްޓަކައި އެމެރިކާއިން ބޭނުންވާ ކަންކަން ކުރުމަށް އޭނާ ތައްޔާރަށް ހުންނެވި ކަމަށް ޓްރަމްޕް ފާހަގަކޮށްފައިވެއެވެ.

މީގެ އިތުރުން ޓްރަމްޕް ބުނީ، ވެނެޒެއުލާގެ ތެލުގެ މުއްސަނދިކަމުގެ ސަބަބުން، އެ ޤައުމު ހިންގުމަށް އެމެރިކާއިން އެއްވެސް ޚަރަދެއް ކުރަން ނުޖެހޭނެ ކަމަށާއި، އެމެރިކާގެ ތެޔޮ ކުންފުނިތަކުން އެތަނުގައި އިންވެސްޓްކޮށް ބޮޑު ފައިދާއެއް ހޯދާނެ ކަމަށެވެ.

ޓްރަމްޕް މިހެން ބުނެފައިވާއިރު، ދައުލަތުގެ ޓީވީ މެދުވެރިކޮށް ވާހަކަދައްކަވަމުން ވެނެޒުއެލާގެ ނައިބު ރައީސް ރޮޑްރިގޭޒް ވަނީ އެމެރިކާގެ އަސްކަރީ ހަމަލާ ކުށްވެރިކުރައްވާފައެވެ.

އެގޮތުން އޭނާ ވަނީ އެއީ "ލާއިންސާނީ އުދުވާނެއް"ގެ ގޮތުގައި ސިފަކުރައްވައި، މަދޫރޯ ވަގުތުން މިނިވަންކުރުމަށް ގޮވާލައްވާފައެވެ.

މަދޫރޯ ވެނެޒެއުލާގެ ވެރިކަމާ ހަވާލުވެވަޑައިގަތީ 2013 ވަނަ އަހަރު، އޭނާގެ ކުރިން 1999 އިން ފެށިގެން ވެރިކަން ކުރެއްވި ހޫގޯ ޗާވޭޒް އަވަހާރަވުމާ ގުޅިގެންނެވެ. މި ދެ ބޭފުޅުންގެ ވެރިކަމުގައި ވެސް ޚާރިޖީ ސިޔާސަތާއި، ތެލާއި، އިންސާނީ ޙައްޤުތަކުގެ މައްސަލައިގައި އެމެރިކާއާ އެކު އޮތް ގުޅުން އޮތީ ވަރަށް ބޮޑަށް ގޯސްވެފައެވެ.

2024 ވަނަ އަހަރުގެ ޖުލައި މަހު ބޭއްވި އިންތިޚާބު މަދޫރޯ ކާމިޔާބު ކުރެއްވި ކަމަށް އިޢުލާން ކުރެއްވި ނަމަވެސް، ބައިނަލްއަޤްވާމީ މުޖުތަމަޢުން އެއީ އޮޅުވާލުންތަކެއް ހިމެނޭ އިންތިޚާބެއް ކަމަށް ބުނެފައިވެއެވެ. އަދި އިދިކޮޅު ކެންޑިޑޭޓް އެޑްމުންޑޯ ގޮންޒާލޭޒް އުރުޝިއާއަށް ވޯޓުގެ 70 އިންސައްތަ ލިބިފައިވާ ކަމަށް ރިޕޯޓްތައް ބުނެއެވެ.

ޓްރަމްޕާއި މަދޫރޯގެ ގުޅުން އިތުރަށް ގޯސްވީ މިދިޔަ ސެޕްޓެމްބަރު މަހު ވެނެޒުއެލާގެ އައްސޭރިފަށުން ދަތުރުކުރި އުޅަނދުތަކަކަށް އެމެރިކާ ސިފައިން ދިން ހަމަލާތަކެއްގައި 100 އަށްވުރެ ގިނަ މީހުން މަރުވުމާ ގުޅިގެންނެވެ. ޓްރަމްޕް ބުނީ އެއީ މަސްތުވާތަކެތި އެތެރެކުރުން ހުއްޓުވުމަށް ދިން ހަމަލާތަކެއް ކަމަށެވެ.