ޖުވާ ކުޅުމާއި އެފަދަ ތަންތަން ހިންގުން ކުށަކަށް، ހަތަރު އަހަރުގެ ޖަލު ހުކުމެއް އަންނާނެ
ޖުވާ ކުޅުމާއި ޖުވާ ކުޅޭ ތަނެއް ހިންގުމަކީ ޖިނާއީ ކުށެއްގެ ގޮތުގައި ކަނޑައެޅުމަށް ދިވެހި ރާއްޖޭގެ ޤާނޫނުލް ޢުގޫބާތަށް އިސްލާޙު ގެނައުމުގެ ބިލް ރައްޔިތުންގެ މަޖިލީހަށް ހުށައަޅައިފި އެވެ.
މިފަދަ ބިލެއް ހުށައަޅުއްވާނެ ކަމަށް ރައީސުލްޖުމްހޫރިއްޔާ ޑރ. މުހައްމަދު މުޢިއްޒު ފުރަތަމަ އިއުލާނު ކުރެއްވީ މިދިޔަ މަހުގެ 10 ވަނަ ދުވަހު އެވެ. ރައީސްގ އެ އިއުލާނު ކުރެއްވުމާއި އެއްގޮތަށް ޖުވާ ކުޅުމާއި ޖުވާ ކުޅޭ ތަނެއް ހިންގުމަކީ ޖިނާއީ ކުށެއްގެ ގޮތުގައި ކަނޑައެޅުމަށް ދިވެހި ރާއްޖޭގެ ޤާނޫނުލް ޢުގޫބާތަށް އިސްލާޙު ގެނައުމުގެ ބިލް ރައްޔިތުންގެ މަޖިލީހަށް މިހާރު ވަނީ ހުށައަޅާފަ އެވެ.
އެ ބިލް ހުށައެޅުއްވީ ހިތަދޫ މެދު ދާއިރާގެ މެންބަރު އަހްމަދު އަޒާން އެވެ. އޭނާ ހުށައެޅި ބިލް ބަލައިގަތުމާމެދު މާދަމާ ގޮތް ނިންމާނެ އެވެ. މުހިންމު ބިލްތަކެއް ބަލައިގަތުމަށް ދައުރުން ބޭރުން މާދަމާ ޖަލްސާއެއް ބާއްވަން މިހާރު ވަނީ އެޖެންޑާ ކޮށްފަ އެވެ.
މި ބިލްގައިވާ ގޮތުން ޖުވާ ކުޅުމާއި ޖުވާ ކުޅޭ ތަނެއް ހިންގުމަކީ ޖިނާއީ ކުށެކެވެ. އެއީ ޖިނާއަތުގެ ހަތަރުވަނަ ދަރަޖައިގެ ކުށެއް ކަމަށް ކަނޑައަޅަން ވަނީ ހުށައަޅާފަ އެވެ. އެހެން ކަމުން އަދަބެއްގެ ގޮތުގައި އަހަރު ދުވަހަށް ވުރެ ދިގު މުއްދަތަކަށް ނުވަތަ ހަތަރު އަހަރުގެ މުއްދަތަކަށް ޖަލަށް ލެވޭނެ އެވެ.
ސަރުކާރުން މިފަހުން ވަނީ ޖުވާ ކުޅެން ނުވަތަ ބެޓްކުރަން ބޭނުންކުރާ ވެބްސައިޓްތައް ރާއްޖޭގައި ބްލޮކް ކުރަން ފަށައިފައެވެ. އެގޮތުން މިދިޔަ އަހަރުގެ ޖުލައިމަހުގެ ތެރޭގައިވެސް، ކޮމިއުނިކޭޝަން އޮތޯރިޓީ އޮފް މޯލްޑިވްސް (ކޭމް) އިން ވަނީ ޖުވާ ކުޅެން ރާއްޖޭގައި އާންމުކޮށް ބޭނުންކުރާ ވެބްސައިޓްތަކެއް ފުލުހުންގެ އެންގުމަށް ބްލޮކް ކޮށްފައެވެ.
Advertisement
This content is created and paid for by advertisers and does not involve Voice Journalists
