ލަންކާގައި ދިރިއުޅޭ ދިވެހިންނަށް ކުރިމަތިވެފައިވާ ވިސާގެ މައްސަލަ ހައްލުކުރުމަށް، ލަންކާއާ ރާއްޖެއާ ދެމެދު ވިސާ އަދި ވޯކް ޕާމިޓް އުވާލަން ކުރީގެ ރައީސް މުޙައްމަދު ނަޝީދު މިއަދު ގޮވާލައްވައިފިއެވެ.

ސްރީލަންކާއަށް ޒިޔާރަތްކުރާ އަދި އެ ގައުމުގައި ދިރިއުޅޭ ދިވެހި ރައްޔިތުންނަށް ވިސާ ހޯދުމުގައި އެ ގައުމުގެ އިމިގްރޭޝަން ޑިޕާޓްމަންޓުގެ އޮފިޝަލުންގެ ފަރާތުން ދަތިތައް ކުރިމަތިކުރުވަމުންދާ ކަމަށް ވިދާޅުވެ، ސްރީލަންކާގައި ހުންނަވާ ދިވެހި ސަފީރު މަސްއޫދު އިމާދު ވަނީ ކަންބޮޑުވުންފާޅުކުރައްވާފައެވެ.

އެގޮތުން ސަފީރު މަސްއޫދު އިމާދު ވިދާޅުވީ، ދިވެހި ރައްޔިތުން ވިސާ ހޯދުމަށްޓަކައި ހެނދުނު 9:00 އިން ހަވީރު 5:00 އަށް އިމިގްރޭޝަން އޮފީހުގެ ދިގު ކިއުތަކުގައި މަޑުކުރަން ޖެހޭ ކަމަށެވެ.

އަދި އެހެން ގައުމުތަކުން ޒިޔާރަތްކުރާ މީހުންނަށް ހުންނަފަސޭހަތައް ދިވެހިންނަށް ނުލިބޭކަން ފާހަގަކުރެއްވިއެވެ. 

އެކަމާ ގުޅިގެން 'އެކްސް'ގައި ކުރެއްވި ޕޯސްޓެއްގައި ނަޝީދު ވިދާޅުވީ ރާއްޖެއާއި ސްރީލަންކާއާ ދެމެދު އޮތް ބޯޑަރު ކޮންޓްރޯލް އުވާލުމަކީ ދެ ގައުމުގެ ރައްޔިތުންނަށް ވެސް ވަރަށް ބޮޑު ފައިދާއެއް ކުރާނެ ކަމެއް ކަމަށެވެ.

އަދި އޭގެ ސަބަބުން އިގްތިޞާދީ އަދި އިޖްތިމާއީ ގުޅުންތައް ހަރުދަނާ ވެގެންދާނެ ކަމަށް ނަޝީދު ވިދާޅުވިއެވެ.

”(ރާއްޖެ އާއި ލަންކާއާ ދެމެދު) ވިސާ އަދި ވޯކް ޕާމިޓް އުވާލުމަކީ ވިޔަފާރިއާއި ފަތުރުވެރިކަން އަދި އަމިއްލަ ގުޅުންތައް އިތުރުވެ، އެއްބަޔަކު އަނެއް ބަޔަކަށް ގުޅުން ބަދަހި ކުރުމަށް މަގުފަހިވެގެންދާނެ ކަމެއް“ ނަޝީދު ވިދާޅުވިއެވެ.

މަސްއޫދު ލަންކާ ނޫހަށް ދެއްވި އިންޓަވިޔުގައި އޭނާ ވަނީ ވަކިން ހުށަހަޅާ ވިސާ އެޕްލިކޭޝަންތަކަށް ގިނަ ވަގުތު ހޭދަވި ނަމަވެސް، ޓްރެވަލް އެޖެންޓުން މެދުވެރިކޮށް ހުށަހަޅާ ފޯމުތަކަށް އެއްވެސް ދަތިކަމެއް ނެތި ވަގުތުން ވިސާ ލިބޭކަން ފާހަގަކުރައްވާފައެވެ. މިއީ އިމިގްރޭޝަންގެ ތެރޭގައި ހިނގާ މާލީ މަންފާތަކަކާ ގުޅުންހުރި ކަމެއް ކަމަށްވެސް އޭނާ ތުހުމަތު ކުރެއްވިއެވެ.

ޚާއްޞަކޮށް ކިޔަވާ ކުދިންނާއި ބެލެނިވެރިން ވިސާ ހޯދުމަށް ގިނަ ގަޑިއިރުތަކެއް ވަންދެން މަޑުކުރަން ޖެހުމަކީ ބަލައިގަނެވޭނެ ކަމެއް ނޫން ކަމަށް މަސްއޫދު ވިދާޅުވިއެވެ. އަދި މިކަން މިގޮތަށް ކުރިއަށްދާނަމަ، ސްރީލަންކާގެ ޕްރޮފެޝަނަލުންނަށް ރާއްޖެއިން ވިސާ ދޫކުރުމުގައި ގެންގުޅޭ އުސޫލުތައް މުރާޖައާކުރަން ރާއްޖެއަށް މަޖުބޫރުވާނެ ކަމުގެ އިންޒާރުވެސް ސަފީރު ދެއްވިއެވެ.

ސްރީލަންކާއަށް ދަތުރުކުރާ ދިވެހިންނަށް އެ ގައުމަށް އެތެރެވުމުން ވިސާ (އޮން-އެރައިވަލް ވިސާ) ލިބޭތީ، އާންމުގޮތެއްގައި ދަތުރުގެ ކުރިން ވިސާއަށް އެދި ހުށަހަޅާކަށް ނުޖެހެއެވެ. އެހެންނަމަވެސް، ދިގު މުއްދަތަކަށް އެ ގައުމުގައި މަޑުކުރަން ބޭނުންވާ ފަރާތްތަކާއި، އެ ގައުމުގައި ދިރިއުޅެން ގަސްތުކުރާ ފަރާތްތަކުން އެކަމަށް ބޭނުންވާ ހާއްސަ ވިސާ ހޯދަންޖެހެއެވެ.

ސްރީލަންކާއަކީ ގިނަ އަދަދެއްގެ ދިވެހިން ތައުލީމާއި ބޭސްފަރުވާގެ ކަންކަމުގައި ދިރިއުޅެމުންދާ ގައުމަކަށްވާއިރު، ވިސާގެ މިފަދަ މައްސަލަތަކަކީ ދިވެހި އާއިލާތަކަށް ބޮޑެތި ތަކްލީފުތަކެއް ކުރިމަތިވަމުންދާ ކަމެކެވެ.