އެމެރިކާގެ ރައީސް ޑޮނަލްޑް ޓްރަމްޕް، އޭނާއަކީ ވެނެޒުއޭލާގެ "އެކްޓިންގް ޕްރެޒިޑެންޓް" ނުވަތަ ވަގުތީ ރައީސްގެ ގޮތުގައި ސިފަކޮށްފައިވާ ވިކިޕީޑިއާ ޞަފުޙާއެއްގެ ފޭކު ފޮޓޯއެއް ސޯޝަލް މީޑިއާގައި ހިއްސާކޮށްފިއެވެ.

ޓްރަމްޕްގެ އަމިއްލަ ސޯޝަލް މީޑިއާ ޕްލެޓްފޯމް ކަމަށްވާ "ޓްރޫތު ސޯޝަލް" ގައި ހިއްސާކުރި މި ފޮޓޯގައިވާ ގޮތުން، ޓްރަމްޕް ވެނެޒުއޭލާގެ ރައީސްކަމާ ހަވާލުވީ 20 ޖެނުއަރީ 2025 ގައެވެ. އަދި 2026 ވަނަ އަހަރުގެ ޖެނުއަރީ މަހާ ހަމައަށްވެސް އޭނާ އެ މަގާމުގައި ހުރި ކަމަށް އެ ޞަފުޙާގައި ބުނެފައިވެއެވެ.

މީގެ އިތުރުން އެމެރިކާގެ ނައިބު ރައީސް ޖޭ.ޑީ ވެންސް އަކީ ޓްރަމްޕްގެ ނައިބު ކަމަށްވެސް އެ ފޮޓޯގައި ބަޔާންކޮށްފައިވެއެވެ.

މިފަދަ ފޮޓޯއެއް ޓްރަމްޕް ހިއްސާކޮށްފައި މިވަނީ ވެނެޒުއޭލާގެ ސިޔާސީ އަދި އަސްކަރީ މަޝްރަހަށް ބޮޑެތި ބަދަލުތަކެއް އަންނަމުންދާ ދަނޑިވަޅެއްގައެވެ.

އެގޮތުން އެމެރިކާގެ އަސްކަރިއްޔާއިން ދާދިފަހުން ކުރިއަށްގެންދިޔަ ޚާއްޞަ އޮޕަރޭޝަނެއްގައި ވެނެޒުއޭލާގެ ކުރީގެ ރައީސް ނިކޮލަސް މަދޫރޯ އާއި އޭނާގެ އަނބިކަނބަލުން ސިލިއާ ފްލޯރެސް ވަނީ ކަރާކަސްއިން ހައްޔަރުކޮށްގެން ނިއުޔޯކަށް ގެންގޮސްފައެވެ.

މަދޫރޯގެ މައްޗަށް ވަނީ މަސްތުވާތަކެތީގެ ވިޔަފާރިކުރުމާއި ޓެރަރިސްޓް ޖަމާއަތްތަކަށް އެހީތެރިވުމުގެ ދައުވާ އުފުލާފައެވެ. ނަމަވެސް މަދޫރޯ ވަނީ މި ތުހުމަތުތަކަށް އިންކާރުކުރައްވާފައެވެ.

އެމެރިކާގެ އޮފިޝަލުން "ސީ.ބީ.އެސް ނިއުސް" އަށް މައުލޫމާތު ދިން ގޮތުގައި، މަދޫރޯ ހައްޔަރުކުރުމުގެ އޮޕަރޭޝަން ހިންގާފައިވަނީ އެމެރިކާގެ "ޑެލްޓާ ފޯސް" އިންނެވެ. މި އޮޕަރޭޝަނަށްޓަކައި އެމެރިކާގެ މަނަވަރު "ޔޫ.އެސް.އެސް ޖެރަލްޑް އާރް. ފޯޑް" ހިމެނޭހެން ކެރީބިއަން ސަރަހައްދުގައި އެމެރިކާގެ އަސްކަރީ ބާރުތައް ވަނީ ވަރުގަދަކޮށްފައެވެ.

މަދޫރޯ މަގާމުން ވަކިކުރުމާ ގުޅިގެން، ވެނެޒުއޭލާގެ ވަގުތީ ރައީސް ކަމުގެ ހުވާ މިދިޔަ ހަފުތާގައި ކުރެއްވީ އެ ގައުމުގެ ކުރީގެ ނައިބު ރައީސް ޑެލްސީ ރޮޑްރިގޭޒް އެވެ. އޭނާ ހުވާކުރެއްވީ އޭނާގެ ކޮއްކޮ ޖޯޖް ރޮޑްރިގޭޒް ރިޔާސަތު ބަލަހައްޓަވާ ވެނެޒުއޭލާގެ ގައުމީ މަޖިލީހުގައެވެ.

ވޮޝިންގޓަންގައި ދިން ބަޔާނެއްގައި ރައީސް ޓްރަމްޕް ކުރިން ބުނީ، ވެނެޒުއޭލާގެ އިންތިގާލީ މަރުހަލާގައި އެމެރިކާއިން އެ ގައުމު "ހިންގާނެ" ކަމަށާއި، އަދި އެ ގައުމުގެ ތެޔޮ ބޭރުކުރަން ފަށާނެ ކަމަށެވެ. ނަމަވެސް، އެމެރިކާގެ ސެކްރެޓަރީ އޮފް ސްޓޭޓް މާކޯ ރޫބިއޯ ވަނީ އެމެރިކާގެ ސިޔާސަތު ސާފުކޮށްދެއްވަމުން، އެމެރިކާއިން ވެނެޒުއޭލާގައި ސީދާ ވެރިކަން ކުރުމުގެ ނިޔަތެއް ނެތް ކަމަށާއި، އެމެރިކާއިން މަސައްކަތް ކުރަނީ "އޮއިލް ކަރަންޓީނެއް" މެދުވެރިކޮށް އެ ގައުމުގެ ސިޔާސަތުތަކަށް ނުފޫޒު ފޯރުވުމަށް ކަމަށް ބުނެފައެވެ.