އިންޑިއާ އާއި އެމެރިކާއާ ދެމެދު އުފެދިފައިވާ ވިޔަފާރީގެ ނުތަނަވަސްކަމަށް ހައްލެއް ހޯދުމަށްޓަކައި، ދެގައުމުގެ ދެމެދުގައި މާދަމާވެސް މަޝްވަރާކުރަން ހަމަޖެހިއްޖެއެވެ. ވީޑީއޯ ކޮންފަރެންސް މެދުވެރިކޮށް ބާއްވާ މި ރަސްމީ މަޝްވަރާތައް އޮންނާނެކަން ހާމަކުރެއްވީ އިންޑިއާއަށް އަލަށް ކަނޑައެޅުއްވި އެމެރިކާގެ ސަފީރު ސާޖިއޯ ގޯރ އެވެ.

މަޝްވަރާތައް މި ބާއްވަނީ، ދެގައުމުގެ ދެމެދުގައި ވިޔަފާރީގެ އެއްބަސްވުމަކަށް ނާދެވުމުގެ ސަބަބުން ގުޅުންތަކަށް ބުރޫއަރައި، އިންޑިއާ ރުޕީސްގެ އަގު ރެކޯޑް މިންވަރަކަށް ދަށަށް ގޮސްފައިވާ ދަނޑިވަޅެއްގައެވެ.

މީގެ ކުރިން ކުރިއަށްދިޔަ ވިޔަފާރީގެ ވާހަކަތައް ނާކާމިޔާބުވުމާ ގުޅިގެން، އެމެރިކާގެ ރައީސް ޓްރަމްޕް ވަނީ މިދިޔަ އޯގަސްޓް މަހު އިންޑިއާގެ މުދަލުން ނަގާ ޓެކްސް 50 އިންސައްތައަށް ބޮޑުކުރައްވާފައެވެ. މީގެ ތެރޭގައި އިންޑިއާއިން ރަޝިއާގެ ތެޔޮ ގަންނާތީ، އަދަބެއްގެ ގޮތުން ނަގާ 25 އިންސައްތައިގެ ލެވީއެއްވެސް ހިމެނެއެވެ. މަގާމާ ހަވާލުވެވަޑައިގަތުމަށްފަހު ސަފީރު ގޯރ ވިދާޅުވީ، ވިޔަފާރީގެ އިތުރުން ސަލާމަތީ ކަންކަމާއި، ޓެރަރިޒަމާ ދެކޮޅަށް މަސައްކަތް ކުރުމާއި، ހަކަތަ، ޓެކްނޮލޮޖީ އަދި ތައުލީމީ ދާއިރާއިންވެސް ދެގައުމުން ގުޅިގެން މަސައްކަތް ކުރާނެ ކަމަށެވެ. އިންޑިއާގެ ބޮޑުވަޒީރު ނަރެންދުރަ މޯދީ ކުރިން އެއްބަސްވެވަޑައިގެންފައިވަނީ 2025 ވަނަ އަހަރުގެ ފަހުކޮޅާ ހަމައަށް ވިޔަފާރީގެ އެއްބަސްވުމަކަށް އައުމަށެވެ. އަދި 2030 ވަނަ އަހަރާ ހަމައަށް ދެގައުމުގެ ދެމެދުގައި ކުރެވޭ ވިޔަފާރީގެ އަގު 500 ބިލިއަން ޑޮލަރަށް އިތުރުކުރުމަށް ވަނީ އަމާޒު ހިފާފައެވެ.

ދެގައުމުގެ ދެމެދުގައި އޮތް 47 ބިލިއަން ޑޮލަރުގެ ވިޔަފާރީގެ ފަރަގު ކުޑަކުރުމަށްޓަކައި، އެމެރިކާއިން 25 ބިލިއަން ޑޮލަރާ ހަމައަށް ހަކަތަ ގަތުމަށާއި، ދިފާއީ ސާމާނު އެތެރެކުރުން އިތުރުކުރުމަށް އިންޑިއާއިން ވަނީ ވައުދުވެފައެވެ.

އިންޑިއާގެ ވިޔަފާރިއާއި ސިނާޢަތްތަކާއި ބެހޭ ވަޒީރު ޕިޔޫޝް ގޯޔާލްވެސް ވަނީ އެމެރިކާއާއެކު ވިޔަފާރީގެ އެއްބަސްވުމަކަށް އައުމަށް މެދުނުކެނޑި މަސައްކަތް ކުރަމުންދާކަން ވިދާޅުވެފައެވެ.