އިސްރާއީލުގެ އިސްތިޢުމާރީ ބާރުތަކުން ޣައްޒާގައި ހިންގަމުންދާ ލާއިންސާނީ ޤަތުލުޢާންމު ހުއްޓުމެއްނެތި ކުރިއަށްދާއިރު، މުޅި ޣައްޒާ ބިމާ ހަމަކޮށް އެ ސަރަޙައްދުން ފަލަސްޠީނުގެ ރައްޔިތުން ފޮހެލުމަށް އިސްރާއީލުން ރާވައިގެން ކުރަމުންދާ މަސައްކަތްތައް އަދިވެސް ދަނީ ކުރިއަށެވެ. 

އޮކްޓޯބަރު 10 ވަނަ ދުވަހު ޤަތުލުޢާއްމު ހުއްޓާލުމަށް އެއްބަސްވި ނަމަވެސް، އިސްރާއީލުގެ ޙަމަލާތަކަށް އެއްވެސް މަޑުޖެހުމެއް އައިސްފައެއް ނުވެއެވެ. އެ ދުވަހުން ފެށިގެން މިހާތަނަށް ދިން ޙަމަލާތަކުގައި 420 އަށްވުރެ ގިނަ ފަލަސްޠީނު ރައްޔިތުން ޝަހީދުވެ، 1,150 އަށްވުރެ ގިނަ މީހުން ވަނީ ޒަޚަމްވެފައެވެ.

އިސްރާއީލުގެ ސިފައިން ދަނީ ވައިގެ މަގުންނާއި އެއްގަމު މަގުން ވަރުގަދަ ޙަމަލާތައް ދީ، ޣައްޒާގެ ބޮޑު ސަރަޙައްދެއް ސުންނާފަތި ކުރަމުންނެވެ.

ޣައްޒާގެ ރައްޔިތުންނަށް ކުރިމަތިވެފައިވަނީ ހަމައެކަނި ބޮމާ ބަޑީގެ ނުރައްކަލެއް ނޫނެވެ. ފެންބޮޑުވުމުގެ ސަބަބުން އެތައް ހާސް ފޭލިގެއެއް ހަލާކުވެފައިވާއިރު، ޙަމަލާތަކުގައި ރެނދުލާފައިވާ ޢިމާރާތްތައް ވެއްޓި އޭގެ ދަށުވެ އެތައް ބަޔަކު ދަނީ މަރުވަމުންނެވެ. މީގެ އިތުރުން، ބޭހާއި ޞިއްޙީ ފަރުވާގެ ނިޒާމު އިސްރާއީލުން ހަލާކުކޮށްލުމުގެ ސަބަބުން، ކިޑްނީ ބަލީގެ 600 އެއްހާ މީހުން ފަރުވާ ނުލިބި ވަނީ މަރުވެފައެވެ.

އިސްރާއީލުގެ މައިގަނޑު ސިޔާސަތަކީ ޣައްޒާގެ ބިން ފޭރިގަނެ، އެތަނުގައި ދިރިއުޅޭ ރައްޔިތުން ބޭރުކޮށްލުމެވެ.

މިގޮތުން، އިންސާނީ އެހީ ފޯރުކޮށްދޭ ޖަމްޢިއްޔާތަކަށް ހުރަސްއަޅައި، ޣައްޒާގެ އިންފްރާސްޓްރަކްޗަރ ނައްތާލުމަށް ބާރުގަދަ އުޞޫލުތަކެއް ވަނީ ކަނޑައަޅާފައެވެ. އިސްރާއީލުން އަލަށް ކަނޑައަޅާފައިވާ "ޔެލޯ ލައިން" ނުވަތަ ރީނދޫ ރޮނގަކީ ޣައްޒާގެ ބިން އިތުރަށް ހަނިކުރުމަށް ދަމާފައިވާ ރޮނގެކެވެ. މި ރޮނގު ހުރަސްކުރާ ކޮންމެ މީހަކު، އުމުރުން ކިތަންމެ ކުޑަ ނަމަވެސް، އިސްރާއީލު ސިފައިން ދަނީ މަރަމުންނެވެ. މިގޮތުން އުމުރުން އެންމެ 8 އަހަރާއި 10 އަހަރުގެ ކުޑަކުދިން ވެސް އިސްރާއީލުގެ އަނިޔާވެރިކަމުން ސަލާމަތެއް ނުވެއެވެ.

މި ޤަތުލުޢާންމުގެ ހިތްދަތިކަން ކޮންމެ ޢާއިލާއަކަށް ވެސް ވަނީ ފޯރާފައެވެ. ޤަތުލްޢާއްމު މެދުކަނޑާލުމުގެ ދެ ހަފުތާ ކުރިން ދިން ޙަމަލާއެއްގައި އެއް ޢާއިލާއެއްގެ 9 މީހުން ޝަހީދުވެފައިވެއެވެ. އޭގެ ތެރޭގައި ކުޑަކުދިންނާއި އަންހެނުން ހިމެނެއެވެ. ޝަހީދުވި ކޮންމެ މީހަކާއެކު ދުނިޔޭގައި ތިބި މީހުންގެ ކޮނޑުގައި އެޅިފައިވާ ޒިންމާ ދަނީ ބޮޑުވަމުންނެވެ. އެއީ މި އަނިޔާވެރިކަމުގެ ހެކިވެރިންގެ ގޮތުގައި ތިބުމާއި، ޔަތީމުވި ކުދިން ބެލެހެއްޓުމުގެ ބުރަ ޒިންމާއެވެ.

އިސްރާއީލުން ޣައްޒާގެ ބިން ހަނިކޮށް، 1948 އިން ފެށިގެން އެ ސަރަޙައްދު ކުޑަކުރަމުން ގޮސް، މިއަދު ވަނީ ޣައްޒާގެ ދެބައިކުޅަ އެއްބަޔަށްވުރެ ބޮޑު ބައެއް ހިފައިފައެވެ. ނަމަވެސް، ޣައްޒާގެ ރައްޔިތުން ބުނަނީ އިސްރާއީލަށް އެމީހުންގެ ގެދޮރާއި ޢިމާރާތްތައް ސުންނާފަތި ކުރެވުނަސް، ފަލަސްޠީނުގެ މިނިވަންކަމަށް ކުރާ އުންމީދާއި، އިންސާފަށް ކުރާ މަސައްކަތް ހުއްޓުވައި ނުލެވޭނެ ކަމަށެވެ.

މި ޤަތުލުޢާންމު ހުއްޓުވުމުގެ ޒިންމާއަކީ ހަމައެކަނި ފަލަސްޠީނުގެ ރައްޔިތުންގެ ޒިންމާއެއް ނޫނެވެ. އެއީ މުޅި ބައިނަލްއަޤްވާމީ މުޖުތަމަޢާއި، ވަކިން ޚާއްޞަކޮށް އިސްރާއީލަށް ހަތިޔާރު ފޯރުކޮށްދޭ ޤައުމުތަކުގެ ބޮޑު ޒިންމާއެކެވެ. ޣައްޒާ އަލުން އާރާސްތުކޮށް، އެތަނުގެ ޞިއްޙީ އަދި ތަޢުލީމީ ނިޒާމު ކޮޅަށް ޖެހުމަކީ އިންސާނިއްޔަތަށްޓަކައި ކުރަންޖެހިފައިވާ ކަމެކެވެ.