ޣައްޒާގައި ހިނގަމުންދާ ހަނގުރާމައިގެ ސަބަބުން އެ ސަރަހައްދު އާރާސްތުކުރުމާއި އިދާރީ ކަންކަން ބެލެހެއްޓުމަށްޓަކައި "ބޯޑް އޮފް ޕީސް" ގެ ނަމުގައި އެމެރިކާއިން އުފައެދި ސުލްހައިގެ ބޯޑަށް ގިނަ ބައެއްގެ ފާޑުކިޔުން ރައްދުވެއްޖެއެވެ. 

އެމެރިކާގެ އޮފިޝަލުން ބުނާ ގޮތުގައި، އެ ގައުމުން މި އެކުލަވާލި ބޯޑުގެ މައިގަނޑު މަގްސަދަކީ އެތައް މަހެއްގެ މެދުކެނޑުމެއްނެތް ހަމަލާތަކުގެ ސަބަބުން ސުންނާފަތިވެފައިވާ ޣައްޒާ އަލުން ބިނާކުރުމުގެ މަސައްކަތްތަކަށް އިރުޝާދުދިނުމާއި، އިތުރު ބައިނަލްއަގުވާމީ އެހީތައް އިންތިޒާމްކުރުމެވެ. މީގެ އިތުރުން، ޣައްޒާގެ މުސްތަގުބަލާ ގުޅޭ ދާއިމީ ސިޔާސީ އޮނިގަނޑެއް އެކުލަވާލުމުގައި ވެސް މި ބޯޑުން އެހީތެރިވެދޭނެ ކަމަށް ބުނެފައިވެއެވެ. މިއީ ހަމަލާބަދަލުކުރުން ހުއްޓާލުމަށާއި ހަމަޖެހުން ގާއިމުކުރުމަށް އެކުލަވާލާފައިވާ ފުޅާ މަޝްރޫއެއްގެ ދެވަނަ މަރުހަލާގެ ދަށުން ނިންމި ނިންމުމެއް ކަމަށް އެމެރިކާއިން ސިފަކުރެއެވެ.

މި ނިންމުމާއެކު، އިސްރާއީލާއި، ފަލަސްތީނާއި، ބައިނަލްއަގުވާމީ އިންސާނީ ހައްގުތަކަށް މަސައްކަތްކުރާ ޖަމާއަތްތަކުގެ ހަރުކަށި ފާޑުކިޔުން އެމެރިކާއަށް ވަނީ އަމާޒުވެފައެވެ.

މި ބޯޑުގައި ފަލަސްތީނުގެ އެއްވެސް މަންދޫބަކު ހިމަނާފައި ނުވާތީ ވެސް ބޮޑެތި ބަހުސްތަކެއް ވަނީ އުފެދިފައެވެ. އިންސާނީ ހައްގުތަކަށް މަސައްކަތްކުރާ ޖަމާއަތްތަކާއި ސަރަހައްދީ މުހައްލިލުން ބުނާ ގޮތުގައި، ފަލަސްތީނުގެ ރައްޔިތުން ބައިވެރިނުކޮށް މިފަދަ ނިންމުންތައް ނިންމުމަކީ މި އިސްނެގުމުގެ ސައްހަކަމާމެދު ސުވާލު އުފެދޭ ކަމެކެވެ. އަދި މިއީ އެ ސަރަހައްދުގެ ރައްޔިތުންގެ ރުހުމެއް ނެތް ގޮތަކަށް، ބޭރުގެ ބާރުތަކުން ގޮތްތަކެއް މަޖުބޫރުކުރުވުން ކަމަށް ވެސް އެ ފަރާތްތަކުން ތުހުމަތުކުރެއެވެ.

ހަމައެއާއެކު، އިސްރާއީލުން ވެސް ވަނީ މިކަމާ ދެކޮޅަށް އަޑުއުފުލާފައެވެ. އިސްރާއީލުން ބުނާ ގޮތުގައި މި ބޯޑު އެކުލަވާލާފައިވަނީ އެކަށީގެންވާ މަޝްވަރާތަކަކާ ނުލައެވެ. އަދި ބޯޑުގެ މަސްއޫލިއްޔަތުތަކަކީ ޣައްޒާގެ ސަލާމަތީ ކަންކަމާއި މުސްތަގުބަލާ މެދު އިސްރާއީލުން ގެންގުޅޭ ސިޔާސަތުތަކާ ފުށުއަރާ ކަންތައްތަކެއް ކަމަށް ވެސް ބުނެފައިވެއެވެ. އިސްރާއީލުގެ ބައެއް އިސްވެރިން ވަނީ މި މަޝްރޫއުގެ މުހިންމު ބައިތަކާ ގުޅުން ކަނޑާލައި، އެކަމަށް ތާއީދު ނުކުރާނެ ކަމަށް ވެސް ފާޅުގައި ބުނެފައެވެ. 

ޣައްޒާގެ އިންސާނީ ހާލަތު އޮތީ އަދިވެސް ނުހަނު ނުރައްކާތެރި އަދި ދަތި ހާލަތެއްގައެވެ. އެހީދޭ ޖަމިއްޔާތަކުން ހާމަކުރާ ގޮތުގައި، ގިނަ ބަޔަކު ގެދޮރު ދޫކޮށް ދާންޖެހުމާއި، ކާބޯތަކެއްޗާއި ބޭސްފަރުވާގެ ސާމާނަށް އިންތިހާއަށް ޖެހިފައިވުމުގެ އިތުރުން، އެ ސަރަހައްދުގެ ސިއްހީ ނިޒާމު ވަނީ ބޮޑުތަނުން ބަލިކަށިވެ، ބޭނުންވާ ޚިދުމަތްތައް ފޯރުކޮށްދިނުމަށް ނުކުޅެދިފައެވެ. އަދި ފިނި މޫސުމުގެ ގަދަ ފިންޏާއެކު، ހަލާކުވެފައިވާ އިމާރާތްތަކުގައާއި ވަގުތީ ހިޔާވަހިކަމުގައި ދިރިއުޅެމުންދާ އެތައް ލައްކަ ބައެއްގެ ހާލަތު ވަނީ އިތުރަށް ގޯސްވެފައެވެ.

ޣައްޒާގައި ސުންނާފަތިވެފައިވާ ބިމެއް-- ފޮޓޯ/ އޭބީސީ ނިއުސް

ރަސްމީގޮތުން ހަނގުރާމަ ހުއްޓާލާފައި އޮތް ނަމަވެސް، ދޭތެރެ ދޭތެރެއިން ހިނގާ ކުރިމަތިލުންތަކާއި އެއްބަސްވުމާ ޚިލާފުވާ މައްސަލަތަކުގެ ސަބަބުން މަސްލަހަތު ގާއިމުކުރުމަށް ވަނީ ބޮޑެތި ހުރަސްތަކެއް ކުރިމަތިވެފައެވެ. 

"ބޯޑް އޮފް ޕީސް" ނުވަތަ ސުލްހައިގެ މަޖިލީހާ ބެހޭގޮތުން ބައިނަލްއަގުވާމީ މައިދާނުގައި ބަހުސްތައް ވަރުގަދަވަމުންދާއިރު، މި އިސްނެގުމުގެ ސަބަބުން ސިޔާސީ ގޮތުން އުފެދިފައިވާ ބޮޑެތި ޚިޔާލުތަފާތުވުންތައް ނައްތާލައި، ހަނގުރާމައިގެ ސަބަބުން ހާލުގައި ޖެހިފައިވާ ޣައްޒާގެ ރައްޔިތުންނަށް ހަގީގީ އެހީތެރިކަމެއް ލިބިދާނެތޯ ގިނަ ބަޔަކު ދަނީ ސުވާލު އުފައްދަމުންނެވެ.