ވައިޓް ހައުސްގައި އިއްޔެ ބޭއްވި ނޫސްވެރިންގެ ބައްދަލުވުމެއްގައި އެމެރިކާގެ ރައީސް ޑޮނަލްޑް ޓްރަމްޕް ވާހަކަދެއްކިއިރު ބައެއް ލަފްޒުތައް ކިޔަން އުނދަގޫވެ، ބަސްމަގު އޮޅުމުގެ ސަބަބުން އޭނާގެ ސިއްހީ ހާލަތާ މެދު ގިނަ ބަޔަކު ކަންބޮޑުވުން ފާޅުކުރަން ފަށައިފިއެވެ.

ވައިޓް ހައުސްގެ ޕްރެސް ސެކްރެޓަރީ ކެރޮލީން ލީވިޓްއާ އެކު ބޭއްވި މި ބައްދަލުވުމުގައި ޓްރަމްޕް ވަނީ އިމިގްރޭޝަން އެންފޯސްމަންޓް (ICE) އިން ހައްޔަރުކޮށްފައިވާ ބައެއް ނުރައްކާތެރި މީހުންގެ ފޮޓޯތަކެއް ދައްކާފައެވެ. "މިނެސޯޓާ، ވޯސްޓް އޮފް ވޯސްޓް" ޖަހާފައިވާ މި ބޯޑުތައް ދައްކަމުން ޓްރަމްޕް ވަނީ އެމީހުންގެ މައްޗަށް ކުރެވިފައިވާ ތުހުމަތުތައް ބުނެދީފައެވެ.

ނަމަވެސް، މި ހަރަކާތުގެ ތެރޭގައި އެކަކުގެ މައްޗަށް ކުރެވިފައިވާ "އިންޓެންޝަނަލް މާޑަރ" (ގަސްދުގައި މީހަކު މެރުން) މި ލަފްޒުގެ ބަދަލުގައި ޓްރަމްޕަށް ބުނެވުނީ "އިންޓަނޭޝަނަލް މާޑަރ" (ބައިނަލްއަގުވާމީ މީހަކު މެރުން) މިހެންނެވެ. މީގެ އިތުރުން، ތިން މަހުގެ ތުއްތު ދަރިފުޅު މަރާލި ކަމުގެ ތުހުމަތު އޮތް އަލްޑްރިން ގުއެރޭރޯ-މުނޯޒްގެ ނަން ކިޔުމަށް ވެސް ޓްރަމްޕަށް ބޮޑެތި އުނދަގޫތަކަކާ ކުރިމަތިވިއެވެ.

މިކަމާ ގުޅިގެން ސޯޝަލް މީޑިއާގައި ގިނަ ބަޔަކު ދަނީ ޓްރަމްޕަށް ފާޑުކިޔަމުންނެވެ. އެގޮތުން، އެކްސްގައި ހިޔާލު ފާޅުކުރި ބައެއް މީހުން ބުނެފައިވަނީ ޓްރަމްޕްގެ ހާލަތާއި އޭނާގެ ބުންވަރު ވަރަށް ދަށްކޮށް ފެންނަ ކަމަށާއި، އޭނާގެ ސިކުނޑި މިހާރު ރަނގަޅަށް މަސައްކަތް ނުކުރާ ކަމަށް ބެލެވޭ ކަމަށެވެ. އަދި ގައުމެއްގެ ކޮމާންޑަރ އިން ޗީފްގެ ކިބައިގައި ހުންނަންޖެހޭ ފަދަ ހުށިޔާރުކަމެއް އޭނާގެ ކިބައިން ނުފެންނަ ކަމަށް ވެސް ބައެއް މީހުން ފާހަގަކޮށްފައިވެއެވެ.

ނޫސްވެރިންގެ ބައްދަލުވުމުގައި ވާހަކަދައްކަމުން ޓްރަމްޕް ބުނީ، ICE އިން ކުރަމުންދާ މަސައްކަތަކީ އެފަދަ ކުށްވެރިން ގައުމުން ބޭރުކުރުން ކަމަށާއި، ނަމަވެސް އެކަމަށް ހުރަސްއެޅުމަށް "ފޭކް" މުޒާހަރާކުރާ މީހުންނާއި ހަމަނުޖެހުން ހިންގާ މީހުން މަސައްކަތް ކުރަމުންދާ ކަމަށެވެ.

ވައިޓް ހައުސްގެ ޕްރެސް ބްރީފިންތަކަކީ ފަހަކަށް އައިސް ވަރަށް ބޮޑަށް ހޫނު ބަހުސްތަކެއް ހިނގާ ތަނަކަށް ވަނީ ވެފައެވެ. މިދިޔަ ހަފްތާގައި ވެސް ލީވިޓް ވަނީ ނޫސްވެރިއަކާ ދިމާލަށް "ވާތު ފިޔައިގެ އެކްޓިވިސްޓެއް" ކަމަށް ބުނެ ބަހުގެ ހަމަލާތަކެއް ރައްދުކޮށްފައެވެ.

ޓްރަމްޕްގެ އުމުރުން މިހާރު 79 އަހަރުވެފައިވާއިރު، އޭނާގެ ރިޔާސީ ދައުރު ނިމޭއިރު އުމުރުން 82 އަހަރުވާނެއެވެ.

މިއާއެކު، އޭނާގެ ކުރިން ރައީސްކަން ކުރި ޖޯ ބައިޑަންގެ ރެކޯޑު މުގުރާލައި، އެމެރިކާގެ ތާރީޚުގައި ވެރިކަން ކުރި އެންމެ އުމުރުން ދުވަސްވީ ރައީސްގެ ޝަރަފު ޓްރަމްޕަށް ލިބިގެންދާނެއެވެ.

ނަމަވެސް، ބައިޑަންގެ އުމުރާއި ސިއްހީ ހާލަތާ މެދު ގިނަ ބަޔަކު ސުވާލު އުފެއްދި ފަދައިން، ޓްރަމްޕަށް ވެސް ވަނީ މިފަދަ ފާޑުކިޔުންތަކެއް އަމާޒުވާން ފަށާފައެވެ. ޖެނުއަރީ 2025 ގައި ދެވަނަ ދައުރަކަށް މަގާމާ ހަވާލުވުމަށްފަހު، ރަސްމީ އެކި ހަފުލާތަކުގައި އޭނާއަށް ނިދިޖެހިފައި އިންނަ މަންޒަރު ފެނިފައިވާއިރު، މިދިޔަ ޑިސެމްބަރު މަހު ނަގާފައިވާ އޭނާގެ އަތުގެ ފޮޓޯތަކުން، އަތުގައި މޭކަޕްގެ ބޯ ފަށަލައެއް އުނގުޅާފައިވާކަން ވަނީ ފާހަގަކުރެވިފައެވެ.