މެންޗެސްޓަރ ސިޓީގެ މެނޭޖަރު ޕެޕް ގާޑިއޯލާ، ފަލަސްތީނުގެ ރައްޔިތުންނާއެކު ސާބިތުކަމާއެކު ހުރިކަން ހާމަކޮށް، ގައްޒާގެ ކުޑަކުދިންނަށް ދުނިޔެއިން އިހުމާލުވެފައިވާ ކަމަށް ބުނެ އަސަރުގަދަ މެސެޖުތަކެއް ދީފިއެވެ.
އޭނާ މިހެން ބުނީ ބާސެލޯނާގައި ބޭއްވި "ކޮންސަޓް ފޯ ފަލަސްތީން" ހަރަކާތުގައި ވާހަކަދައްކަމުންނެވެ.
ގާޑިއޯލާގެ ވާހަކައިގައި ފަލަސްތީނުގެ މައްސަލައަކީ މުޅި އިންސާނިއްޔަތާ ގުޅިފައިވާ ކަމެއްގެ ގޮތުގައި ސިފަކުރިއެވެ.
"އަޅުގަނޑުމެން މިތިބީ އަނިޔާ ލިބެމުންދާ މީހުންނާއެކު. މިއަދު އަޅުގަނޑުމެން މިތިބީ ފަލަސްތީނާއެކު. މިއީ ހަމައެކަނި ފަލަސްތީނަށްޓަކައި ކުރާ ކަމެއް ނޫން، މިއީ އިންސާފުވެރި ކަމަށްޓަކައި ކުރާ ކަމެއް. މިއީ ފަލަސްތީނާއި އިންސާނިއްޔަތަށްޓަކައި ކުރާކަމެއް،" ގާޑިއޯލާ ބުންޏެވެ.
ތާރީޚީ ކަންކަމަށް އަލިއަޅުވާލަމުން ގާޑިއޯލާ ވަނީ 1938 ވަނަ އަހަރު ބާސެލޯނާއަށް ދިން ބޮމުގެ ހަމަލާތައް ހަނދާން އާކޮށްފައެވެ. އޭނާ ފާހަގަކުރި ގޮތުގައި ބާސެލޯނާ، ލަންޑަން އަދި ޕެރިސް ފަދަ ސިޓީތަކަށް އަނިޔާލިބުމަކީ ކޮބައިކަން ތާރީޚުގެ ތެރެއިން އެނގޭނެއެވެ.
"މިއަދު މުޅި ދުނިޔޭގެ ކުރިމަތީގައި އަޅުގަނޑުމެން މިއޮތީ ފާޅުކަން ބޮޑު ގޮތެއްގައި އެންމެ ނިކަމެތި މީހުންގެ ފަރާތުގައި،" އޭނާ އިތުރަށް ބުންޏެވެ.
ގައްޒާގެ ހާލަތާ މެދު އޭނާގެ އަމިއްލަ އިހުސާސްތައް ހިއްސާކުރަމުން ގާޑިއޯލާ ބުނީ، އިމާރާތްތަކުގެ ކުނިބުނިތަކުގެ ތެރޭގައި ހުރެގެން "މަންމަ ކޮބައިތޯ" އަހައި ރޮމުންދިޔަ ކުޑަކުއްޖެއްގެ ވީޑިއޯ ފެނުނު ކަމަށެވެ. އެ ކުއްޖާއަށް ވެގެން އުޅޭ ގޮތްވެސް އޭރު ނޭނގޭ ކަމަށް އޭނާ ބުންޏެވެ.
"އަހަރެން އަބަދުވެސް ވިސްނަން އެ ކުދިންގެ ހިތަށް އަރާނީ ކީކޭ ބާވައޭ. އަޅުގަނޑުމެން އެކުދިން އެކަނި ދޫކޮށްލައިފި. އަޅާނުލައި ބާކީކޮށްލައިފި،" އޭނާ ބުންޏެވެ.
ބައިނަލްއަގުވާމީ މުޖުތަމައުން މިކަމުގައި ފިޔަވަޅެއް ނާޅާތީ އެކަމާ ކަންބޮޑުވުން ފާޅުކުރަމުން ގާޑިއޯލާ ބުނީ، އެ ކުދިން އެހީއަށް އެދި ގޮވަމުންދާ އަޑު އޭނާއަށް އިވޭ ފަދަ ކަމަށެވެ.
"އަޅުގަނޑަށް ސިފަވަނީ އެ ކުދިން ބުނާ ކަހަލަ 'ތިމީހުން ތިބީ ކޮންތާކު؟ އައިސް އަހަރެމެންނަށް އެހީވެދީބަލަ'. ނަމަވެސް މިހާތަނަށްވެސް، އަދި މިހާރުވެސް އަޅުގަނޑުމެންނަށް އެ އެހީއެއް ނުވެވުނު. އަޅުގަނޑުމެން އެކުދިން އެކަނި ދޫކޮށްލައިފި،" ގާޑިއޯލާގެ ވާހަކަ ނިންމާލަމުން ބުންޏެވެ.
Advertisement
This content is created and paid for by advertisers and does not involve Voice Journalists
