ހިޔާޓަވަރު 5 ގައި އިއްޔެ އިރުއޮއްސުނުފަހުން ހިނގި އަލިފާނުގެ ހާދިސާއާ ގުޅިގެން ކުރިން ލަފާކުރި ވަރަށްވުރެ ލިބުނު ގެއްލުންތައް ބޮޑުވެއްޖެއެވެ.

މިކަމާ ގުޅިގެން ނެޝަނަލް ޑިޒާސްޓާ މެނޭޖްމަންޓް އޮތޯރިޓީން މިއަދު ހެނދުނު އެކްސްގައި ކުރި ޕޯސްޓެއްގައި އެންމެ ފުރަތަމަ ބުނެފައިވަނީ، އަލިފާނުގެ ހާދިސާއާއި ގުޅިގެން އެ ޓަވަރުގެ 7 އެޕާޓްމަންޓެއްގެ 37 ފަރާތަކަށް ވަގުތީ ބޯހިޔާވަހިކަން ފޯރުކޮށްދީފައިވާކަމަށެވެ.

ނަމަވެސް އޭގެ ފަހުން ކުރި ޕޯސްޓެއްގައި ބުނެފައިވަނީ، އެހީތެރިކަން ބޭނުންވެގެން ރިޕޯޓުކޮށްފައިވާ 18 އެޕާޓްމަންޓްގައި ދިރިއުޅޭ 85 ފަރާތަކަށް ވަގުތީ ބޯހިޔާވަހިކަން ހަމަޖައްސައިދީފައިވާކަމަށެވެ. މީގެ އިތުރުން އެފަރާތްތަކަށް ކެއުން ބުއިމަށްވެސް އެހީ ފޯރުކޮށްދީފައިވާކަމަށް ޑިޒާސްޓާއިން ވަނީ ބުނެފައެވެ.

ޑިޒާސްޓާއިން ބުނީ އަލިފާނުގެ ހާދިސާގައި 5 ވަނަ ޓަވަރުގެ 38 އެޕާޓްމަންޓުގެ ނަރުދަމާ ހޮޅިތަކަށް ގެއްލުން ލިބިފައިވާކަމަށެވެ.

އަލިފާނުގެ ހާދިސާގައި އޭސީ އައުޓްޑޯ ޔުނިޓެއް އަނދާފައި.. ފޮޓޯ: ވޮއިސް

މި ހާދިސާއަށް ފަހު ނަރުދަމާއަށް ލިބުނު ގެއްލުން ދެނެގަނެ ގެއްލުންތައް މަރާމާތުކުރުމުގެ މަސައްކަތް އެޗް.ޑީ.ސީ.އިން ދަނީ ކުރަމުންނެވެ. އެންޑީއެމްއޭއިން ބުނީ އަލިފާނުގެ ހާދިސާއާ ގުޅިގެން އިތުރަށް ބަލަން ޖެހޭ ކަންކަން އެޗް.ޑީ.ސީ އާ ގުޅިގެން ބަލަމުން އަންނަކަމަށެވެ.

ހިޔާ ޓަވަރު 5 ގައި ހިނގާދިޔަ އަލިފާނުގެ ހާދިސާ ހިނގާފައިވަނީ ވައިގޮޅީގެ ތެރޭގައި ހަރުލާފައިހުރި ކުނިތަކެއްގައި ރޯވެގެންނެވެ. މި ހާދިސާ ހިނގަން ދިމާވި ސަބަބު އަދި މިހާތަނަށް ހޯދިފައެއް ނުވެއެވެ.