ހިޔާޓަވަރު 5 ގައި އިއްޔެ އިރުއޮއްސުނުފަހުން ހިނގި އަލިފާނުގެ ހާދިސާގައި 140 މީހަކަށް ވަގުތީ ބޯހިޔާވަހިކަން ފޯރުކޮށްދީފި އެވެ.

ނެޝަނަލް ޑިޒާސްޓާ މެނޭޖްމަންޓް އޮތޯރިޓީން ބުނީ ހިޔާގެ އަލިފާނުގެ ހާދިސާއާ ގުޅިގެން އެހީތެރިކަން ބޭނުންވެގެން ގުޅި 30 އެޕާޓްމަންޓެއްގައި އުޅޭ 140 މީހުންނަށް ވަނީ ވަގުތީ ބޯހިޔާވަހިކަން ހޯދުމަށާއި ކެއިން ބުއިމުގެ ކަންކަން ހަމަޖެއްސުމަށް އެހީތެރިކަން ފޯރުކޮށްދީފައިވާ ކަމަށެވެޒ

މީގެ ތެރޭގައި ހިމެނެނީ 49 ފިރިހެނުންނާއި 48 އަންހެނުންނާއި 43 ކުޑަކުދިން ކަމަށް ވެސް ބުންޏެވެ.

ޑިޒާސްޓާއިން ބުނީ އަލިފާނުގެ ހާދިސާގައި 5 ވަނަ ޓަވަރުގެ 38 އެޕާޓްމަންޓުގެ ނަރުދަމާ ހޮޅިތަކަށް ގެއްލުން ލިބިފައިވާ ކަމަށެވެ.

މި ހާދިސާއަށް ފަހު ނަރުދަމާއަށް ލިބުނު ގެއްލުން ދެނެގަނެ ގެއްލުންތައް މަރާމާތުކުރުމުގެ މަސައްކަތް އެޗްޑީސީއިން ދަނީ ކުރަމުންނެވެ. އެންޑީއެމްއޭއިން ބުނީ އަލިފާނުގެ ހާދިސާއާ ގުޅިގެން އިތުރަށް ބަލަން ޖެހޭ ކަންކަން އެޗް.ޑީ.ސީ އާ ގުޅިގެން ބަލަމުން އަންނަކަމަށެވެ.

ހިޔާ ޓަވަރު 5 ގައި ހިނގާދިޔަ އަލިފާނުގެ ހާދިސާ ހިނގާފައިވަނީ ވައިގޮޅީގެ ތެރޭގައި ހަރުލާފައިހުރި ކުނިތަކެއްގައި ރޯވެގެންނެވެ. މި ހާދިސާ ހިނގަން ދިމާވި ސަބަބު އަދި މިހާތަނަށް ހޯދިފައެއް ނުވެއެވެ.