ދެ އިންތިހާބު އެއްކޮށްލުމާ މެދު ހިޔާލު ހޯދުމުގެ ވޯޓު އޭޕްރީލްގައި ނެގޭނީ މި މަހުގެ 18 އަށް ބިލް ނިންމައިގެން: އީސީ
ކުރިއަށް އޮތް ލޯކަލް ކައުންސިލް އިންތިހާބާ އަންހެނުންގެ ތަރައްގީއަށް މަސައްކަތްކުރާ ކޮމިޓީ މެންބަރުންގެ އިންތިހާބު ބާއްވާއިރު، ރިޔާސީ އިންތިޚާބާ، ރަައްޔިތުންގެ މަޖިލީހުގެ އިންތިހާބު އެކުއެކީގައި ބޭއްވުމާ މެެދު ރައްޔިތުންނަށް ފެންނަ ގޮތެއް ބަލަން ބާއްވަން ޖެހޭ ރިފަރެންޑަން އެކު ބޭއްވޭނީ ގާނޫނުއަސާސީ އަށް ގެންނަ ބަދަލުގެ މަަސައްކަތް މިމަހުގެ 18 ގެ ކުރިން ނިންމައިގެން ކަމަށް އިލެކްޝަންް ކޮމިޝަން (އީސީ) އިން މިއަދު ބުނެފި އެވެ.
ދެ އިންތިހާބު އެއްކޮށް ބާއްވާ ގޮތަށް ގާނޫނުއަސާސީ ބަދަލުކުރަން ސަރުކާރުގެ ފަރާތުން ހުށަހަޅާފައިވާ ބިލަށް، ކަމާބެހޭ ފަރާތްތަކުގެ ހިޔާލު ހޯދަން މަޖިލީހުގެ މިނިވަން މުވައްސަސާތަކާ ބެހޭ ކޮމިޓީން މިއަދު ވަނީ ބައްދަލުވުންތައް ބާއްވާފައެވެ.
އެގޮތުން އީސީއާއި ބަންޑާރަ ނާއިބުގެ އޮފީހާއެކު ބޭއްވި ބައްދަލުވުމުގައި ވާހަކަ ދައްކަވަމުން އީސީގެ ރައީސް މުހައްމަދު ޒާހިދު ވިދާޅުވީ، ގާނޫނުގައި ވާގޮތުގެ މަތީން ރިފަރެންޑަމްއަކަށް ދިޔުމަށް ނިންމައިފި ނަމަ އެކަން އިލެކްޝަން ކޮމިޝަނުން ކުރާނެ ކަމަށެވެ. އެހެން ނަމަވެސް ކައުންސިލް އިންތިޚާބާއެކު ރިފަރެންޑަމް ވޯޓު ނެގޭނީ މިމަހު 18ގެ ކުރިން ގާނޫނަށް ބަދަލު ގެނެވިގެން ކަމަށް އޭނާ ވިދާޅުވިއެވެ
ނަމަވެސް އެކަމަށްޓަކައި 45 ދުވަސް އެބަ ދޭންޖެހޭ. ދެން ކުރިއަށް މިއޮތް ލޯކަލް ކައުންސިލް އިންތިޚާބާ މި ދޭތި (ރިފަރެންޑަމް) އެއްވެގެން އަޅުގަނޑުމެންނަށް ބޭއްވޭނީ، އެންމެ ފަހުގެ ތާރީޚެއްގައި ނަމަ 18 ފެބްރުއަރީގައި އެކަން ނިމިގެން އަންނަ ނަމަ. މި ދެންނެވީ ހުރިހާ މަރުހަލާ ތަކެއް ނިމިގެން ރައްޔިތުންގެ ވޯޓަކަށް އަހާން އެކުގައި ބޭއްވޭނީ.
އީސީގެ ރައީސް މުހައްމަދު ޒާހިދު
މީގެ އިތުރުން ޒާހިދު ވިދާޅުވީ، ލޯކަލް ކައުންސިލް އިންތިޚާބާއި، އަންހެނުންގެ ތަރައްޤީއަށް މަސައްކަތްކުރާ އިންތިޚާބުގެ އިތުރުން ރިފަރެންޑަމް ވޯޓު ނަގާނަމަ، އެކަމަށް އިތުރު ބަޖެޓެއް ބޭނުންވާނެ ކަމަށެވެ. އެގޮތުން، ކައުންސިލް އިންތިޚާބާއެކު ރިފަރެންޑަމް ބާއްވާނަމަ އިތުރު 20 މިލިއަން ރުފިޔާގެ ބަޖެޓެއް ބޭނުންވާނެ ކަމަށް އޭނާ ވިދާޅުވިއެވެ.
އެ ބަޖެޓަކީ ކަރުދާސް ޗާޕުކުރަންޖެހޭނެ. އަދި އަޅުގަނޑުމެން އޮފިޝަލުން ގޮތުގައި މަސައްކަތްކުރާ މީހުން އިތުރަށް މަސައްކަތްކުރަންޖެހޭނެ. ފަހަރެއްގައި އިތުރު އޮފިޝަލުން ނަގާންވެސް ޖެހޭނެ.އެ ހާލަތެއްގައި އެމީހުންނަށް ދޭންޖެހޭ އިތުރު އެލަވަންސްއެއް އޭގެ ތެރެއަށް އަންނާނެ. މީގެ އިތުރުން ކައުންސިލް އިންތިޚާބަށް ބޭނުންވާ ފޮށިތައްވެސް މިހާރު ރަށްރަށަށް ފޮނުވާފައި ވާނީ. ރިފަރެންޑަމް ބާއްވައްޏާ އިތުރު ފޮށިވެސް ބޭނުންވާނެ.
އީސީގެ ރައީސް މުހައްމަދު ޒާހިދު
ޒާހިދު ވިދާޅުވީ ކަން ދިމާވާ ގޮތަކުން، ފޮށިތައް ފޮނުވުމުގެ ކަންކަން ފަދަ ކަންކަމަށް އިތުރު ފައިސާވެސް ޚަރަދުވެދާނެ ކަމަށާ، ނަމަވެސް ފޮށިތައް ފޮނުވުމުގެ ކަންކަމުގައި އައިލެންޑް އެވިއޭޝަނާއި އެމްޓީސީސީގެ އެހީ ލިބިއްޖެ ނަމަ، 20 މިލިއަނެއްހާ ރުފިޔާގެ ބަޖެޓުން ވާނެ ކަމަށެވެ.
Advertisement
This content is created and paid for by advertisers and does not involve Voice Journalists
