އެމެރިކާއާއި އިންޑިއާއާ ދެމެދު އުފެދިފައިވާ އިގްތިސާދީ އަދި ސިޔާސީ ނުތަނަވަސްކަން ކުޑަކުރުމަށްޓަކައި، ވިޔަފާރީގެ އާ އެއްބަސްވުމެއްގައި ދެ ގައުމުން ސޮއިކޮށްފިއެވެ.
މި އެއްބަސްވުމުގައި އެމެރިކާގެ ފަރާތުން ސޮއިކޮށްފައިވަނީ އެގައުމުގެ ރައީސް ޑޮނަލްޑް ޓްރަންޕެވެ. އަދި އިންޑިއާގެ ފަރާތުން ސޮއި ކޮށްފައިވަނީ އެގައުމުގެ ބޮޑުވަޒީރު ނަރެންދްރަ މޯދީއެވެ.
ދުނިޔޭގެ އެންމެ ބޮޑު ދެ ޑިމޮކްރަސީގެ މެދުގައި އޮތް ގުޅުން އިތުރަށް ބަދަހިކުރުމުގެ މަގްސަދުގައި އެކުލަވާލި މި އެއްބަސްވުމުގެ ދަށުން، ވިޔަފާރީގެ ހުރަސްތައް ނައްތާލައި، އިމްޕޯޓް ޑިއުޓީ ނުވަތަ ޓެރިފް ކުޑަކުރުމަށް ވަނީ ނިންމާފައެވެ. ރޮއިޓާސްއާއި ވޮޝިންޓަން ޕޯސްޓުން ރިޕޯޓްކޮށްފައިވާ ގޮތުގައި، މީގެ ސަބަބުން ދެ ގައުމުގެ ވިޔަފާރިވެރިންނަށްވެސް މާކެޓްގެ ފުރުސަތުތައް ފުޅާވެގެންދާނެއެވެ.
މި އެއްބަސްވުމުގެ ދަށުން، އިންޑިއާގެ އުފެއްދުންތަކުން އެމެރިކާއިން ނަގަމުންދިޔަ ޓެރިފް ކުޑަކުރުމަށް ވޮޝިންޓަނުން ވަނީ އެއްބަސްވެފައެވެ. އެގޮތުން މި އަދަދު މިހާރުވަނީ %18 އަށް ކުޑަކޮށްފައެވެ. މިއީ ފަހަކަށް އައިސް ބޮޑެތި ޓެކްސްތަކެއް ދައްކަން ޖެހުމުގެ ސަބަބުން ދަތިތަކާ ކުރިމަތިލާންޖެހުނު އިންޑިއާގެ އެކްސްޕޯޓަރުންނަށް ލިބުނު ބޮޑު ކުރިއެރުމެކެވެ.
އަދި މީގެ ބަދަލެއްގެ ގޮތުން، އިންޑިއާއިންވެސް ވަނީ އެމެރިކާގެ ބައެއް އުފެއްދުންތަކުން ނަގާ ޓެރިފް ކުޑަކުރުމަށް ނިންމާފައެވެ. މީގެ ތެރޭގައި ދަނޑުވެރިކަމާއި، އުފެއްދުންތެރިކަމާއި، އަދި ޓެކްނޮލޮޖީގެ ދާއިރާ ހިމެނެއެވެ. އަދި އެ ގައުމުން ވަނީ ރަޝިއާއިން އުފައްދާ ތެލުގެ ބާވަތްތައްވެސް ނުގަތުމަށޤ އެއްވަސްވެފައެވެ. މި ދެ ގައުމުގެ އޮފިޝަލުން ވިދާޅުވާ ގޮތުގައި، މި ނިންމުމުގެ ސަބަބުން ވިޔަފާރީގެ ގުޅުން ހަމަހަމަވެ، ދިގު މުއްދަތުގެ އިގްތިސާދީ އެއްބާރުލުމަށް މަގުފަހިވާނެއެވެ.
މި އެއްބަސްވުމަކީ ޓެރިފްގެ މައްސަލަތަކާއި ޖިއޯޕޮލިޓިކަލް ކަންބޮޑުވުންތަކުގެ ސަބަބުން ދިގުލައިގެން ދިޔަ މަޝްވަރާތަކަކަށްފަހު ވެވުނު އެއްބަސްވުމެކެވެ. މި ދެ ގައުމުގެ ދިފާއީ އަދި ސަލާމަތީ ކަންކަމުގައި ގުޅުން ބަދަހިވަމުން އައި ނަމަވެސް، ވިޔަފާރީގެ ދާއިރާގައި ހުރި ހިޔާލުތަފާތުވުންތަކުގެ ސަބަބުން ގުޅުމަށް ކޮންމެވެސް ވަރެއްގެ މަޑުޖެހުމެއް އައިސްފައިވެއެވެ. ކަމާބެހޭ މާހިރުން ވިދާޅުވާ ގޮތުގައި، މި އާ އެއްބަސްވުމަކީ ދެ ގައުމުގެ މެދުގައި ހުރި ހިޔާލުތަފާތުވުންތައް އެއްފަރާތްކޮށް، ދެ ގައުމަށްވެސް ފައިދާހުރި އިގްތިސާދީ މަސްލަހަތުތަކަށް އިސްކަންދޭން ތައްޔާރަށް ތިބިކަމުގެ ހެއްކެކެވެ.
މި ދެ ގައުމުގެ ވިޔަފާރިވެރިންގެ ޖަމިއްޔާތަކުން ވަނީ މި ނިންމުމަށް މަރުހަބާ ކިޔާފައެވެ. އެ ފަރާތްތަކުން ބުނާ ގޮތުގައި މިއީ އިގްތިސާދީ ގުޅުން އިތުރަށް ބަދަހިކުރުމަށް އެޅުނު މުހިންމު ފިޔަވަޅެކެވެ. އެހެންނަމަވެސް، ހައްލުނުވެ ހުރި ބައެއް ކަންކަމުގައި އިތުރު މަޝްވަރާތައް ބޭނުންވާކަން ބައެއް ފަރާތްތަކުން ފާހަގަކުރެއެވެ.
މި އެއްބަސްވުމުގެ ފުރިހަމަ ތަފްސީލާއި އަމަލީ ގޮތުން ތަންފީޒުކުރަން ފަށާނެ ތާވަލުތައް ކުރިއަށް އޮތް ތަނުގައި ހާމަކުރާނެ ކަމަށް ރިޕޯޓުކޮށްފައިވެއެވެ. މަޝްރަހު ދިރާސާކުރާ ފަރާތްތަކުން ވިދާޅުވާ ގޮތުގައި މިއީ ހަމައެކަނި އިގްތިސާދީ ކުރިއެރުމެއް ނޫނެވެ. އޭގެ ބަދަލުގައި، މިއީ ދުނިޔޭގެ މަސްރަހަށް އަންނަމުންދާ ބަދަލުތަކާއެކު، ދެ ގައުމުގެ ދެމެދުގައި އޮތް ސްޓްރެޓީޖިކް ގުޅުމަށް ދެ ފަރާތުންވެސް ދޭ އަހަންމިއްޔަތު ހާމަކޮށްދޭ ކަމެކެވެ.
Advertisement
This content is created and paid for by advertisers and does not involve Voice Journalists
