ރިޔާސީބަޔާން އިއްވުން: ބަޔާނުގެ ވަކި ހިސާބަކުން އިދިކޮޅު މެމްބަރުންގެ ޖެއްސުންކުރުންތައް ފެށިއްޖެ
ރައީސުލްޖުމްހޫރިއްޔާ ރިޔާސީބަޔާން އިއްވަން ފެށިތާ އިރުކޮޅެއްފަހުން އިދިކޮޅު މެމްބަރުން ޖެއްސުންކުރަން ފަށައިފިއެވެ.
މިއަދުގެ ރިޔާސީބަޔާން އިއްވަން ފެށިއިރު މަޖިލީހުގެ މާލަމް ވަރަށް އަމާން އޮމާންކޮށް ދިޔަނަމަވެސް ވަކި ހިސާބަކުން އެމްޑީޕީއަށް ނިސްބަތްވެ ވަޑައިގަންނަވާ އިދިކޮޅު ބައެއް މެމްބަރުން ވަނީ، ބަޔާނަށް ހުރަސްއެޅުމުގެ ގޮތުން ކަށިގަނޑު ފުމެން ފަށާފައެވެ. އޭރު ރައީސުލްޖުމްހޫރިއްޔާގެ ވާހަކަފުޅު އަމާޒުކުރައްވާފައިވަނީ ދީނާ ސިޔާސަތާ ގުޅޭގޮތުންނެވެ. އިދިކޮޅު ބައެއް މެމްބަރުން ކަށިގަނޑު ފުމުނު ނަމަވެސް ފަސްވަރަކަށް މިނެޓްފަހުން ވަނީ ހުއްޓާލާފައެވެ.
އަދި ފަހުން ޗާގޯސް މައްސަލައާ ގުޅޭގޮތުން ވާހަކަ ދައްކަން ފެށުމުން އިދިކޮޅު މެމްބަރުން ވަނީ ގޮނޑިކޮޅުތަކުން ތެދުވެ އިހުތިޖާޖުކުރަން ފައްޓަވާފައެވެ. އިދިކޮޅު މެމްބަރުން އިހުތިޖާޖުކުރައްވަމުން ގެންދަވަނިކޮށް ރައީސް ވަނީ ވަރަށް މުހިންމު ނިންމުމެއް ނިންމަވާފައިވާކަން އިއުލާނުކުރައްވާފައެވެ. އެގޮތުން ކުރީ ސަރުކާރުން ދޫކޮށްލިކަން އަންގައި މޮރިސަސްގެ ބޮޑުވަޒީރަށް ފޮނުއްވެވި ސިޓީ އަނބުރާ ގެނައުމަށް ނިންމެވިކަން ރައީސް ވަނީ ވަނީ އިއުލާނުކުރައްވާފައެވެ.
އިދިކޮޅު ބައެއް މެމްބަރުން މަޖިލީހުގައި އަޑުގަދަކުރައްވަން ފެއްޓެވުމާއެކު މަޖިލީހުގެ ރައީސް ވަނީ ބައެއް މެމްބަރުންގެ ނަންފުޅުތައް އިއްވައި ތަޅުމުން ނިކުމެ ވަޑައިގަތުމަށް އަންގަވާފައެވެ.
ރިޔާސީ ބަޔާން އިއްވާ ދުވަހާ ގުޅޭގޮތުން އިދިކޮޅު އެމްޑީޕީއަށް ނިސްބަތްވާ މަޖިލީހުގެ މެމްބަރުން އިއްޔެ ނޫސްވެރިންގެ ބައްދަލުވުމެއް ބާއްވާފައިވާއިރު، ރިޔާސީ ބަޔާން އިއްވާ ޖަލްސާ ބޮއިކޮޓް ކުރާނޭވާހަކައެއް ދައްކާފައެއް ނުވެއެވެ.
Advertisement
This content is created and paid for by advertisers and does not involve Voice Journalists
