ރާއްޖޭގެ ރަސްމީ ގްރޮސް ރިޒާވްގައި މިވަގުތު 1.13 ބިލިއަން ޑޮލަރު އެބަހުރި ކަމަށާ މިއީ ރާއްޖޭގެ ތާރީހުގައި ވެސް ރަސްމީ ގްރޮސް ރިޒާވް އެންމެ މައްޗަށް ދިޔަ ފަހަރު ކަމަށް ރައީސް ޑރ. މުހައްމަދު މުއިއްޒު މިއަދު ވިދާޅުވެއްޖެއެވެ.

ރައްޔިތުންގެ މަޖިލިހުގައި ރިޔާސީ ބަޔާން އިއްވަވަމުން ރައީސް ޑރ. މުއިއްޒު ވިދާޅުވީ، މަރުކަޒީ ބޭންކް، އެމްއެމްއޭއިން މިދިޔަ އަހަރު އެކަނިވެސް 492 މިލިޔަން އެމެރިކާ ޑޮލަރު މާރުކޮށްފައިވާ ކަމަށެވެ. އަދި މިކަމުގެ ސަބަބުން ރާއްޖޭގެ ރަސްމީ ރިޒާވް އިތުރުވެ، ރަސްމީ ގްރޮސް ރިޒާވް 1.13 ބިލިޔަން އެމެރިކާ ޑޮލަރަށް އަރާފައިވާ ކަމަށެވެ.

މީގެ އިތުރުން، އަބޫދާބީ ޑިވެލޮޕްމެންޓް ފަންޑުން 2018 ވަނަ އަހަރު ނަގާފައިވާ 100 މިލިޔަން ޑޮލަރުގެ ބޮންޑު މި ސަރުކާރުން ކޮށްފައިވާ މަސައްކަތުގެ ނަތިޖާއެއްްގެ ދަށުން ރޯލްއޯވަރކޮށް، އޭގެ މުއްދަތު 5 އަހަރަށް އިތުރުކުރުމުގެ އެއްބަސްވުމަކަށް އާދެވިފައިވާ ކަމަށެވެ.

"މި ސަރުކާރުން ކުރި މަޝްވަރާގެ ނަތީޖާގެ ގޮތުން ރޯލްއޯވަރކޮށް މެޒޫރިޓީގެ މުއްދަތު 5 އަހަރަށް އިތުރުކުރުމަށާއި، އަދި މިކަމާ ގުޅޭ އެގްރީމެންޓުގައި ސޮއިކުރުމުގެ ޓާރމްސްތަކަށް ވަނީ އެއްބަސްވެފައި. އަދި މިއަހަރު ލިބޭނެކަމަށް އަންދާޒާކޮށްފައިވާ އާމްދަނީގެ އިތުރުން ނޮން ޓެކްސް އާމްދަނީގެ ގޮތުގައި 100 މިލިޔަން ޑޮލަރު މިހާރު ކަށަވަރުވެފައިވާއިރު މި އާމްދަނީ ކުރިއަށްއޮތް 45 ދުވަހުގެ ތެރޭގައި ޖަމާވާނެ." ރައީސުލްޖުމްހޫރިއްޔާ ވިދާޅުވިއެވެ. 

ރައީސް އިތުރަށް ވިދާޅުވީ، ދައުލަތުގެ ޖުމްލަ އާމްދަނީއާއި ހިލޭ އެހީގެ ގޮތުގައި 2025 ވަނަ އަހަރުގެ ނިޔަލަށް 36 ބިލިއަން ރުފިޔާ ލިބިފައިވާ ކަމަށެވެ. އެގޮތުން، ޓެކްސްގެ އާމްދަނީގެ ގޮތުގައި 28.1 ބިލިއަން ރުފިޔާ ލިބިފައިވާއިރު ޓެކްސް ނޫން އާމްދަނީގެ ގޮތުގައި 9.6 ބިލިއަން ރުފިޔާ ލިބިފައިވާކަން ފާހަގަކުރެއްވިއެވެ.

މީގެ އިތުރުން، ހިލޭ އެހީގެ ގޮތުގައި 378.2 މިލިއަން ރުފިޔާ ލިބިފައިވާއިރު، ޖުމްލަ އާމްދަނީއާއި ހިލޭ އެހީ ވަނީ 2024 ވަނަ އަހަރަށް ބަލާއިރު 12 އިންސައްތަ ކުރިއަރާފައިވާކަމަށް އެމަނިކުފާނު ވިދާޅުވިއެވެ.

އަދި މި ބަދަލުތަކާ އިޤްތިޞާދީ ދުވެއްޔަށް އަންނަ ކުރިއެރުމާ އެކު މިއަހަރު 40.4 ބިލިއަން ރުފިޔާ އާމްދަނީއާއި ހިލޭ އެހީގެ ގޮތުގައި ލިބޭނެކަމަށް އަންދާޒާ ކުރެވޭކަމަށްވެސް އެމަނިކުފާނު ވިދާޅުވިއެވެ.