ހުޅަނގު އައްސޭރީގެ އިސްތިއުމާރުކޮށްފައިވާ ބިންތަކަކީ އިސްރާއީލުގެ މިލްކިއްޔާތެއް ކަމުގައި ކަނޑައެޅުމަށް އެ ގައުމުގެ އިސްތިއުމާރީ ބާރުތަކުން ނިންމި ނިންމުން ދިވެހި ސަރުކާރުން އެންމެ ހަރުކަށި އިބާރާތުން ކުށްވެރިކޮށްފި އެވެ.
މި ނިންމުމަކީ ބައިނަލްއަގްވާމީ ގާނޫނުތަކާއި މުޅިން ހިލާފު، އަދި ފަލަސްތީނުގެ ރައްޔިތުންގެ އިންސާނީ ހައްގުތަކަށް އަރައިގަތުމަށް އިސްރާއީލުން ހިންގާ ޣައިރު ގާނޫނީ ވަޒަންވެރިވުމުގެ ސިޔާސަތުގެ ދަށުން ނިންމާފައިވާ ނިންމުމެއްކަމުގައި ދިވެހި ސަރުކާރުން ދެކޭ ކަމަށްވެސް ވަނީ ބުނެފަ އެވެ.
މިފަދަ ނިންމުންތަކަކީ ބައިނަލްއަގްވާމީ ގާނޫންތަކާ ހިލާފު ކަމަކަށް ވުމާއެކު، މިއީ އަދުލުވެރިކަމާއި ދެމެހެއްޓެނިވި ސުލްހަ ގާއިމުކުރުމުގެ ފުރުސަތުތަކަށް އެޅޭ ހުރަހެއް ކަމުގައިވެސް ވަނީ ބުނެފަ އެވެ. އަދި، އިސްރާއީލުން ހިންގަމުންދާ މިފަދަ ޣައިރު ގާނޫނީ އަމަލުތައް ވަގުތުން ހުއްޓުވައި، ބައިނަލްއަގްވާމީ ގާނޫނުތަކާއި އދ. ގެ ގަރާރުތައް ތަންފީޒުކޮށް، އިސްރާއީލު ޖަވާބުދާރީ ކުރުވުމަށް ބައިނަލްއަގްވާމީ މުޖުތަމައަށް ދިވެހި ސަރުކާރުން ވަނީ ގޮވާލާފަ އެވެ.
ދިވެހި ސަރުކާރުން ވަނީ ފަލަސްޠީނުގެ ރައްޔިތުންގެ ހައްގުތައް ރައްކާތެރިކުރުމަށާއި، ފަލަސްޠީނުގެ މިނިވަން މުސްތަގިއްލު ދައުލަތެއް ގާއިމުކުރުމަށް ކުރާ ތާޢީދު އެގޮތުގައި ދެމި އޮންނާނެ ކަންވެސް ހާމަކޮށްފަ އެވެ.
Advertisement
This content is created and paid for by advertisers and does not involve Voice Journalists
