ފ.އަތޮޅު ކައުންސިލުން ތަޖުރިބާ ހޯދުމަށް އަވައްޓެރި ސްރީލަންކާއަށް ކުރި ދަތުރަކީ، ކައުންސިލުން ކުރަމުންގެންދާ މަސައްކަތްތަކާ ގުޅިންހުރި ދަތުރެއް ނޫންކަމަށް އޮޑިޓަރ ޖެނެރަލްގެ ރިޕޯޓްގައި ބުނެފިއެވެ.

ފ.އަތޮޅު ކައުންސިލުން ވަނީ ތަޖުރިބާ ހޯދުމަށްކަމަށް ބުނެ 2024 ވަނަ އަހަރު ސްރީލަންކާއަށް ދަތުރެއްކޮށްފައެވެ.

މި ދަތުގައި އަތޮޅު ކައުންސިލް އިދާރާ ތަމްސީލްކުރާ 2 މެމްބަރުންނާއި، ސެކްރެޓަރީ ޖެނެރަލް އާއި 17 އިދާރީ މުއައްޒަފުން ހިމެނޭ ގޮތަށް 20 މުއައްޒަފަކު ބައިވެރިވިއެވެ. އޮޑިތަރ ޖެނެރަލްގެ ރިޕޯޓްގައިވާގޮތުން 8 ދުވަހުގެ މި ދަތުރަށް ކައުންސިލްގެ ބަޖެޓުން ވަނީ، 140،971 ރުފިޔާ ހަރަދުކޮށްފައެވެ.

ދަތުރުގެ ހަރަދު.. މައުލޫމާތު: އޮޑިޓް ރިޕޯޓް

މި ދަތުރާ ގުޅޭގޮތުން އޮޑިޓް އޮފީހަށް ދީފައިވާ މައުލޫމާތުގައިވާގޮތުން މި ދަތުރުގެ މަގްސަދުތަކުގެ ތެރޭގައި މަސައްކަތާއި ގުޅޭ ތަޖުރިބާ ހޯދުމާއި، މުއައްޒަފުންގެ މެދުގައި ގުޅުން ބަދަހިކޮށް އެކުވެރިކަން އާލާކުރުން ހިމެނެއެވެ. ދަތުރުގައި ތަޖުރިބާކޮށްފައިވާ ކަންކަމުގެ ތެރޭގައި ސައިފަތް އުފައްދާގޮތުގެ މަސައްކަތްތަކާއި، އަޔުރްވެދިކް ބޭސްވެރިކަން ކުރާގޮތް ބެލުމާއި، ފ.އަތޮޅު ސްޓޯރަށް ބޭނުންވާ މުދާގަތުން ހިމެނެއެވެ. މީގެ އިތުރުން ކޮލަމްބޯގައި ހުންނަ ދިވެހިރާއްޖޭގެ ހައިކޮމިޝަނަށް ޒިޔާރަތްކޮށް ފޮރިން ސަރވިސްގެ މަސައްކަތާއި ގުޅޭގޮތުން މައުލޫމާތު ހޯދުންވެސް ހިމެނެއެވެ.

ދަތުރާ ގުޅޭގޮތުން އޮޑިޓަރ ޖެނެރަލް  ރިޕޯޓްގައި ބުނެފައިވަނީ، ފ.އަތޮޅު ކައުންސިލްގެ މި ދަތުރަކީ، ދައުލަތުގެ ހަރަދުތައް ކޮންޓްރޯލްކޮށް އެފިޝަންސީ އިތުރުކުރުމަށް ފިނޭންސުން އަންގާފައިވާ އެންގުމާ އެއްގޮތށް ކޮށްފައިވާ ހަރަދުތަކެއް ކަމަށް ބެލެވެން ނެތްކަމަށެވެ. އަދި ސައިފަތް އުފައްދާތަން ބެލުމާއި، އަޔުރްވެދިކް ބޭސްވެރިކަން ކުރާގޮތް ބެުންފަދަ ކަންކަމަކީ ކައުންސިލްގެ މަސައްކަތްތަކާ ގުޅުންހުރި ކަންކަން ނޫންކަމަށެވެ.

އޮޑިޓަރ ޖެނެރަލް ދެއްވި ރައުޔުގައި ބުނެފައިވަނީ، މިފަދަ ތަޖުރިބާގެ ދަތުރުތައް ސްޕޮންސަރ އާއި އެނޫންވެސް އެހީގެ ގޮތުގައި ފައިސާ ހޯދައިގެން މެނުވީ އެބާވަތުގެ ދަތުރުތައް ނުކުރުމަށެވެ.