ހުޅުމާލޭ ފޭސް އެކެއްގައި ހުންނަ ވަން އެވެނިއު އެޕާޓްމަންޓެއްގައި ހިނގި އަލިފާނުގެ ހާދިސާގައި އެ އެޕާޓްމަންޓަށް ބޮޑެތި ގެއްލުންތަކެއް ލިބިއްޖެއެވެ.

ނެޝަނަލް ޑިޒާސްޓާ މެނޭޖްމަންޓް އޮފީހުން ބުނީ އަލިފާނުގެ ހާދިސާ ހިނގާފައިވަނީ ރޭ ދަންވަރު 23:00 ހާއިރު ކަމަށެވެ. މި ހާދިސާގައި އެޕާޓްމަންޓްގެ ބަދިގެބޭނުން ނުކުރެވޭ ވަރަށް އަލިާނުގެ އަސަރު ކޮށްފައިވާއިރު، އެޕާޓްމަންޓްގައި ދިރިއުޅެމުން އައި އެ އާއިލާ ވަނީ ވަގުތީ ބޯހިޔާވަހިކަން ހަމަޖައްސައިދީފައެވެ. 

އެންޑީއެމްއޭއިން ބުނެފައިވަނީ މި ހާދިސާގައި 5 މީހަކަށް ބޯހިޔާވަހިކަން ހަމަޖައްސައިދިން އިރު، މީގެ ތެރޭގައި އުމުރުން ދުވަސްވީ މިހަކާއި ނޭވާހިއްލާ ކުޑަކުއްޖަކު ހިމެނޭކަމަށެވެ. އެ އިދާރާއިން ވަނީ އެމީހުންގެ ކެއިން ބުއިމުގެ ކަންކަންވެސް ވަގުތީގޮތުން ހަމަޖައްސައިދީފައެވެ.

މި ހާދިސާގައި މީހަކަށް ގެއްލުން ނުވިނަމަވެސް ލިބުނު ގެއްލުންތައް ބެލުމުގެ މަސައްކަތް ޤައުމީ ޑިޒާސްޓާ އޮފީހުން ދަނީ ކުރަމުންނެވެ. 

ހުޅުމާލޭގައި މި ފަހަކަށް އައިސް އަލިފާނުގެ ނުރައްކާތެރި ދެ ހާދިސާއެއް ވަނީ ހިނގާފައެވެ. އޭގެ ތެރެއިން އެންމެ ފާހަގަކޮށްލެވެނީ ޖެނުއަރީމަހުގެ 30 ވަނަ ދުވަހު ހިޔާ ޓަވަރު 5 ގައި ހިނގި އަލިފާނުގެ ހާދިސާއެވެ. އެ ހާދިސާގައި ޑިޒާސްޓާ އޮފީހުން ވަނީ އެ ޓަވަރުގެ 7 އެޕާޓްމެންޓެއްގެ 37 މީހަކަށް ވަނީ ވަގުތީ ބޯހިޔާވަހިކަން ފޯރުކޮށްދީފައެވެ.