މާލޭ ވިޔަފާރި ބަނދަރުން މިދިޔަ ހަފްތާގެ ބްރާސްފަތި ދުވަހު ގިނަ އަދަދަކަށް ބިސް އަދި ފިޔާ ކްލިއާ ކޮށްފިއެވެ.

މޯލްޑިވްސް ޕޯޓްސް ލިމިޓެޑުން އާއްމުކުރި ތަފާސްހިސާބުތަކުން ދައްކާގޮތުގައި އެދުވަހު އެންމެ ގިނައިން ކްލިއާ ކޮށްފައިވަނީ، ބިހެވެ. އެގޮތުން 3،658 ކޭސް ބިސް ކްލިއާ ކުރިއިރު، 2،165 ބަސްތާ ފިޔާ ވަނީ ކްލިއާކޮށްފައެވެ. ވިޔަފާރި ބަނދަރުން ދެން އެންމެގިނައިން ކްލިއާކޮށްފައިވަނީ، ޓޮމާޓޯ، އަލުވި، އަލަނާސި، ކަރާ އަދި ދޮންކޭލެވެ. 

ވިޔަފާރި ބަނދަރަށް ބޭލި މުދާތަކެއް ކްލިއާކުރަނީ..

ބްރާސްފަތިދުވަހު އެކަނިވެސް 1،224 ކޭސް ޓޮމާޓޯ ކްލިއާ ކުރިއިރު، 926 ބަސްތާ އަލުވި ވަނީ ކްލިއާ ކޮށްފައެވެ. މީގެ އިތުރުން ހަމަ އެދުވަހު 600 ބަސްތާ ކަރާ ކްލިއާ ކުރިއިރު، 224 ކޭސް ދޮންކެއޮ ކްލިއާ ކޮށްފައި ވެއެވެ.

މިދިޔަ ހަފްތާގެ ބްރާސްފަތި ދުވަހު އެކަނިވެސް އެމްޕީއެލުން ވަނީ، ކޮންވެންޝަނަލް ކާގޯގެ ގޮތުގައި 3،260 ޓަނުގެ ކޮންޓެއިނާ ކްލިއާކޮށްފައެވެ. އެއީ 167 ކޮންޓޭނަރެވެ. 

ރޯދަމަހު މާލޭ ވިޔަފާރި ބަނދަރަށް ގެންނަ އަވަހަށް ހަލާކުވާ ޒާތުގެ ތަކެތި ކްލިއާ ކުރުމުގެ ގޮތުން އެމްޕީއެލުން ވަނީ މާލޭ ވިޔަފާރި ބަނދަރުގައި 3،000 އަކަފޫޓުގެ ޝެޑެއް މިކަމަށް ހާއްސަކޮށްފައެވެ. ރޯދައަށް ގެންނަ ތަރުކާރީ އާއި މޭވާފަދަ އަވަހަށް ހަލާކުވާ ޒާތުގެ މުދާ ކްލިއާ ކުރުމަށް އެމްޕީއެލުން ހާއްސަ މަސައްކަތްތަކެއް ވަނީ ފަށާފައެވެ.

މި ޝެޑް ހެދުމުން، އަވަހަށް ހަލާކުވާ ޒާތުގެ ކާބޯތަކެތި އަވަހަށް ބާލައި، ބެހެއްޓުމަށް އިތުރު ޖާގައެއް ލިބި، މިފަދަ ހަލުވި ކަމާއެކު ކްލިއަރކުރުމަށް މަގުފަހިވެގެންދާނޭކަމަށް އެމްޕީއެލުން ވަނީ ބުނެފައެވެ.