ބޭންކް އިފް މޯލްޑިވްސްއިން މިދިޔަ އަހަރުގެ ވިޔަފާރީގެ ފައިދާއިން ހިއްސާދާރުންނަށް ބެހުމަށް ރެކޯޑް އަދަދެއް ކަނޑައަޅައިފިއެވެ.

މިއަހަރު ބާއްވާ އަހަރީ އާއްމު ޖަލްސާގައި ބީއެމްއެލުން ކަނޑައަޅާފައިވަނީ ވިޔަފާރީގެ ފައިދާއިން ހިއްސާއަކަށް 60 ރުފިޔާ ބެހުމަށެވެ. މިގޮތަށް ނިންމުމާއެކު ބީއެމްއެލުން ހިއްސާގެ ފައިދާގެ ގޮތުގައި ޖުމްލަ، 322,915,200 ރުފިޔާ ބަހާނެއެވެ. ބީއެމްއެލުން މިދިޔަ އަހަރު ބަހާފައިވަނީ ހިއްސާއަކަށް 55 ރުފިޔާއެވެ.

މިކަމާ ގުޅޭގޮތުން ޤައުމީ ބޭންކުން މިއަދު ނެރުނު ބަޔާނެއްގައި ބުނެފައިވަނީ، މިހާރު ތިބި ހިއްސާދާރުންނަށް ކޮންމެ ހިއްސާއަކަށް ބޯނަސް ހިއްސާގެ ގޮތުގައި އިތުރު ދެ ހިއްސާ ދިނުމަށްވެސް ބޯޑުން ހުށަހަޅާފައިވާކަމަށެވެ. މިގޮތަށް ބޯނަސް ހިއްސާ ދޫކުރުމަށްފަހު، 50 ރުފިޔާގެ މޫނު މަތީ ހިއްސާގެ ބުކް ވެލިއު އަކަށް ވާނީ 1015.90 ރުފިޔާއެވެ.

އެހެންކަމުން މިއަހަރު ކޮންމެ ހިއްސާއަކަށް މިދެވެނީ ޖުމްލަ 2091.80 ރުފިޔާގެ ނަފާއެއްކަމަށް ބީއެލްއެލުން ފާހަގަކުރިއެވެ. ބީއެމްއެލުން ބުނީ ބޯނަސް ހިއްސާ ދޫކުރުމަށް ހުށަހަޅާ މައިގަނޑު ސަބަބަކީ ބޭންކުގެ މާކެޓް ކެޕިޓަލައިޒޭޝަން އިތުރުކޮށް ހިއްސާދާރުންނަށް ލިބޭ ނަފާ އިތުރު ކުރުމާއި، ރާއްޖޭގެ ހިއްސާގެ ބާޒާރު އިތުރަށް ފުޅާކުރުމަށް އެހީތެރިވެދިނުން ކަމަށެވެ. މިގޮތަށް ނިންމުމުން މިފަހަރު ހިއްސާގެ ފައިދާ ލިބޭނީ ހިއްސާގެ ދަފްތަރު ބަންދުކުރާ ތާރީހާ ހަމަޔަށް ބޭންކުގެ ހިއްސާދާރޔުންގެ ގޮތުގައި ތިބި ފަރާތްތަކަށެވެ.

ބީއެމްއެލަށް މިދިޔަ އަހަރު ވިޔަފާރި ހިންގައިގެން 3.1 ބިލިއަން ރުފިޔާގެ ފައިދާއެއް ލިބުނުއިރު، ޓެކްސްއަށް ކެނޑުމަށްފަހު ވަނީ 2.4 ބިލިއަން ރުފިޔާގެ ސާފްފައިދާއެއް ލިބިފައެވެ.