މިއަހަރު ބޭއްވުމަށް ހަމަޖެހިފައިވާ އުފެއްދުންތެރިކަމުގެ މައުރަޒު ހުޅުވާލާނީ، ވީހާވެސް ގިނަ ފަރާތްތަކަކަށް ބައިވެރި ވެވޭގޮތަށްކަމަށް އިގްތިސާދީ ތަރައްޤީއާއި ވިޔަފާރިއާ ބެހޭ މިނިސްޓްރީން ބުނެފިއެވެ.
ކުރިއަށްއޮތް ދިވެހިރާއްޖޭގެ ޤައުމީ އުފެއްދުންތެރިކަމުގެ މައުރަޒާ ގުޅޭގޮތުން އެ މިނިސްޓްރީން އެކްސްގައި ކުރި ޕޯސްޓެއްގައި ބުނެފައިވަނީ، "ދިވެހީންގެ އުފެއްދުންތެރިކަމުގެ މައުރަޒު" މިއަހަރު ކުރިއަށްގެންދިއުމަށް ނިންމާފައިވަނީ އޮކްޓޯބަރުމަހުގެ 23 ވަނަ ދުވަހުން ފެށިގެން 31 ވަނަ ދުވަހުގެ ނިޔަލަށްކަމަށެވެ.
މިދިޔަ އަހަރުގެ މައުރަޒުގެ ތެރެއިން... ފޮޓޯ: ވޮއިސް
މިހިނގާ އަހަރަކީ ރާއްޖޭގެ އުފެއްދުންތެރިކަމުގެ އަހަރުގެ ގޮތުގައި ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވަނީ ކަނޑައަޅުއްވާފައެވެ. އެހެންކަމުން މިފަހަރުގެ މައުރަޒު ކުރިއަށްދާނީ ދިވެހިންގެ މަސައްކަތްތަކަށް އައިސްފައިވާ ކުރިއެރުމާއި، އުފެއްދުންތެރިކަމަށް އައިސްފައިވާ އަދި އަންނަމުންދާ ތަރައްޤީ އާއި ކުރިއެރުން ފެންނަ ގޮތަށެވެ.
އިގްތިސާދީ މިނިސްޓްރީން ބުނީ މިފަހަރުގެ މައުރަޒު ބިޒްނަސް ސެންތަރ ކޯޕަރޭޝަނުން އިންތިޒާމުކުރާއިރު، މި މައުރަޒުވެސް ކުރިއަށްގެންދާނީ މީހާވެސް ގިނަ ފަރާތްތަކަކަށް ބައިވެރި ވެވޭނޭގޮތަށް ކަމަށެވެ. އެގޮތުން ކުރިއަށް އޮތް މައުރަޒުގައި ބައިވެރިވުމުގެ ފުރުސަތާއި އެކަމުގެ އުސޫލްތައް އަންނަ މާޗްމަހުގެ ތެރޭގައި އިއުލާނުކުރެވިގެން ދާނޭކަމަށް މިނިސްޓްރީން ބުންޏެވެ.
Advertisement
This content is created and paid for by advertisers and does not involve Voice Journalists
