މާލޭގެ ގެއެއްގައި ރޭ ދަންވަރު ހިނގި އަލިފާނުގެ ހާދިސާއަކާ ގުޅިގެން، ހާލުގައި ޖެހުނު ހަތް މީހަކަށް ނޭޝަނަލް ޑިޒާސްޓަރ މެނޭޖްމަންޓް އޮތޯރިޓީ (އެންޑީއެމްއޭ) އިން ވަގުތީ ބޯހިޔާވަހިކަން ފޯރުކޮށްދީފިއެވެ.
މާލޭ މއ. ރިމްލާސް ގޭގައި މި ހާދިސާ ހިނގާފައިވަނީ ރޭ ދަންވަރުގެ ވަގުތެއްގައެވެ.
އެމްއެންޑީއެފުން މައުލޫމާތު ދިން ގޮތުގައި، މީހުން ދިރިއުޅޭ އެ ގޭގައި އަލިފާން ރޯވެގެން ރިޕޯޓް ލިބިފައިވަނީ ރޭ ދަންވަރު 03:06 ހާއިރުއެވެ. ރިޕޯޓް ލިބުމާއެކު މާލޭ ފަޔާ ސްޓޭޝަނުގެ ފަޔާފައިޓަރުން އެ ސަރަހައްދަށް ގޮސް އަލިފާން ނިއްވުމުގެ މަސައްކަތް ވަނީ ފަށާފައެވެ.
ސިފައިން ކުރި މަސައްކަތުން އެ ގޭގައި ރޯވި އަލިފާން އެއްކޮށް ނިއްވާލެވިފައިވަނީ ފަތިހު 04:12 ހާއިރުއެވެ.
މި ހާދިސާގައި އެ ގޭގެ އެކި ބައިތަކަށް ބޮޑެތި ގެއްލުންތަކެއް ލިބިފައިވީ ނަމަވެސް، އެއްވެސް މީހަކަށް އަނިޔާއެއް ވިކަމުގެ ރިޕޯޓެއް ލިބިފައި ނުވާ ކަމަށް އެމްއެންޑީއެފުން ބުންޏެވެ.
އެންޑީއެމްއޭ އިން ބުނީ، މއ. ރިމްލާސް ގޭގައި ހިނގި އަލިފާނުގެ ހާދިސާގައި އެ ގެއަށް ބޮޑެތި ގެއްލުންތަކުގެ ސަބަބުން އެތަނުގައި ދިރިއުޅެން ދަތިވާތީ، އެގޭގައި ދިރިއުޅޭ ހަތް މީހަކަށް ފަސް ދުވަހުގެ މުއްދަތަށް ބޯހިޔާވަހިކަމާއި ކާތަކެތި ފޯރުކޮށްދީފައިވާ ކަމަށެވެ.
Advertisement
This content is created and paid for by advertisers and does not involve Voice Journalists
